試妝@花嫁紫閣

琴晚放工去左第一次試妝, 真係約得好快手, 佢地點係利時, 七點左右就上到去了, 有兩個女仔, 一個叫regen, 負責化妝, 另一個叫shirley, 負責set頭的, 佢話呢度係同幾個女仔夾份租, 都幾靚呀!

開始化了, 好唔慣有兩個人同時服侍自己, 哈哈, 睇得出佢地都幾新, 問佢地做左幾耐, 原來只係做左年幾, 不過佢地真係好好心機同埋好細心! 首先好開心既係regen發現左一樣野, 就係我對眼, 我化咁多次妝, 得june做到, 因為我對眼有一邊係有少少內雙, 唔係好覺眼, 但係一搽eyeline就一定會整到眼皮, 其實我一直都唔知架, 因為我一直都唔會搽eyeline, 直到上年june幫我化, 佢幫我痴雙眼皮膠紙係右眼, 我問佢點解要痴, 佢先解釋我聽原來我右眼眼皮垂d, 其他化妝師都冇睇到呢樣野, 所以好開心今次regen留意到!

首先化既係婚紗妝, 佢地問我有咩要求, 我話唔要黃綠色, 同埋唔好set到個頭咁老, 清清地就ok, 化完個妝都ok, 但又冇叮一聲既感覺, 我黑眼圈比較深, 佢地搽左遮瑕都遮唔晒, 不過佢地話到時影相一定打燈, 打左就唔會有!

第二個化既係褂妝, 胭脂紅少少, 咀紅少少, 畫深左下眼線, 同埋對眼加左閃粉, set埋個頭, 呢個我好鍾意呀, 男友上到黎見到都話好鍾意, 加上佢個頭飾又得意, 真係好滿意呢!

兩頭兩妝搞左兩個幾三個鐘, 仲要係兩個人, 我唔知算唔算耐, 佢地就話算係好快, 同埋佢地兩個人可以偷d時間化埋伴娘同媽咪等等, 臨走佢俾左卡片我, 同埋講左價錢我知, 真係好平呀, 三個月內join俾九折我, 全日都係$4298, 仲要包埋伴娘同媽咪, 可惜我未覺得有叮一聲感覺, big day唔會搵佢地喇, 不過我仲要搵mua化我媽咪, 奶奶同三位阿嫂, 到時可能會再問下佢地價!

整完成十點喇, 同男友都未食飯, 一落樓下就走去對面食拉麵, 坐低佢第一句就問我, 頭先試妝幾錢? 我話...免費架, 佢話: 吓? 唔駛錢咁好?  我話係呀, 哈哈, 黎梗仲有d唔駛錢既, 之後講左之後幾個試妝時間俾佢, 佢話會黎睇呀, 希望到時唔好恰眼瞓!

男友對佢地既comment: 好似有d亂, 主場都咁, 出到去會唔會仲大鑊架?

婚紗頭, 個頭箍之後拆左~

褂頭, 好鍾意個頭飾~