入院生B - 第三天

2014年10月1日

今日係公眾假期, 老公放假, 另外佢公司有3日侍產假, 加埋呢兩日紅日, 佢可以陪我幾日! 晨早七點佢就黎了, 真係仲早過返工!

咁早黎因為佢要扶我落床, 琴晚我好聽話, 不停郁動雙腳同腰, 我聽過好多人講落床係勁痛, 而我又覺得唔係好痛咋喎, 要痛琴晚郁既時候都痛晒, 哈哈!

雖然落得床, 但都未行得住, 所以都係靠老公影相我睇, 不過下晝就可以抱BB喇, 胡醫生叫我四點個轉可以試下去餵BB!

其實我想試下醫院既飯, 睇MENU佢D菜式好吸引, 呢度係食素, 但MENU可以有肉, 姑娘話D肉都係素, 但做得好似, 同埋都OK, 所以好想試下呢, 不過阿媽每日都拎兩餐飯俾我, 所以冇機會試了!

終於等到四點, 可以慢慢行去餵奶, 行係真係有D痛, 姑娘叫我地影左全家幅先, 所以老公都可以一齊掂下BB了, 私家醫院生就呢樣唔好, 老公唔係成日可以抱BB, 除非你俾錢, 每日都有親子時間, 即係爸爸同BB除衫抱下, 不過我地都唔會洗呢D錢!

終於第一次抱BB喇, 感覺好特別, 真係唔相信佢係我個女, 姑娘除左用醫院相機, 仲會用我地相機幫我地影, 好開心!

影完後我就試下去餵奶, 老公就出去食野了!!

平時抱人地既BB都會好雞手鴨腳同埋好驚, 唔知點解對住自己個女又冇喎, 姑娘要我地試餵人奶先可以補奶粉, 當然我未咁快上奶, 俾佢啜每邊十分鐘就算了!

在場媽媽好多都同我一樣, 一來唔識, 二來未有奶, 三來係BB會瞓著, 大家都好迷茫, 姑娘又好忙, 呢兩日真係勁多人生, 餵奶房又熱又迫!

俾BB啜完就問姑娘攞奶水, 醫院唔係用奶粉沖水, 係一支支沖好晒既奶水, 如果要買成幾十蚊支架! 餵完後仲要幫BB掃風, 之前聽講座已經學左掃風, 所以都叫識了, 只係唔知幾時先叫掃完!

掃完後就抱返BB返床, 做返紀錄, 餵左每邊十分鐘人奶(其實只係啜空氣)+45ML既奶水, 之後姑娘會教換片, MARK返有冇大小便, 之後就走得了!

港安既餵奶時間係8:00, 12:00, 16:00, 20:00, 我16:00餵完後, 20:00都有再去, 都係好多人呀!

返房老公已經係度, 原來我都搞左成個鐘, 好開心咁同老公一齊睇相, 佢今晚又陪我到十點先走喇!

BB好合作咁笑呀!