希臘之旅 - 感想

去完希臘後, 我地過左成個月先開始回魂, 返香港真係好唔適應, 彷如由天堂返地獄既感覺!!

今次旅行真係開心又興奮, 多人去有好有唔好, 唔好係要就晒咁多人, book野又要問佢地意見, 最慘唔係個個都合作, 佢地最初真係好似當跟團, 乜都唔理咁, 有時真係好鬼火滾, 十問九唔應唔知想點咁!

而好既係多人開心d, 大家有照應, 仲可以一齊煮野食, 圍埋食飯好開心!!

希臘可以話分兩邊, 首先係雅典, 比較現代化, 但真係幾雜, 可能係我住個邊比較雜, 不過貪佢平, 而我地又人多, 所以唔怕, 夜晚真係幾多醉酒佬, 不過其實夜晚係條街真係冇咩做, 佢地又唔會走入黎酒店搞你, 所以對我地冇咩影響!

雅典對我黎講只有衞城係值得去, 如果有機會再去希臘, 可能未必會留雅典了, 寧願花多d時間係其他島上!

另一邊就係其他島喇, 簡直係第二個世界, d人nice同埋純樸好多, 仲有好多遊客, 所以走到街上個個都係笑笑口, 人都開心d!

食既方面比我想中好, 因為我好多野都唔食架, 但去到都冇捱餓, 仲覺得唔錯添!!

我地話過, 有機會一定會再黎, 試下去其他島, 不過暫時想去既地方仲好長龍, 唔知幾時先有機會lu!

希臘之旅第十天 - 回港了!

坐左十一個鐘, 加埋時差, 去到singapore係零晨既五點幾, 天都未光, 呢度個機場真係好正, 我地好快搵左梳位休息下先, 加埋真係兩晚冇瞓過, 好辛苦呀!!

瞓左陣起身, 佢地話想買"胡椒雞杯麵", 搵到間7-11買, 佢地真係買左好多當手信, 阿lou話買兩個試下, 買完都差唔多要搭飛機返香港了!!

返到香港係中午, 拎完行李後, 發現個o急爛左, 都唔知邊度整爛, peggy話可以拎去claim返錢, 於是我地又要上office搞手續, 佢話搵人維修喎, 吹賬!!

返到屋企上陣網, 呢幾日冇上過網, 脫左節喇, 之後就同lou大昏迷, 夜晚八點幾先起身, 食完野佢就執埋d野返屋企lu!!

希臘之旅第九天 - Santorini to Athens to Hkg

終於都要走了, 好唔捨得, 五點三就人黎接我地, 送我地去搭車, 又係坐返架小巴, 天都未光我地就要去機場了, 呢度個機場又係好細, 得兩間airlines, 兩間都剩係呢度去雅典, 好搞笑!! 我地check-in後, 係度等上機, 仲乘機睇到少少日出添!! 架飛機好古老呀, 係螺旋槳架, 同埋好細架, 佢地話諗起奪寶奇兵, 哈哈!! 估唔到呢架機好坐過去米島 個架,可能時間耐d冇咁趕啦, 派左盒朱古力餅, 因為未食野好肚餓, 即刻拆左黎食, 又幾好食喎!! 我地同表妹唔同機返雅典, 佢架機早我地五分鐘, 估唔到去到雅典, 佢企左係度接我地機, 好好笑, 之後又搵地方等飛機走!! 個個都冇瞓, 好攰, 我成個人迷下迷下咁, 十點幾表妹搭機返法國了, 我地架機一點三, 有排等了!! 一上到機, 我即刻瞓著了, 瞓左大約半個鐘, 連空姐派小食我都唔知, 第一次係飛機有瞓得冧既感覺, 可惜只係半個鐘, 之後個十一個鐘, 都係唔太瞓到,唉~ 終於都要走喇, 天不光就到機場 坐細機返Athens Athens機場

