花得囍

今日放工同男友帶左小白同小小白兩PAIR龜去花得囍做衫, 呢間係BLOG友仔介紹, 我都冇特別去格其他公司價了, 位置係觀塘工廠區, 都幾唔方便, 仲要係收19:30, 真係要放工仆去!

上到去原來間野真係係工廠大廈裡面, 好多結婚野賣, 特別係公仔同埋花, 俾左小白同小小白佢地睇, 佢地話D龜對手咁短好難做呀, 我都冇諗過呢個問題, 佢提議男既就剩係做帽同BOW TIE, 女既就做件露膊婚紗, 咁對手可以露出黎, 如果做有袖既話會好怪, 呢個提議都幾好, 本身我都唔想件衫會遮住佢地既龜殼, 又可以慳D錢(因為少D布)!

揀左都幾耐, 佢地真係好專業, 有晒布樣俾我地揀, 裙邊位, TIE花紋, 花球等等都可以揀, 我地揀左有紅邊既帽俾小白, 襯紅色波點BOW TIE, 女既就皇冠+頭紗同佢提議既婚紗, 不過LACE布冇得好揀, 因為短既款冇乜, 另外加左珍珠鏈同埋花球俾佢地, 好期待佢地出黎既樣呀, 如果靚的話帶埋大白去做, 呵呵!

我本來想用小小白一PAIR做戒指枕, 但又唔想拮佢地係個枕度, 好痛架, 佢提議我地做戒指盒, 都幾靚同埋實用, 兩隻龜唔會釘死係個度, 感覺好好多, 個盒之後都可以用返, 唔錯!

一路話點做點做, 其實都冇問價錢, 都幾驚, 出黎既價比我心目中平左, 係每PAIR $250, 另外皇冠每個$15, 如果整埋花車蝴蝶結加$100(可以之後拎返去整), 我都未決定整唔整好, 太長遠既事喇!

就係咁, 我地落左$400訂, 叫佢29/4前俾到我地影相就得, 原本佢話戒指盒遲D得唔得, 我仲口輕輕話好呀, 有排都未結, 慢慢啦, 之後諗諗下, 唔係喎, 咁小小白一PAIR咪有排擺係佢地度? 即刻話唔得, 哈哈!

臨走時同佢地講拜拜, 真係好唔捨得, 好想喊呀, 三個星期後先有得見返佢地, 影響晒我成晚既心情, 男友仲要專登扮佢地講到好慘咁, 不過我知佢都有唔捨得, 哈哈!