又一年了, 上年有好多事回顧, 今年唔算多, 但係就非常重要, 因為我做左人媽媽!
年頭開始發現有BB, 之後既日子都係產檢, 有妊娠糖尿後要控制飲食, KEEP住篤手指, 經常既腳腫, 所以去多左腳底按摩!
除左呢D, 當然仲有搜羅BB野, 好彩身邊有好多軍師, 仲有贊助商, 我好多野都唔駛買, 又有人教路邊度買平, 邊D好等等, 仲去第一次去既BB展, 籮咁大個肚去真係好辛苦!
頭大半年既日子都大致都係咁, 到後三個月個女出左世, 一切又唔同晒!
首先坐月已經被困家中, 係屋企忙到天昏地暗, 都冇時間去睇佔中既新聞, 剩係知道每日都有好多人係度鬧, 亦有好多朋友因為呢件事unfriend大家, 不過我真係完全冇時間理!
琴日個女三個月大了, 呢三個月真係好辛苦, 每日只有三四個鐘睡眠時間, 其實我已經好輕鬆, 老公都幫左好多, 如果唔泵奶, 應該會多返好多時間!
下一年....應該話之後既好多年, 都會係圍繞住個女, 終於感受到媽媽既偉大喇!
新一年個女會開始食固體, 學爬學行, 學講野, 仲要開始諗讀幼稚園既野, 希望事事都會順利!
No comments:
Post a Comment