希臘之旅第八天 - Santorini

話咁快就黎到最後一日喇, 今日算係瞓得最晏既一日, 不過阿lou一早起左身出去, 好彩我冇去咋, 因為有幾隻狗跟住佢地, 返到黎佢地不停咁玩貓玩狗, 我連樓都敢落!! 食完野後我地搭車返去FIRA了, 我想試下騎驢仔, 所以就去左舊港個邊, 得我同lou兩個騎, 哈哈!! d驢仔都算乖, 除左為食d之外, 都算係聽話, 每人5歐, 行個條路成地都係地雷, 好臭, 同埋條路都唔短, 所以呢5歐我覺得算係值得了!! 去到舊港影幾張相, 又搭返攬車上去, 之後就搭巴士去沙灘了!! 呢度個沙灘d沙係黑色架, 好似係因為呢個島係火山形成, 黑色既沙灘感覺好特別, 不過好大風好凍呀, 冇乜人, d水依然係咁冰凍, 阿lou仲話想落水, 見到出面又有d浪, 我唔俾佢落, 費事佢返到去就病!! 係沙灘留左一個鐘, 執左d石就走了, 坐返巴士返OIA睇日落!! 本書話OIA既日落係全世界最靚既, 所以好多人係度霸定位睇了, 我地都唔例外, 霸定位睇埋希臘最後一個日落, 仲影左好多相, 落完後我地再行多陣街先返去煮野食了!! 最後晚餐, 我地食埋剩低既野, 就係薯蓉, 另外仲有雪糕, 生果, 同飲品, 食完後返上樓執野, 由於聽朝要五點三出門口, 我地決定唔瞓了, 執完野落返去同佢地玩啤牌, 飲埋d啤酒, 玩到攰攰地, 各自各睇星星, 呢度既星空真係好靚, 成天都係星, 好似去左太空館咁, 點解香港會睇唔到架?? 到三點幾頂唔住我話想恰幾個字, 哈哈, 咁就過完最後一晚了!! 呢隻狗好乖架, 不過我怕狗唔敢行埋去! 條裙係希臘買架~ 第一次騎驢仔~ 黑色沙既沙灘 Oia既日落

希臘之旅第七天 - Fira to Oia

今日終於起到身睇日出, 因為好方便, 走過對面就睇到了, 一起身廁所都冇去, 冇刷牙洗面, 就咁著件褸就跑出去了!! 睇日出都幾辛苦, 一黎眼瞓, 二黎又凍, 我都係鍾意睇日落多d!! 睇完後返去再瞓, 瞓醒佢地煮好早餐, 係薯蓉+腸仔, 全部都係係度買的!! 食完影下相hea下, 等到十二點就有架小巴黎接我地去最後一個目的地Oia了!!

呢架小巴係我琴日用sms同屋主book的, 要坐半個鐘左右先去到Oia, 呢個係我第二期待既地方!! 落車後要行一段好難行既路, 仲要沿路都好多貓狗同地雷, 天氣又熱, 都幾辛苦, 到達我地間屋了, 果然同睇相既一樣, 冇呃人, 佢地個apartment係好靚好大間, 反而我同lou樓上既studio就好細間!

放低行李就出去搵食同行街了, 頭先行黎時經過一間叫blue sky既餐廳, 帶路個男人話呢間正, 我地就幫襯了, 都唔錯, 係間店太多烏蠅!! 食完後周圍行, 呢度同米島好唔同, 冇咁多藍色, 我地三個女仔竟然買到衫, 我個件係好夏天白色裙, made in italy, 因為呢度個太陽太勁喇, 我全部都係冬天衫, 34.5歐, 有少少爆線, 所以27歐成交了, 嘻嘻!! 去到第二間, 又買多一條裙, lou就買左對拖鞋, 加埋都差唔多八十歐, 好貴呀!!

買完野返去hea, 大家都換左新衫影相, 越影越high, 最後好似model咁影影影, 哈哈, d鬼佬見到我地以為搞乜鬼添!! 影完都日落了, 唯有聽日先出去睇日落啦!!

晚餐又係自己煮, 又係呢度買意粉, 仲有表妹自製既greek salad, 阿lou好鍾意食greek salad, 真係餐餐食都唔厭咁!! 夜晚冇咩做, 我同lou飲beer同睇星星, 我地個studio最正就係個view, 係個細露台度睇星同海, 好爽!!

屋主兩個女

黎到oia喇, 我地studio既廁所, 其實沖涼掂到個地都幾凍冰冰架~

我地住既屋呀, 我地上層, 團友們下層~

對住個愛琴海

希臘之旅第六天 - Mykonos to Santorini

最後一日係米島了, 阿lou晨早起身想睇日出, 不過團友們都出左去了, 佢唯有係屋附近睇同埋影相, 早餐係炒烏冬, 食完野我地出去再行多次!!

