湊女生活 - 八個月

由於阿女開始識行, 我地要俾個歡樂天地佢喇, 之前有諗過買韓國個D圍欄地墊, 但真係太貴喇, 所以最後都係淘寶算, 平幾倍, 仲可以揀自己鍾意既顏色! ^^

除左歡樂天地, 仲有個小型波波池, 搞到我地屋企兩個廳都冇晒位, 而阿女亦都唔多鍾意個波波池, 所以, 我地好快就會拆左佢架喇! >.<

阿女頭髮長得好快呀, 姐姐開始同佢玩下髮型, 平時男仔頭既佢, 打扮下都似返個女仔架, 哈哈!

今個月食固體進步神速, 仲大食左好多添, 我地開始加好多野俾佢, 佢都越食越多, 越食越快, 好快已經代到兩餐奶喇!

阿女食固體好當然開心, 亦好好彩暫時未發現佢有咩食物敏感, 不過就真係好污糟, 佢又鍾意用手玩飯, 之後捽頭捽面, 嘩, 清潔得好辛苦呢!

呢個月都好忙呀, 因為係我生日, 又係母親節, 仲有阿女第一次出席飲宴, 節目好豐富! 不過下半個月慘既係我病左, 係屋企都盡量避免同佢近距離接觸, 而好好彩都冇傳染俾佢!

BB大得真係好快呀, 阿女已經唔再係BB喇, 越大越百厭同難控制, 真係唔捨得佢咁快大呢!