裝修Day35 - 鋪磚

不知不覺都一個月有多, 中秋節老公放工, 黎左我公司拎埋淘返黎既野上新屋, 之前淘個轉d野太重, 所以叫左二哥幫我車!!

上到去廳已經鋪好晒木紋磚, 之前一直太擔心會好深色, 原來鋪出黎又唔深喎, 係我鍾意既灰色呀, 好開心!!

廁所都鋪好晒喇, 不過暫時未睇到個效果, 等埋鏡櫃, 浴屏個d就睇到架喇!!

裝修Day29 - 批牆

今晚去開二哥屋企食飯, 就順便上埋新屋睇!

相差幾日, 已經剷晒牆, 冇晒五顏六色既感覺!

我放左相上fb, 原來好多人以為個彩色屋係已經裝修好, 仲話好奇怪點解我會搞成咁, 哈哈!!

主人房

細房

企缸

廚房用左黎放野, 呢d係門框同門黎架!

本身既大門仲未掉

淘燈

一連幾篇淘寶野, 今篇都唔例外, 而今次淘既係房燈!

由於廳燈係香港買, 係花花燈, 貴左少少, 所以房燈要揀返d簡單同平既款!

係香港睇中左飛利蒲既燈, 差d就買左架喇, 點知上淘寶睇, 原來係平好多架, 就算計埋運費都係平過香港買, 不過就要自己裝, 我有師傅裝所以冇呢個問題!!

兩盞都係LED, 因為我地唔想太熱, 但LED係貴D架, 同埋冇得換, 一壞就冇架喇, 一係就拎返廠, 不過LED好襟既, 通常壞火牛都唔會燒膽!!

主人房(即係我地間房)燈我地揀左LED射燈, 可以較光暗同調方向, 香港賣成$18XX, 淘寶$8XX就有喇, 我覺得呢款太有情調, 哈哈!!

而另一間房我地就揀左最簡單既款, 香港$650, 淘寶$1XX, 真係平得過份!!

收貨後包裝好好, 都唔似係假野, 而計返運費同兌返人仔, 兩盞加埋大約$1400, 慳左成千蚊有多呀!!

主人房燈

細房燈

淘門配件

淘開有條癮, 當然繼續淘其他野, 師傅叫我買門既配件, 出過旺角睇, 款式真係間間差唔多, display出黎既仲要似擺左十幾廿年咁, 質量更加唔係好, 搞到我真係揀唔落手!

上淘寶一睇, 原來價錢同香港差唔多, 甚至有D係貴過香港, 師傅都話佢上大陸買仲靚過香港, 不過都會貴過香港, 由於逢星期日先可以出旺角買, 咁我又懶得再出去, 所以又係淘寶算!!

首先大門既門較, 師傅話要4X4, 原來淘寶好少架, 多數都係4X3或5X3, 難得搵到間, 睇張相好似幾靚仔, 都幾多好評, 就呢間啦!!

除左門較, 係呢間淘埋防盜眼, 防盜鎖, 門頂等等, 收貨返黎都幾滿意, 不過要等師傅裝好先知效果!!

而房門方面, 由於用白色門, 大門會用電子鎖, 所以型一型, 大門同房門襯下色, 房門鎖配埋黑色, 價錢貴過平時個d架, 不過為左要型, 又豁左出去了, 又係裝左先知效果!!

大門門較

大門+房門門頂, 防盜眼+防盜鎖, 門較, 實物唔錯

房門鎖+門較實物

房門鎖網上既相

淘廚廁水龍頭

由於裝修費out budget, 所以之後好多野都要慳, 最慳既方法就係淘寶!!

上間屋好多野都上大陸買, 今次連上去都慳返, 上網睇算了! 上次唔太敢買大陸龍頭花灑, 但見唔少人淘寶返黎又冇乜野, 所以今次我都想試下!!

問過師傅意見, 佢話其實換水龍頭好簡單, 衰左咪換過個囉, 如果平咁多真係搏得過, 所以我就淘喇!!

座廁同洗手盆都係TOTO, 所以水頭龍我都揀返呢個牌子, 淘寶搵左一排, 盡量搵d叫"正品"同多好評既, 雖則唔知係咪真係正品, 但比香港平幾倍, 一試無妨啦!!

淘完返黎, 包裝有防偽, 查過個code又真係TOTO既唔知咩號碼, 個龍頭又幾重手, 唯一唔好既係佢個印字令我覺得佢假假地, 問過賣家佢死都話係真貨, 見到其他comment又話拎過正店証明過係真, 咁....我唯有信啦, 其實佢假都唔緊要, 最重要唔好咁易壞!!

而廚房龍頭方面, 舊屋用開係可以普通出水同轉花灑, 又可以拉出黎用, 實在係好方便, 所以最後決定搵返同款!!

牌子方面就冇特別揀, 見到呢隻係德國出口貨, 而個樣都ok, 好快就淘埋返黎了!!