呢度個海好多海膽架, 唔知點解冇人拎, 我地行過時, 阿lou忍唔住要捉隻上黎玩, 好過癮呀, 真係有d想食左佢, 不過玩完都係放返落海, 唔好失禮中國人喇!! 去左間麵飽鋪買飽當lunch食, 之後返去拎埋行李, 就去碼頭坐船了!!

呢隻係快船, 又係一早book的, 點知等左好耐隻船先到, 今日又係曬到死, 等到我地傻下傻下, 食左暈浪丸, 原來隻葯係超眼瞓的, 上到船瞓到死左, 兩粒幾鐘船好快就過, 到達我地最後一個島,
Santorini(聖島)!!

聖島我地會住兩個地方, 首先既係Fira(費拉), 會住一晚, book左間叫villa Irini, 我地落船後諗住坐巴士, 點知d人話冇巴士了, 我地焗住坐的士, 到達villa Irini後, 覺得個景好正呀, 又係對住個海, 不過呢度都幾偏僻同大風, 我地行去超市行左四個字, 好攰, 買完餸後行返去, 都趕唔切睇日落, 唯有是但係街邊睇, 不過真係好大風呢!!

返到去晚餐係炒公仔麵同湯, 好好味!! 呢度係兩間人一間studio, 我地既第一間洞穴屋呢, 床仲有蚊帳, 幾好feel, 哈哈, 唯一缺點係上唔到網, 搞到夜晚冇乜野做, 唯有過d相落手指, 之後叫醒lou一齊睇星星, 但係太大風喇, 都係瞓覺算了!!

呢度勁多海膽, 但冇人會拎架, 雖然好想拎, 但係唔可以失禮, 影張相算喇!

中間藍色個度就係我地住個度喇!

再見喇, Mykonos~

黎到Fira住既地方, 冇人架~

終於可以住洞穴屋, 原來好暖架~

房出面

希臘之旅第五天 - Mykonos

原定米島留三日兩夜, 而家搞到得返兩日兩夜, 今日未瞓醒就俾阿lou偷影, 佢一早起身周圍影相了, 之後就食早餐, 呢度有廚房, 可以自己煮野食, 我地帶左餐肉同公仔麵, 琴晚又買左蛋, 呢餐就係餐肉炒蛋同炒公仔麵, 食完早餐又影影影, 呢度實在係太靚喇!!

差唔多中午, 我地出發去沙灘, 係屋主個女zoi介紹的Psarou beach, 不過要坐的士去, 返黎又要call的士, 今日天氣好好, 去到沙灘見到有間沙灘酒店, 好多人係度曬太陽, 游水就冇人, 因為d水好凍的, 我地除晒鞋又狂影相, d水好清, 我真係n年冇去過沙灘喇, 香港既沙灘實在係太dirty, 呢度真係差好遠呢!! 係沙灘留左個零鐘就走了, 坐返的士返去, 我同lou又要返屋幫相機叉電先, 佢地就去town centre迷路去, 迷路係旅程之一, 因為呢度一定迷路, 而亦都係一種樂趣!!

叉完電後到我地兩個去迷路了, 竟然俾我地搵到間相機鋪, 買左部canon ixus 95is, 180歐, 應該貴過香港, 不過冇辦法啦, 我地仲專登揀藍色襯返希臘, 當做個留念, 呵呵!! 有新相機後可以盡情影喇, 仲有去迷路, 睇風車, 之後趕返屋睇日落, 好可惜我地得一日係度睇日落, 呢度個露台真係超正的!!

睇完日落又出去搵食, 大家決定豪一餐, 今晚食餐貴既, 走左去little venice搵食, 有間餐廳好落力sell, 仲要講晒中文咁, 乜都話"豪may", 哈哈, 唯有幫襯佢啦!! 叫左一堆海鮮, 埋單175歐, 每人大約港紙三百蚊, 都算抵呀!! 食飽就返去了, 最後一晚係度了, 真係好唔捨得, 所以我話...一定要再黎呀!!

原來日頭係超靚架, 呢間係我地住既studio

同團友們一齊早餐

沙灘, d水係冰凍架

終於買左新相機, 即刻試影, 路人甲走黎搶鏡

推介住呢度 - Marina View

寫意既生活

最貴既一餐

希臘之旅第四天 - Athens to Mykonos

話咁快就要離開雅典了, 下一個目的地係Mykonos(米島), 之前諗住坐船去,點知今日冇船, 唯有俾多d錢坐飛機, 同埋快d到啦, 點知一早book晒機票, 早兩日睇一睇email, 原來班機delay八個鐘, 改左夜晚, 搞到我地臨時改行程, 今日食完早餐, check-out埋, 就坐metro去Piraeus(皮瑞斯港), 如果坐船就一定會經呢個港口, 我地唔坐都到此一遊!!

