1st Pre-wedding (The Amor) 睇住少少相先

呢輯就係朋友幫我影的, 同普通pre-wedding唔同, 佢地話出面個d會執到個樣唔認得, 佢地盡量都唔會咁做, 要執都係執下d色, 同埋出面個d係好sweet, 佢地呢d係好型架, 哈哈, 講真我乜野類型都想影, 難得男朋友又肯同我一齊癲, 佢同左我一齊之後就愛上左影相!!

我係web-site copy左d相落黎, 佢地話遲d會send返晒俾我, 好心急呀!!

有興趣可以上佢地網址望下, 話識我應該可以平d架, 哈哈!!

http://amorhk.wordpress.com/

我要減肥呀~~

又到減肥時候, 其實我細個好瘦架, 又或者肥左都好易瘦返, 係過左廿五歲真係差好多, 有肥冇瘦, 有一年直頭肥到豬一樣, 試過一星期打三晚羽毛球都冇用, 再o徒左一筆錢買fancl既瘦身產品都係冇用, 後尾係要靠節食先瘦返少少, 呢排又肥過, 要開始認真計劃一下了!

首先買左個磅放係廳, 日日企上去磅, 見到咁重就會忍下口(希望可以), 另外要食少d, 之前新年我一個都食左兩底半蘿蔔糕, 仲有d家庭朋友飯局等等, 下星期仲約左食buffet, 不過buffet我只愛生蠔, 應該唔肥卦! 公司間唔中又會有人引誘你叫下午茶, 我呢d為食人真係抵受唔到, 哈哈!

第二步係做運動, 都係打羽毛球, 今日即刻搵腳, 好快就約左下星期一打, 不過個個都好忙, 一星期只可以打一晚, 郁下都好過冇啦!

第三步係買d瘦面用品, 其實都唔知有冇用, 不過上yahoo睇好多人買, 價錢又唔貴, 買黎一試無妨, 下星期日約左一個free pre-wedding, 希望塊面唔好再咁包先啦!!

其實呢d都係初步, 睇下有冇用先, 有朋友介紹食減肥藥, 仲話好work, 不過要走到入元朗買, 我又懶懶地, 同埋食藥始終不太好, 再減唔到我先會揀食藥!!

淘婚紗禮服

諗住同男友會搵人影pre-wedding, 所以都係買件婚紗禮服好d, 次次出去租真係好貴, 呢幾日不停係淘寶搵, 真係有平又有貴, 太平又真係唔敢買, 太貴又買唔起, 唯有揀d中價貨, 見到有一條款式似係我之前係婚紗鋪試過鍾意個款, 要RMB399, 諗左好耐, 決定買呢條, 佢仲送埋手套頭紗裙鋼俾我, 另外我仲買左套飾物, 上面有d珍珠, 用黎襯返套婚紗!

呢個款簡簡單單, 應該ok卦!

我揀左後面綁帶, size方面易控制d!

送既...

襯婚紗既飾物

之後係第二間搵到套好平既禮服, 只係RMB188, 包晒西裝褸, 褲, bow tie同腰封, 真係好抵, 幫男朋友買左套, 唔想蝕運費, 係呢間買埋晚裝, 點知我想要個條冇貨, 朋友話我著紫色好d, 想買返紫色, 呢間鋪頭d紫色冇晒咁滯, 是但揀左條算了, 其實都要RMB238, 不過見佢有拖尾, 個款色普普通通, 就真係是但了, 又買多套飾物, 仲有皇冠添, 呵呵!

黃曉明著得好型!

希望呢件晚裝現貨會好睇啦!

襯晚裝既飾物~

仲有皇冠, 貪得意買~

咁樣買晒野差唔多HKD1200, 其實已經平過租衫, 仲要係我俾size佢做俾我, 希望質料ok啦, 真係好期待呀!!