廁所龍頭 - 淘寶網上既相

廚房龍頭 - 淘寶網上既相

廁所龍頭實物

包裝

廚房龍頭實物

裝修Day26 - 鋪好廚房+企缸磚

又一星期, 今次我冇上去呀, 因為太懶, 剩係叫老公影相我睇!

廚房磚鋪好了, 另外企缸個特色牆都鋪好, 不過未做掃口!

廚房見光位既磚鋪好, 仲見到師傅做左條喉俾抽油煙機出風!

廚房另一邊, 因為唔見光所以唔換磚!

企缸特色牆

裝修Day19 - 換窗鋪電

第19日, 上到去都係一片爛地, 見到水電位搞好, 窗都換左, 唔知幾時先可以 望見家鄉呢?

拆左煤氣錶位

換好窗, 遲d會加埋窗花

廁所窗兩個洞, 係抽氣扇同浴室寶!

水喉位都搞好!

新駁既房電視線

成功搬家喇!!

多謝各界幫忙, 終於成功將舊blog搬過黎, 有親愛既院友, 又有網上無私分享既blogger, 用左大半日時間搞掂晒!!

舊blog有好多私有化, 但呢度冇呢個function, 所以搬完後我又將所有post收返埋, 過濾過後會陸續放返出黎架喇!!

其實之前有好多係因為某d無聊人先至set咁多野唔俾人睇, 希望搬家後唔會俾個d人搵到!!

琴日搬左幾篇最近寫既post, 今日開始我會由最舊既post開始放出黎!!

另外提一提大家add人, 如果想追蹤人地既blog, click一click左上角Blogger, 就會去到home, 有個閱讀清單, click新增, 之後打個網址就得, 咁有update就會個度show出黎, 我個網址:   http://minniec513.blogspot.hk/

而另一個add人, 係讀者, 即是如果我set左某d讀者先睇到, 咁我要加你既gmail落去, 去右上角設計>設定>基本, 最底有個網誌讀者, 加個人地既gmail, 會發出邀請, 所以要定期check住自己email先得, 暫時黎講我既blog都係全公開, 但為免遲d又有問題, 都係加定好d, 你地有興趣留個gmail俾我啦, 而我gamil係 513minnie@gmail.com

剛剛又發現另一個問題, 如果你係set左私有化, 我係閱讀清單係睇唔到你地有咩update架, 即係要直接click你地blog條link入黎睇先知, 好似以前yahoo blog改革後咁, 不過暫時黎講我add左唔係好多人, 都會定時定候入黎參觀你地既!!

新BLOG開張

相信呢度好多人同我一樣, 都係因為yahoo blog結束而搬過黎!

由於舊blog都放左唔少心機, 時間, 仲有好多回憶, 所以我會努力將個邊既野搬晒過黎架喇!!

一如之前咁, 大部份內容我都會私有化, 如果你地想睇, 或者係我舊blogger, 留言俾我加返你地啦, 記得係留gmail!

暫時知道呢度既玩法係:
加朋友, 即係睇佢地既update - 留blog既link, 即係好似我係 http://minniec513.blogspot.hk/

set privacy, 加人地gmail, 咁人地要login左先睇到

買門

一直以為買門係一件容易既事, 原來都唔係架, 皆因太多黑店, 上網爬文先知旺角黑店多的是, 真係要做足功課架!!

上網睇過如果間鋪差, 可以係手工差, d油髹得衰, 甚至乎係成度門斜既, 如果你退返俾佢改, 就可能要等返三五七個月, 總之就好麻煩, 所以一定唔可以貪平!

朋友師傅介紹佢去旺角盈豐, 但佢去過睇揀唔o岩款, 最後去左一間出名既和富!

我同老公有日就出左旺角睇, 黑店既冇入, 去過和富睇, 真係好靚, 款又多, 但都幾貴呀, 我冇諗過門係咁貴, 我地仲要買埋門框, 仲金呀!!

行過幾間後, 最後去左盈豐, 呢間比較似老字號店, 不過款式就真係唔多, 朋友都話如果我只係要求白色門可以係度買, 但佢屋企唔俾用白色門, 所以揀唔到, 俾著我除左黑白真係揀唔到其他色!

揀好白色橡木紋, 就揀門既款式, 其實我地都鍾意簡單款, 求其有幾條間冇咁單調就得, 揀左大約15分鐘, 就揀好大門同房門既款, 都係橫紋加直紋, 叫做夾硬襯埋一set!

之後就計數, 我地要做3門5框, 計埋$11xxx, 真係好貴, 大門係最貴, 因為係實心, 其次竟然係門框, 都係實心, 原來框都可以咁貴架, 真係嚇一跳, 最平係房門, 因為係空心既, 不過都要成千蚊!!

同老板娘傾左陣, 我話好驚佢地係黑店, 麻煩佢地真係要做好d, 佢話放心啦, 佢地開左好多年, 佢都知有邊幾間黑店, 仲話你要平就係咁, 將價比貨, 所以千祈唔可以貪平呀!!

大門既款, 不過會係白色~

呢隻係我地揀既色, 白色橡木

房門款