第十一次產檢 - 胡醫生

2014年9月23日  37W1D

政府產檢後, 走左去按腳, 因為我成個孕期都成日腳腫, 老公叫我臨生前按多D, 生完有排坐監!

下晝到私家, 最後一次了, 老公有陪我黎, 胡醫生既產檢, 老公都有陪足!

同胡醫生講返政府幫我驗左B鏈, 冇問題, 之後睇下BB, 佢話BB個面仔好肥呀, 再計一計, 而家7磅多少少了, 叫我放產假都唔好瞓咁多, 食完野要行下, 唔好俾BB咁肥, 咁預計下星期BB出世都係7磅幾, 如果等40週就會8磅幾架喇!

我再問下胡醫生開刀第一日係咪唔食得野, 佢話可以食粥水, 另外代謝病大約$1100, 入院時要同姑娘講, 最後胡醫生話: 咁我地醫院見喇!

真係好緊張呀, 呢幾晚開始失眠, 夜晚同老公係度睇電視, 又會講遲D我地冇咁悠閒可以係度嘆電視喇, 得返一星期, 新生活就會開始, 希望我唔會荒廢呢個BLOG啦!

第八次政府產檢 - QE

2014年9月23日  37W1D

最後一次產檢, 政府私家同一日, 好忙呢!

先講私家, 時間係10:30, 今次蛋白尿pass, 唔駛又不停驗! 咁多次產檢, 今次係最多人, 多到幾乎冇位坐, 真係好誇!

等到見醫生, 循例聽心跳, 醫生摸下肚, 今次摸埋恥骨位, 佢話bb隨時出世, 叫我留意住, 如果bb郁少左都要即刻黎, 我都唔好意思講其實我會去私家生!

之後睇血糖功課, 只係有2次超標, 醫生冇乜話我, 都係叫我留意下, 同埋要抽血, 下星期再返黎, 睇下係咪要催生, 但其實我下星期都生了!

本來想唔抽血, 唔排期就走, 最後都係做足晒先離開, 唔知幾時先會返黎了!

產前講座 - Baby親子雜誌

呢個真係我臨生前最後一個講座喇, 連幾時報都唔記得, 見佢禮品幾吸引就報左了!

我冇copy低講座資料, 不過同呢個十月既一樣, 只係日子係9月17日, 時間地點內容同禮品都完全一樣!

我同老公遲左差唔多半個鐘先到, d位幾舒服, 同我上次去科學館差唔多, 頭一part內容都聽過好多次, 加上我地遲到, 都唔係聽左好耐, 同埋冇乜心機聽!

第二part講疫苗係冇聽過, 雖然我都join左疫苗plan, 不過聽下都好, 叫做有d認識!

最後係抽奬, 有三份架, 不過我抽唔到, 如果抽到就正喇, 有排唔駛買洗衣液!

講座比預期早左完, 所以我地黎左一個鐘都冇就走得, 禮品都唔差呀, 竟然有mides手套2對, 連價錢牌都冇撕, 2對加埋成舊水架!

第十次產檢 - 胡醫生

2014年9月16日  36W1D

仲有兩星期就開刀喇, 今日又見胡醫生, 一星期睇一次bb有幾重, 今次都唔係重好多, 今次有3kg, 比上星期多左唔算好多, 之前有人話一星期重1磅, 嚇得我丫!

之後胡醫生例牌話下我d血糖功課, 仲叫我剩係飲水好喇, 唔係卦...........

胡醫生再寫左入院紙俾我, 話有乜事拎住張紙入院就得, 仲要帶返驗血報告, 如果有咩緊急開刀, 佢都唔會另外收費, 醫院就睇時段收, 希望唔會發生啦!

以為今次係最後一次覆診, 點知佢話最好下星期見多次, 呢個月睇三次喇, 真係睇到窮呢!!

第七次政府產檢 - QE

2014年9月11日  35W 3D

連續兩日既QE之旅, 大熱天時, 又咁大個肚, 都咪話唔辛苦!

之前衰左兩次蛋白尿, 到上次又冇事, 點知今日又衰過, 又要留小便, 真係好鬼煩, 都就快生, 有少少想一走了之唔理佢!

又係等左一粒鐘左右, 一入到去姑娘話今日驗埋B鏈, 嘩, 咁突然既? 我仲諗住佢會安排下次驗, 咁我下次唔黎, 點知無端端今日話驗, 唯有俾佢驗, 我太緊張, 係咁叫佢輕手D, 姑娘都好好, 佢話冇乜野之嘛, 哈哈!

驗B鏈其實只係用佢支好長既棉花棒, 係陰道口同PAT位攞D分泌物去驗, 睇下你有冇呢隻菌, 當然如果開刀其實有冇都冇所謂, 不過我又冇講會開刀, 所以唯有俾佢驗, 好彩唔痛!

搞掂後見醫生, 又係交功課時候, 佢話我血糖功課麻麻, 好易超標, 我都唔明點解食3件PIZZA都已經嚴重超標, 佢話我好大機會38W要提早催生, 兩星期後返黎再睇, 之後就走了!

其實我已經BOOK左38W開刀, 仲諗梗會唔會返黎睇呢!

政府超聲波檢查 - QE

2014年9月10日  35W 2D

本身約左聽日政府產檢, 但早兩日QE突然打黎叫我今日返去照超聲波先, 照完先聽日見醫生, 結果我又要請假了!

