入院生B - 第二天(上)

2014年9月30日  38W1D

雖然較左6:15鬧鐘, 但成晚瞓好差, 所以都係一早醒左, 梳洗完後, 老公話佢已到左, 醫院7:00先俾探病, 不過我都叫左佢入黎, 冇姑娘見到其實都OK既!

換好手術袍就等人帶我去手術室, 老公都被帶去穿袍! 我係瞓係度被推去搭電梯上去, 再入手術室, 其實以前做手術都係咁, 不過今次真係驚好多!

麻醉師首先同我打招呼同講下麻醉過程, 之後就推我入手術室了, 我不停同佢講我好怕痛架, 好驚呀等等, 仲有就係.....好肚餓, 哈哈, 呢三個字我由未生到生完出黎一直講梗, D姑娘就笑我咁為食, 可惜未咁快食得野住呀!

麻醉師幫我種豆, 嘩, 我覺得佢手勢真係差, 因為係好鬼痛, 我以前種過都冇咁痛架, 最慘係痛足一日一夜仲痛梗, 條疤到而家仲未退!

之後到半身麻醉, 要打側身捲埋身俾佢打, 我聽過呢針係好痛, 我覺得比起種豆反而冇咁痛, 不過有唔舒服感覺就真, 之後開始下半身就冇感覺, 要佢地幫我轉返身, 之後佢地竟然要我打開雙手再搵野扣住, 話驚我手術期間對手亂郁整到個肚喎, 我覺得自己好似被釘十字架咁, 感覺好難受!

見到胡醫生了, 因為我入院係揀左麻醉後插尿喉, 正常要加$500, 如果胡醫生幫我就唔駛錢, 所以一入到去我不停叫佢地唔好幫我插, 要等胡醫生黎, 哈哈, 佢地係咁笑我清醒, 仲識計呢D數, 我話成5舊水架, 你地唔好亂黎!

佢地會用塊布遮住我下半身, 好快手術開始了, 做梗手術期間老公先入黎, 我仲同佢講, 做梗喇, 佢好驚訝咁話: 下? 做梗架喇?

一路聽到D吸野聲, 當然仲有我下半身不停被拉扯既感覺, 雖然係唔痛, 但.......真係感覺好辛苦, 雙手又被扣住, 好攰, 唔知係麻醉葯定係我真係驚, 成個過程全身都係震得好勁, 好驚會震到影響到個手術!

我依然係度叫梗肚餓, 過左幾分鐘, 麻醉師話會幫手推BB出黎, 之後胡醫生話BB出黎喇, 我地仲呆梗, 一兩秒後聽到BB好大聲咁喊, 個一刻個感覺好特別, 我唔識形容, 真係好似發梗夢咁, 我做左人阿媽喇!!

胡醫生同D姑娘不停講, BB好肥呀, 好多頭髮呀, 之後抱左去整理, 我同老公講, 大鑊喇, 佢把聲咁響亮, 之後唔駛瞓喇!

整理完後姑娘就抱黎我地身邊, 我第一句係話, 好醜樣呀, 姑娘再幫我地影下相, 老公就出去了, 而我就留係度聯針!

原來老公去左剪臍帶, 聯針期間聽到佢地講梗佔中, 大約10分鐘就搞掂, 推左我出去一個位呆等, 話要觀察喎, 搞掂晒後先推返我入房!