愛屋及烏~

終於寫返晒之前既野喇, 其實都係乜都未搞, 主要係個場地問題, 搞到我地日子都未定, 唉~

早幾日行金都, 我地已經睇中左結婚公仔, 係我最鍾意既龜, 有兩個size, 一對係$380, 一對係$480, 不過我地都係冇買, 好似太早咁, 點知返到屋企, 男友話, 早知買左佢啦, 擺住先都好嘛, 好開心呀, 因為佢愛屋及烏, 鍾意埋我屋企既龜, 我地成間房有十幾隻龜, 佢又會同我玩埋一份, 雖然主要都係"恰"佢地, 又話佢地賭錢, 不過難得有個人真係因為你鍾意而認真同你玩埋一份, 仲好似愛上佢地咁, 真係好開心呀, 下次經過一定要買左對公仔返黎, 反正我都唔會嫌多既, 呵呵!!

我家的龜, 係前年影架, 成員越黎越多!

時運低

今日真係時運低, 行金都見到D唔想見既人, 仲要夜晚睇BLOG都俾我見到你, 仲要又係寫返呢件事, 我相信你有一日會睇到我呢個BLOG, 麻煩你再睇返我之前寫既野, 我地結婚做乜話你知? 因為係你問我架, 問左我幾次我地幾時呀! 我諗左好耐咩叫有機心, 我會對你有咩機心呢? 都係個句啦, 你唔好睇得自己咁重, 當自己係邊位? 我地既MSN對話, 我一字不漏咁有講返俾佢知, 冇做過小動作, 我做乜要妒忌你? 你有乜野值得我去妒忌呢? 不過睇完你所寫, 我反而知道妒忌既人係你!

你BLOG度寫:

真係好想同你講一句:{你不能與我共枕,也能與我同年紀念結婚紀念日} hahaha~~~~~

好心啦, 未放低以前既野就唔好走去結婚, 真係替你個未來老公感到悲哀!

第二次睇場 - 德藝會, 帝京酒店

今日又去睇場喇, 兩間都係約左, 就係德藝會同帝京酒店!

第一站德藝會, 今晚有人擺酒呀, 所以我地要早d去, 其實琴晚我地都有黎過, 裝左個門口, 好鍾意呀, 不過唔好既地方就係門口會好多人行過望到入黎, 今日去到個sales就帶我地周圍睇, 新娘房超級大, 仲有廁所, 又可以沖涼, 個沖涼房企十個入去都得, 哈哈! 咁橋佢試梗燈光, 搞到好似disco咁都得, 仲有音響都幾好, 又有煙霧效果, 成個場我都好鍾意, 尤其係個南瓜車呀, 著住婚紗係度影一定好童話, 哈哈!! 仲有一個唔好處係個地板冇地顫, 呢度真係好似一個禮堂咁, 同埋上落台好似有d麻煩, 不過我知道唔會有十全十美既, 總有一d野係冇咁好!! 唔知點解clubwedding間間都俾book, 但呢度剩係book到出年二月咋, 我覺得係有contract問題未傾掂, 搞到我有d擔心添, 好多人都pencil mark左, 大排長龍呀, 我地都搵左幾日mark, 希望可以book到啦!!

呢張我影架, 佢試梗燈光同煙霧效果~

網站既相, 左邊有南瓜車, 右邊有長樓梯, 仲有個鋼琴~

第二站係帝京酒店, 原因係有朋友識人係度做, 可以做平d俾我, 話晒係酒店, 地點又幾好, 不過我地23圍左右, 只可以擺3/F既帝京軒, 人地話6/F既ballroom係正好多, 咁我地就上去睇3/F啦, 樓底係幾高, 有水晶燈, 又有落地玻璃, 不過我感覺係好娘呀, 真係冇咩好感, 男友就話係樓下上到黎, 左轉右轉咁, 覺得好麻煩, 所以我地唔會考慮了!!

個台係要背住個落地玻璃~

網站既相, 好似好靚, 不過我都係嫌娘~

開BLOG!

見到好多人準新娘都寫BLOG, 自己都忍唔住開返個, 睇人又好, 當紀念又好, 自己本身都有個BLOG寫左好多年, 不過呢幾個月太忙停了, 呢度將會記錄籌備婚禮既所有事!

應該點樣計擺幾多圍呢??

