HONEYMOON??

唔知點解, 呢兩日幾位朋友不約而同問我會去邊度honeymoon, 老實講, 我冇認真諗過, 細個諗既蜜月地方, 係歐洲, 因為覺得好浪漫, 大個左先知原來歐洲都好大架, 哈哈!

讀書時期開始, 就好想去日本, 可惜一直冇機會, 以前就唔夠錢, 到夠錢就永遠都去唔成, 原因係咩呢? 有一年表姐結婚, 用左d假同錢去左加拿大, 另一年, 當時既男朋友冇錢, 上年, 男朋友想去希臘...就係咁, 每一年都有一個理由搞到我去唔到, 今年諗住去影婚紗相喇, 又爆出地震海嘯輻射, 睇黎我同日本都係冇緣, 真係好唔開心!

身邊好多朋友, 都去過日本, 我同人講冇去過日本係冇人信架, 所以你而家問我最想去邊, 我一定答你係日本!!

好多小朋友細細個就會同屋企人周圍去旅行, 但我屋企係冇架, 連去澳門都未試過, 所以我第一次去旅行, 係出左黎做野之後自己儲錢去的, 數一數去過地方:

2001: 韓國 (同女仔朋友去)
2002: 台灣 (同當時男友去)
2004: 泰國 (同當時男友去)
2005: 台灣 (同當時男友去)
2006: 加拿大 (自己辭左份工去探親戚朋友)
2008: 加拿大+英國 (表姐結婚, 同堂妹去, 唔甘心洗咁多錢又去同一個地方, 所以買英航機票去埋英國)
2009: 新加坡 (公幹去見客)
2009: 泰國 (公司旅行)
2010: 希臘 (同男友+其他朋友去)

好多地方都係重覆左架, 係咪好無聊呢? 原來我同男友係冇試過兩個人去旅行的, 上年我地plan去旅行, 我話好想去日本, 點知佢話佢想去法國探表妹, 又話日本唔o岩我, 因為我都唔係shopping個d人, 佢表妹係法國讀多一年就返黎, 到時去就冇人帶我地周圍玩, 咁好啦, 去法國啦!

點知搞下搞下, 佢又叫埋其他朋友, 好喇, 加埋表妹變左6個人(全部我都唔熟的), 諗住去法國, 意大利, 希臘, 大家好開心咁傾, 但係冇人去做野, 除左表妹係法國幫手搵火車資料, 之後計下計下, out晒budget, 最後決定, 剩係去希臘(因為男友同佢表妹最想去呢個地方)!! 之後發生咩事呢? 就係冇人理野喇, 搵晒資料俾佢地, 冇人覆, 個排同搞結婚一樣, 個人有少少精神病, 原來最後係去男友最想去既希臘, 仲要係我一個搞俾你同你d朋友去, 咁點解唔可以去我想去既日本呢? 發左幾次脾氣, 男友終於做野, 同d朋友講話要分工, 條氣順返少少, 我同佢講, 唔該你下次唔好再叫你d朋友去, 乜野都唔做, 好似係跟團咁, 我就一個人負責晒所有野!

越講越遠, 講返個honeymoon, 我有諗過...去歐洲, 但去過英國覺得好悶, 真係純粹到此一遊, 其他附近地方相信都一樣! 陽光海灘唔係我杯茶(但係我男友非常鍾意), except maldives, 因為真係好靚同埋我想試下住水上屋! 又想去冰島, 東歐等等, 不過呢d全部都係好貴之餘, plan行程係會好辛苦, 仲要男友一定唔會做, 跟團我又唔想, 覺得好似鴨仔咁, 又要早起身! 去呢d地方仲有一樣慘, 就係搭飛機, 我近幾年搭幾次十幾個鐘既飛機, 真係好想死, 因為我搭飛機係瞓唔到覺的, 諗起都驚!

咁去邊好呢? 我同男友講, 要去日本, 去唔到東京個d, 去北海道, 總之我要去日本, 希望...十分希望, 日本可以快d東山再起, 咁我就可以揀北海道做我既蜜月地方喇!!