我的第五個姪女

我第五個姪女係6月30日出世喇, 佢預產期係27號架, 當日見紅後入左醫院, 點知幾日都未有動靜, 醫院仲話30號再冇動靜就要催生, 我估唔到公立醫院都會幫人催生的!!

好多人問係咪五個都係女, 係呀, 我五個都係姪女, 一個姪仔都冇, 屋企有三個阿哥, 大哥二哥各兩個女, 今次呢個係三哥, 點知都係女, 我屋企咁傳統當然好想要個仔啦, 不過有時呢d野真係整定架嘛, 我自己都鍾意女, 不過我記得有幾個睇相佬都話我雖然鍾意女, 但係生既會係仔, 嗚嗚~

幾位阿嫂既生仔經驗, 基本乜都有, 大嫂試過公立醫院開刀同埋私家醫院開刀, 二嫂係公立醫院順產同埋私家醫院開刀, 今次三嫂係政府醫院順產, 其實聽二嫂講完, 我都係諗住私家醫院開刀的, 因為我實在係太怕痛, 佢話兩樣都試過, 都係開刀舒服d, 而大嫂就話佢兩次開刀都唔同, 生完之後係公立醫院係痛d, 細問之下原來係私家醫院之後幫你吊既鹽水係有止痛藥, 但係....公立醫院又唔可以俾你揀開刀, 私家醫院又貴100倍, 真係好難諗呀, 不過我都同左男友講, 要生仔就要儲定筆錢去私家醫院生, 仲要諗定生完出黎邊個湊添呀!!

今次第一次見細姪女, 好好笑呀, 我三嫂用杯餵奶, 佢話d護士話如果俾bb用慣奶樽, 就會唔識食人奶, 真係未聽過呀, 佢用杯食奶食到嗒嗒聲架! 同埋通常見第一日出世既bb都未開眼, 但係佢第一日就開左眼, 真係好勁呀, 手指又長, 眼珠又大, 我覺得佢第時會好靚女, 仲有我好少抱bb架, 因為抱襯d bb都會掙扎同埋喊, 但係今次冇呀, 佢熟係我手中熟睡添呀, 呵呵!