呢度既星期日真係好唔同, 所有鋪頭都唔開門, 成條街死城咁, 我地行下行下見到一個偏僻地方, 有d地攤, 就走去行, 點知d人全部似係南亞人, 仲要有d恐怖, 行左陣驚驚地我地就調頭走了! 之後坐返metro去酒店附近, 終於搵到間快餐店係有開, 就係度食埋最後一餐了!!

食飽後拎埋行李, 又坐返metro去機場, 我地早左幾粒鐘到, check-in後仲有大把時間剩, 就係間cafe坐低上網同玩紙牌大富翁, 又幾好玩喎!!

夠鐘上機了, 架機都幾細,我地坐二十分鐘就會到, 結果有一次難忘既飛機旅程, 首先第一次坐咁短程既飛機, 另外一起飛, d空姐就好急咁派飽同野飲, 急既程度係差唔多拋過黎, 成架機已經好少人, 得十幾個, 唔知多人d佢地會點呢!! 我地搭既時間係差唔多日落, 亦可以睇日落, 同埋成個希臘之旅戲肉就係島, 我地都好期待, 一路搭一路睇下d島, 藍白色小屋, 真係好興奮!!

終於到達米島機場, 勁細, 不過都幾搞笑!! 出機場後我地就搭的士去book左既marina views, 呢間屋係我最期待既一間, 係文西介紹的, book個陣搞左好耐, 好彩最後都成功book到, 我同lou會住deluxe studio, 佢地四個就住apartment, 一落的士個屋主帶我地睇屋, 見到佢地個間, 好大呀, 可以坐係窗邊睇日落, 好好feel, 之後到我同lou間studio, 嘩...個露台超大超正呀, 我地癲晒咁大叫, 個屋主見到我地都好好笑, 我地仲嘈晒話要間airlines賠返半日俾我地呀!!!

放低行李後, 就行去town centre買餸同醫肚, 好靚呀, 呢度d屋仔多數都係藍色同白色, 天黑左都好靚, 好期待聽日天光會係點, 我地既第一餐就去左間好細既意大利快餐店食pizza同pasta, 點知好多pasta都辣的, 害我要再叫過!!

食飽再去左間士多買野飲同雞蛋, 聽日可以自己煮野食喇, 好期待日頭既米島呢!!

冇得搭船都影張相

終於上機喇

黎到門口已經好興奮

希臘之旅第三天 - Athens

今日起身就落樓下食酒店既免費早餐, 個地方幾靚, d野食比我想像中好, 係稍為咸左d! 食完早餐就搭metro去衞城, 其實我地可以行去, 不過有3-day ticket當然用盡佢, 同埋聽講個站有好多像的,要去睇下!!

出metro後原來要行好多路, 去衞城係要上山的, 都幾辛苦, 不過沿路影下相會好過d, 只係天氣太熱太曬, 影相都有難度! 終於上到黎神殿, 其實都唔知邊個殿打邊個殿, 都係要睇書先知, 今日都算幾多人, 復活假真係唔同d! 行完衞城我地落返山, 搵左間cafe食飯, 叫左d pasta, 都幾好味喎, 我部相機又開始壞, 上次去泰國又係咁震, 返到hk又冇事, 點知而家黎希臘又震, 真係激死我!!

食完野佢地繼續行, 我同阿lou返酒店幫相機叉電, 希望叉完好d啦, 今日都影左好多相, 可能部機太攰喇!! 我地約左五點半係metro站等, 有時間剩就同lou兩個出去行了, 終於都有兩個人獨處既時候, 哈哈!!

之後既節目就係上山頂, 聽聞呢度係athens最高既山, 不過athens都冇乜山, 連高樓大廈都冇乜, 我地出完站又要上山, 搵到個纜車站, 買左飛就搭纜車上山頂了, 上到黎都幾多人, 霸定個好位睇日落, 第一次係希臘睇日落呢!!

睇完日落搭返攬車落山, 又行一堆路, 沿路都冇相機鋪, 想買新都唔得, 都唔記得行左幾耐, 仲以為迷路, 之後行到去憲法廣場, 即係琴日黎過既地方, 終於認得路, 我地去左m記食野, 食飽就返去lu!