有冇人可以答我, 點樣計擺幾多圍呢? 其實我都冇問過屋企人, 諗住剩係請近親, 再加同事朋友, 我預自己10-11圍, 男友問過屋企, 因為佢係長子嫡, 又係呢一輩第一個擺酒, 可能會多d, 佢媽媽要請18個朋友, 嫲嫲又好似請十幾廿個朋友, 加埋d親戚, 屋企要7圍, 再加同事朋友, 我地加埋大約23圍, 就拎23圍去搵場, 點知今晚食飯, 佢媽媽又話可能唔請朋友, 因為佢d朋友仔女結婚都冇請佢喎, 佢又唔想打搞返佢地, 咁即係點呀?? 18個朋友, 呢度都一圍半, 真係唔識預, 有人話要當8成人到, 所以我應該用19-20圍去問, 最多到時加, 最慘好多地方都係話最多20圍, 我地又唔可以預到咁緊, 真係好煩呀!!

第一次睇場 - 迎, 天澄閣

今日晏晝打去"迎"同"天澄閣", 都話可以睇場, 就約左男友放工一齊去!

第一站係"迎", 一上去就係reception, 佢帶我地睇, 其實都幾細, 係一個長方形, 樓底都算高, 仲有個維港景, 個場後面推門出去係露台, 環境幾好, 不過新娘房冇廁所, 最多可以擺25圍, 我覺得會好迫, 望住個場我想像唔到march in時點行, 同埋呢度都唔平, 2012年min charge要17-18萬(weekend), menu最平係$6,688 (2012), 酒水大約$700, 免加一茶芥, 包埋backdrop, 佢而家有四款主題婚宴, 我都覺得好靚架, 不過又驚到下年年尾其實個個都睇厭晒! 呢度係稻香集團, 食物水準應該有保証, 只係我覺得酒樓都要七八千蚊圍好唔抵, 呢度我地照pencil mark左, 可以hold七日, 其實都幾full, 好多日都俾人mark晒, 得返13 Oct俾我地, 照mark左先!!

個露台真係幾靚

睇到個floor plan, 都係個句, march in唔知點行~

第二站係"天澄閣", 我地係尖沙咀唔知搭乜去, 又未食飯, 所以搭的士過去了, 一去到都覺得呢度幾偏僻, 搵個入口搭lift都要問人, 不過上到去個感覺又幾好, 樓底夠高, 門面幾靚, 又係有露台, 有幾個projector, 新娘房有獨立廁所, 樣樣野都幾好, 2012年min charge $165k (sat & sun), fri應該可以講到$150k, menu未出2012, 不過照計+8%的, 應該係$6360左右, 包酒水但要加一, 仲有椅套每圍$50, 計返又係七千幾一圍, 呢度話晒叫酒店, 都ok既, 我地都幾鍾意, 係個location麻煩d, 仲有最大既問題係, 呢度真係超級full, 上次expo仲有兩個日子揀, 今日睇已經冇晒, 我地全部係waiting list, 照排左幾個日子先!!我地走個陣, 搭返佢既shuttle去紅磡車站, 佢話: 我地自己都覺得黎呢度咁煩, 其他人唔知點算!

個reception都好大~

樓底好高呀~

個台都幾好~

場地選擇

去完wedding expo, 真係大失預算, 之前一直想擺既酒店, 我都上網睇左價錢, 點知原來出年係超貴, 鍾意既朗豪同朗廷酒店min charge都最少要$300k, 不過人地話酒店預早book都會係天價, 但就多數有位, 酒樓係平, 但就多數full晒, 再睇返今年呢兩間酒店, 都係$220k左右, 有冇爭咁遠呀? 男友話不如今年結, 平咁多, 不過我驚搞唔切, 如果十一月去日本影pre-wedding, d時間就真係好緊迫, 所以算啦, 我寧願揀返d平既場地!

返到屋企睇返晒所有野, 暫時心水兩間都係the one既迎同紅磡天澄閣, 其實選場地都有d麻煩, 就係男友個低能ex, 人地擺the one煌府, 搞到我煌府一定唔揀, 費事又話跟佢, 而the one既迎都諗梗揀唔揀, 話晒都同一幢, 男友就話唔好理佢, 所以我地都會照睇!

情人節Wedding Expo

今日去wedding expo, 話12:00-20:00, 男朋友話十一點出門口, 不過我之前一晚打機打到四點幾, 哈哈, 第二朝十一點幾先起身, 食d野就搭車出去了, 多謝一位舊同學送左入場卷俾我, 等我慳返數十元同唔駛排隊!