正常政府產檢唔會照超聲波, 主要係OSCAR同結構先俾你照, 仲有就係好似我咁有妊娠糖尿, 佢要睇下BB比正常大幾多!

今次都係好多人, 大約等左一粒鐘先到我, 不過今次唔知姑娘定醫生, 態度好好多, 佢話剩係幫我照, 聽日醫生會同我講報告!

照完後我問BB幾重, 佢話2.86公斤, 上星期胡醫生度照有2.6公斤, 一星期重0.26公斤, 唔知係咪算標準呢?

篤手指的生活

自從有妊娠糖尿, 就開始篤手指既生活, 到而家有6星期了, 醫院叫每星期篤一至兩日, 每日4次, 而我都好聽話既, 加上老公都開始好管我呢樣野, 冇得唔聽!

其實篤手指唔係想像中咁可怕, 我仲覺得好得意, 每次都好想知道究竟呢餐會唔會超標呢? 好多時結果都係出人意表, 你覺得唔會超標, 就會超標, 你以為一定超標, 反而又冇事喎!

最誇張係同老公兩個人食一個麥記雙層芝士孖寶餐, 真係每樣都只食一半, 竟然有7.8, 算係超標, 但係有晚食完飯再食雪糕呢, 又冇事喎!

經醫院信買部血糖機好平, 只需$300, 包50張試紙同100支針, 試紙都唔平呀, 如果再買要$200左右50張, 每日4次既話, 其實我只可以篤12.5日, 不過有時我一日只食兩餐, 勉強叫篤到14日!

最近發現部機有d問題, 可能係試紙問題, 沾完血冇反應, 仲話我唔夠血, 搞到我要用過張新既, 幾次都係咁, 時得時唔得!

早兩日打去問, 佢叫我去維修站睇, 如果有問題會即時換過俾我, 上到去, 真係一肚氣, 佢問我沾血方法, 我話咪篤完用張紙去掂d血囉, 佢問我打橫定打直定打斜, 其實我真係冇為意, 但一定唔係打直, 佢就話我錯, 係應該打直, 我話醫院姑娘都冇咁話一定要打直喎, 佢話醫院姑娘都錯, 我見佢係睇過說明書, 再咁樣答我, 佢用左我一張試紙試, 又冇事喎, 之後就話係我用錯方法, 所以冇得換, 我完全覺得俾人耍咁!

返到屋企即刻拎本說明書睇, 都冇話一定要打直, 而且佢張圖片係打斜方式吸血, 真係越諗越嬲, 加上唔知係咪賀爾蒙影響, 越黎越燥底, 決定第二日再打去嘈!

佢地既售後服務認真麻麻, 個hotline係長期冇人聽, 再飛落錄音度, 錄左係冇人覆, 打去總代理, 不停叫我打其他電話, 但其他電話都係冇人聽+錄音的, 最後.......終於有人聽了, 有人肯跟進!

我成件事解釋一次啦, 我大住個肚, 專登走上去維修站, 佢好似耍我咁, 又話我錯又話姑娘錯, 但其實說明書都係咁教, 同埋我已經用左個半月, 如果錯點解頭一個月又冇問題呢? 最後個女仔都好好, 佢問我用剩幾多張, 佢肯換過新既俾我, 但我已經講明唔會再上返上次個間維修站, 佢會安排第二間俾我去攞貨!

希望換完貨會冇問題啦, 我都估唔到臨生前會發生呢d小風波, 大住個肚咁樣周圍走其實都好辛苦架!

第九次產檢 - 胡醫生

2014年9月1 日  34W

提早開始2星期一次產檢, 即是又要洗多d錢!

今日交功課俾醫生, 由於呢兩日都有超標, 好驚佢鬧我, 不過佢又冇, 其實我食d野都冇諗過會超標, 我諗佢都好無奈, 唯有再努力d, 辛苦多4星期!

問醫生如果早產, 我應該去政府定私家, 佢話其實過左34w, 去私家都ok架喇, 當然政府設備完善d, 未夠32w就一定係政府!

到好緊張時刻, 就係睇bb, 緊張在我好想知佢重左幾多, d人話一星期會重一磅, 我上次黎係2kg, 即係4.4磅, 好鬼驚今次真係有6磅幾, 好彩係2.6kg, 唔夠6磅, 都係超重, 不過比想像中好, 好彩我揀左開刀, 如果順產, 咁大個真係好辛苦!

有朋友下星期預產, bb同我而家一樣重, 佢醫生預計出世會6磅幾, 2星期後我又再返黎睇下bb幾重喇!

34W準備好物品

踏入34W了, 由於怕早產, 近期開turbo搞掂晒所有野, 基本上都叫買齊野, 仲已經準備好炒米茶, 執好半個走佬袋, 另外一半用品仲用梗, 未執得住!

好多朋友問我地要乜, 其實我地真係準備好晒, 已經有好多物資有朋友俾, 加埋媽媽會, 講座禮品, 真係冇咩需要再買, 或者都要等BB出左世先知!

數下屋企既尿片, 未計BB展訂既, 都已經好多, 都係朋友俾, 或者係禮品, 我諗有排都未駛買尿片住!

再數下沖涼洗頭液, 又係有好多, 除左有支連奶樽SET一齊買, 其他都係sample, 朋友話其實每次沖涼滴幾滴, 一支真係有排用, 我諗又係短時間唔駛再買, 希望bb唔會敏感啦!

之後就係body lotion, 面霜, patpat膏等等, 又係全部sample, 陪月叫我地買凡士林, 我地仲諗梗買唔買好!