換樓 - 放盤

鎖定左麗城, 過埋我生日, 就開始放盤了!!

由於怕煩, 只放左俾一間地產, 開價當然係比預期既大, 預左人壓價嘛!

放盤後一星期, 都冇乜聲氣, 唔通個市真係咁靜? 過左兩星期, 我就放埋上屋網28了, 新開account會有100屋幣, 我就用左呢100個屋幣放盤, 即係免費!

放完屋網都有幾個人留言, 仲約過上黎睇, 不過最後都唔成事啦!

如是者直到端午前夕, 加埋大約有3-4對客睇過, 亦有講過下價, 但當然被壓得離晒譜, 層樓我唔急賣, 未到價我依然企硬, 可惡既地產有時真係好寸, 講埋d恐嚇+諷刺說話, 越講我越企硬!!

但端午前一日, 突然好多電話打黎約端午節睇樓, 係多到每隔半個鐘至一個鐘就會有人黎睇, 約到我都好亂!

當中最後一對客, 原來已經係第二次黎睇, 仲帶埋支票黎, 就係咁地產又黎壓價, 但今次開出價錢當然叫做諗得過, 但我依然覺得未到價, 地產叫我開出心目中價錢, 佢地再嘗試同買家傾!!

我就開左了, 係同類單位既最高成交價+1萬, 地產同買家係廁所傾左5-10分鐘, 終於答應, 就係咁, 即時簽臨時買賣合約+收左細訂!!

搞掂晒後, 我地有d唔開心, 因為就快要搬了, 好唔捨得呢度呀, 老公夜晚仲瞓唔著添!!

成交期定了在7月29日, 唔想咁快到呢一日呀!

換樓 - 第一次睇樓

呢排好忙, 所以冇時間寫blog, 忙d咩呢, 就係換樓喇!!

由於而家屋企只係一房, 如果生小朋友就唔夠住, 我唔想大住個肚先搵屋搬, 所以就提早準備一下了!

娘家在荃灣, 所以我都鎖定荃灣了, 交通都方便d, 娘家+三佬住綠楊, 二佬住麗城, 但綠楊真係太貴了, 最細既兩房單位全部都過400萬, 點買??

不嬲同二佬最friend, 如果第時真係有b, 有咩都可以方便照應, 所以我地就鎖定左麗城區!

麗城區有四個屋苑: 麗城花園, 翠濤閣, 韻濤居同蔚景花園!

蔚景唔駛諗, 因為新d, 價錢貴d, 最重要係得兩座, 冇盤!

五月尾時同老公去左睇第一次, 包括麗城x2, 翠濤x1, 韻濤居x1, 一開始睇左兩間麗城, 都係最細既兩房單位, 間隔好好, 我地好鍾意, 但開價420萬, 有d離晒譜, 明明成交都冇一間兩房過400萬, 真係開天殺價!!

之後睇韻濤居, 係一樓連平台單位, 一睇就覺得唔掂, 三尖八角咁, 好難放傢俬, 樓齡新都冇興趣, 即走!

最後睇翠濤閣, 本來我對呢個屋苑充滿期望, 因為實用率9成, 又有得bbq, 但要行一條斜路先上到去, 睇既仲要係最入個座, 天氣又熱, 行到上去我已經成身濕晒, 間隔係幾好, 只可惜條斜路真係好辛苦, 雖然鳥語花香, 仲有個池塘, 但好多蚊, 平時好惹蚊既我中左招, 足足痕左一星期!!

所以, 我地鎖定麗城花園, 呢度有三期, 二期全部係三房, 三期全部係大單位有套廁, 有d連埋工人房添, 所以好明顯二三期我都唔會買得起, 只能選擇一期, 都好好架, 因為翻新過, 大堂好靚, d lift都好快, 二期個d等好耐架!!

下一步.....就係賣樓, 開始放盤了!!

北歐蜜月之旅 - Day 8 (芬蘭)

今日一早起身係酒店餐廳食早餐, 有牛角包, 肉丸等等, 好好味呀, 尤其牛角包唔係間間有得食, 反而肉丸好似間間都有!!

食飽飽就周圍行, 等夠鐘就去探聖誕老人喇, 原來呢度有兩個聖誕老人囉, 一個係酒店reception, 另一個係村內另一個地方寫住santa claus office, 我地兩個都探晒, 因為探係唔駛錢, 但買相我地揀左平個間, 即係reception個間, 佢識講廣東話你好架, 另一個就只講國語!

探完聖誕老人, 就要寄postcard, 之後又再行一陣, 返屋仔露台享受下, 真係好hea既生活, 夠鐘就要搭巴士北上了!!

北上既巴士真係好疏, 我冇一早買定飛, 因為車費唔平, 我怕miss左班車就浪費左, 原來都幾多人, 車上仲有幾個90後香港人, 而家d後生真係有錢呢!! 呢程車要坐幾粒鐘, 有個中途站俾人去下收費廁所, 老公話d人好合作架, 去完唔會閂門, 留俾下一個, 咁就唔駛俾錢!!

幾粒鐘後終於到最貴既酒店喇, 我地只係住小木屋, check-in後就搵返自己間屋, 每間屋都有一段距離, 私隱度幾高, 好彩地我地間屋唔太遠咋, 不過就俾積雪圍住, 行入去有d困難!

一見到間屋好興奮呀, 但係時間緊迫, 我地怕好快天黑, 放低行李換晒裝備就出去遊了, 去左出名既玻璃屋, 呢度人流勁少, 我地沿路都冇乜見到人, 連玻璃屋都冇乜人住架, 去到外國就會強烈感受到香港地小人多!

差不多天黑了, 我地返屋仔煮晚餐, 呢一晚係最後可以煮食架喇, 所以清晒所有糧食, 個行李箱又可以多位d!!

老公好鍾意玩個火爐, 乘機又玩一餐!

食飽飽休息一陣, 準備夜晚出去睇北極光!!

夜晚重裝備由頭包到腳出去, 沿路又係冇咩人, 行下行下見到有三條友企左係度望天, 見到有d光, 咁問佢地先知原來就係極光了, 不過有雲所以唔太清楚呀, 睇左陣, 真係好凍好凍, 個極光又弱, 所以就返去了, 夜晚係屋不停係窗捕住個天, 但都係冇, 唯有寄望之後兩晚了!!