新屋煮煮煮

搬黎新屋個半月, 其實都煮左好多餐飯, 因為同自己講過, 搬左要煮多d, 洗少d錢又健康d, 不過暫時都仲係學習階段, 而且放工返黎己經七點幾, 煮埋飯都八九點, 希望不久將來可以快快手煮到一餐!!

首先係放工回家既快手餸:

娃娃菜+煎台灣腸 - 呢個真係勁求其, 雪櫃有娃娃菜剩, 又有台灣腸, 夾硬地放埋一齊!

瑤柱蒸水蛋 - 呢個又係老公成日叫我整而我又唔肯整既餸, d蛋好似豆腐花咁滑架, 網上太多唔同食譜, 尤其係蛋同水份量, 仲有咩火蒸, 先蒸碟水滾再倒蛋汁, 包保鮮紙等等, 我太懶冇跟足呀, 只係蛋:水=1:1.5, 水滾係成碟蛋汁放蒸架, 冇包保鮮紙, 再轉細火蒸4-5分鐘, 熄火焗多幾分鐘(冇限定, 只係搞埋第二碟餸), 不過呢個方法係用鑊蒸, 試過用煲湯煲蒸係要耐d時間既!
p.s. 用瑤柱水蒸, 連豉油都唔駛落!

真係似豆腐花多過蛋 ^o^

光波蜜糖雞翼 - 如之前講, 光波爐整既野係正過焗爐, 真係好易就外脆肉軟, 我地之前好低能呀, 買左bbq個d蜜糖返黎, 點知好水架, 仲要俾我發現過左期成年, 不過又食我地唔死, 之後我掉左, 用左沖蜜糖水既蜜糖黎整, 係正好多!!

中式牛柳
細個好鍾意食架, 同屋企出襯街食阿媽都會叫俾我, 所以想試下自己煮, 個汁係自己調出黎, 我冇買ok汁, 唔想為一個餸而買一支野返黎, 不過調出黎都似係街食, 只係d牛柳唔知點解都係咁韌, 我已經有拍鬆, 唔通真係要用梳打粉先得?

之後都係光波爐傑作

蒜蓉牛油焗青口 - 鍾意食海鮮既我, 當然都會鍾意青口, 又係冰箱存貨, 加蒜蓉牛油就得, 最近買左麵包糠, 所以加埋上面, 係好食d既!

雞翼肉丸扁意粉
雞翼同肉丸唔駛講, 至於意粉, 有朋友講過想減肥就食意粉, 所以我想食多d, 但傳統意粉由細食到大有d厭, 近年就轉左買扁意粉! 前排去delifrance食野, 佢個意粉係冇汁既, 只有蒜蓉+黑醋, 老公好鍾意, 所以呢個意粉都係就咁搵蒜蓉炒完上碟, 再放支黑醋等老公自己落, 佢真係幾鍾意吃醋的, 哈哈!!