屋企雜務

本來呢個禮拜應該好返d, 頭幾日仲可以得閒下, 點知突然又多野忙, 忙既野:

1. 男友月尾生日, 諗住整蛋糕俾佢, 搵梗資料, 同埋諗邊度食飯!
2. 媽媽搬屋要幫佢訂電視
3. 台灣機票酒店格價
4. 做農夫
5. 轉屋企既火險同家居保

呢期為左做農夫, 不斷上網爬文, 我都知呢d時候唔應該搞d咁既野, 不過我已經開始左, 返唔到轉頭喇!

至於屋企既火險同家居保, 真係令我好頭痛, 首先我對保險真係唔多認識, 火險係銀行按揭要我買, 恒生送左一年俾我, 今個月尾到期, 黎梗保費$18xx, 我覺得好似好貴, 所以想搵第二間, 另外家居保其實買唔買都得, 不過又好似買左安心d, 恒生送左半年, 之後呢半年佢自動續保每個月收我$95, 一早想搞下佢, 因為格過價又係貴過人, 甚至乎比起恒生新join既仲貴d添, 不過一直都係懶, 而家搞火險先順便搞埋佢!

唔知各位屋企既野係邊位負責? 有時真係好炆, 由買樓開始既所有銀行文件, 到屋企既乜費乜費, 電器保養, 到而家保險, 我男友都係掂都冇掂過, 結婚野佢又唔理, 屋企野又唔理, 有時真係會好唔開心, 每次話佢, 佢就話自己好忙, 而我每次都會話: 既然你咁忙, 咁唔好踢波唔好返拳啦!!  佢又會唔出聲, 之後...當然又係當冇事發生啦, 唉, 好驚一日我會頂唔順呀!!!