踏入一歲後, 首先當然係打支一歲針先, 聽聞呢支針好勁, 尤其政府新加左支水痘, 真係十個有九個都會發燒出疹! 而我女都唔例外, 打完即晚冇事, 仲以為走得甩, 點知成個星期後先開始發燒, 十日出疹, 好彩只係輕微, 睇住好多BB都高燒幾日, 真係陰公!
一歲之後, 阿女好似唔同晒咁, 佢之前食野明明好好, 唔扭計, 會追食, 一直覺得阿女呢方面唔錯, 點知打完支針後開始變晒, 又唔肯食, 又會LUR野, 食一陣又唔肯再食, 但又唔係飽喎, 真係晚晚食飯都要鬧一輪先得, 一餐飯又要分幾次食, 好鬼煩~
 |
| 健康院叫買煮飯仔俾阿女玩 |
呢個月我地去左樓下幼稚園既OPEN DAY, 阿女都唔太抗拒外國人, 之前佢見到我鬼佬老細好驚架, 哈哈, 可能有得玩係唔同D!
食野方面, 我地仲去左食放題, 又去左元氣壽司新幹線, 即係火車軌送壽司個度, 不過阿女未係好興奮! 帶阿女食放題都幾抵呀, 兩個人價錢, 三個人食, 佢仲食左好多野添!
阿女一歲當日影既相有了, 影得幾好, 搞到我地失守了, 明明婚紗相都忍到唔加相, 點知阿女D相真係加錢加到傻, 當係送俾佢一歲既生日禮物啦!
由於而家我地唔俾姐姐落街買餸, 所以阿女都冇得落街了, 唯有晚飯後帶佢落樓下商場行, 順便當下親子活動, 就快成個商場既人都認得佢喇, 哈哈!