由mtr行去會展天橋中, 已經好多人派傳單, 我地係咁接, 見到有稻香派本紫色既書, 即刻接左, 因為我想睇the one既"迎", 原來稻香冇擺expo, 但有架車周圍去, 我地冇時間去呀, 所以算數!

去到會展一入場就俾monalisa捉住左, 話有fashion show, 咁坐低俾佢講左半粒鐘都未開始, 勁冇癮就走, 一起身再俾隔離既薇薇新娘捉住, 台灣人真係特別熱情同多野講, 直頭唔俾我地走咁, 我地黎主要係睇酒席架嘛, 諗諗下唔對路, 一起身即刻乜都唔理, 直衝去酒席個邊, 港島冇諗, 其他既乜都拎, 除非話最多擺到十幾圍個d啦, 搞到我地拎左好多返黎!

見到天澄閣得閒, 走去問下啦, min charge $16.5k (weekend), 我地俾手上既日子佢, 9日得返2日有咋, 有冇咁full呀? 再去holiday inn同我個舊同學打聲招呼,  之後就睇其他了!

拎晒資料, 返屋企先睇啦, 我地下一part係睇pre-wedding, 香港既唔會睇喇, 因為一黎有朋友幫我地影, 二黎酒席實送既, 所以我地主要睇海外pre-wedding, 睇完一輪, 放棄左台灣, 希望可以去日本影啦!!

行完一輪好攰喇, 又好肚餓, 佢拎住兩本電話簿咁厚既野行到有d唔好老脾, 所以就走了, 去左一間茶餐廳食飯, 順便抽d冇用既單張出黎丟去回收箱, 即刻輕返少少喇, 返屋企要慢慢做功課了!!

1st Pre-wedding (The Amor) 拍攝

呵, 終於到呢一日, 由於間鋪放新年假放好耐, 我地年廿九就拎左三套衫返黎了, 初八先還, 真係擺足成個新年, 可惜我地都好忙, 冇時間拎出黎玩! 今日十點化妝師就上到我屋企開始化妝了, 到十一點幾攝影師上左黎屋企揀衫, 因為佢地突然話想去果欄影casual wear, 我唔知著乜好, 所以佢地上黎揀!

十二點幾出發, 第一站係果欄, 佢地要求個頭唔好搞咁勁, 因為係casual, 我地去到冇乜人, 開始影了, 影影下有人都黎影婚紗相, 原來呢度都係熱門地, 不過果欄係幾型, 但係我唔鍾意casual wear囉!

果欄既造型

第二站係石澳, 好遠既路程, 我好肚餓, 仲暈車浪添, 所以一去到就去買d野食先再影, 個度既toilet好濕, 我地係車換衫就算了, 好彩七人車, 玻璃又夠黑, 冇咩問題! 今日有d風, 但冇乜浪, 都有幾pair人黎影, 另外仲有一堆龍友+o靚模一個, 黎呢度影最慘係著住套婚紗係度爬石, 好彩冇跌襯! 呢一站係著婚紗, 攝影師又話唔好用頭飾, 因為佢地都係以簡單為主, 不過就有個好長既頭紗, 用黎拋紗用, 好型呀, 哈哈!!

石澳拋紗

第三站係ifc, 去到已經入黑, 仲好大風添, 估唔到呢度係最凍, 真係凍疆我, 我諗我都係唔可以去落雪地方影架喇! 原本化妝師幫我set左頭, 帶埋個假髮, 但攝影師話想我wild d, sexy d, 所以要拆晒落黎, 仲要化到個咀好紅, 我個咀唔夠大, 要畫大佢添! 其實化成點我都冇理, 因為好凍, 同埋好攰了! 呢一站既相要好cool, 好多張都冇笑, 不過我見到有一張係ifc好正呀, 好期待d相出黎!

IFC既造型

影完都十點, 我地去左深井食飯, 之後就返去了, 其實話免費影, 都要封返d利是同埋俾返車馬費, 加埋都洗左唔少: 租衫$2000, 化妝$900(搞到好夜同埋佢好辛苦, 所以俾多$100), 攝影師+司機$600, 另一攝影師即我朋友$200, 打燈哥哥$200, 晏晝野飲野食+夜晚深井晚飯$400, 都未知整唔整相簿好添, 整埋真係要$5000!!