北歐蜜月之旅 - Day 6 (芬蘭)

坐左十幾個鐘火車, 終於都到Rovaniemi, 落車後就搵巴士站, 因為好快就會有車黎, 錯過左要等成粒鐘同埋要坐第二架遠d既車! 好彩個站原來好近, 不過站牌好唔明顯, 我係見有人排隊先知係巴士站!

好期待架8號聖誕老人巴士, 點知黎既唔係聖誕老人樣, 係架好普通既巴士! 上車後同司機講我唔係去聖誕老人村的, 佢好驚訝, 梗係啦, 我俾咁貴車費(7.2歐羅一位), 搭個幾個站, 冇計啦, 因為行要20分鐘, 如果拖住行李行雪地真係會好辛苦, 唯有洗錢!!

好快就到酒店, 落車地點係明天破冰船集合地點, 亦即係酒店對面, 呢個原因我揀左呢間sokos hotel, 外形好靚架, 不過裡面就麻麻, 成個trip我覺得最唔抵係呢間!!

酒店放低行李後, 就出去行了, Rovaniemi其實好細, 我地行左d手信鋪, 見到好多餐廳, 呢度既中式酒樓係buffet, 仲要有壽司食, 好好笑! 今日天氣好好(其實成個trip天氣都好好), 陽光猛烈, 地下既雪同冰開始溶, 行路要好小心!

行左陣就到麥當勞了, 因為一句全球最北, 搞到呢度成為景點之一, 係度食第一餐, 味道當然同香港麥記差唔多, 但價錢就貴好多! 買野食時問埋佢係咪有postcard, 佢先俾兩張我!

食飽後就去第二站 - 極地博物館, 沿路會經過好多屋, 我地係咁影影影, 又見到好厚積雪既公園, 真係厚到入唔到去架!!

去到博物館, 要俾百幾蚊港紙入場費, 其實我覺得唔俾都得, 因為冇閘口又冇人check, 當然唔好影衰香港人, 乖乖買飛啦!!

周圍行行睇睇, 我好期待呢度既"模擬北極光", 好似太空館咁訓係度睇既, 雖則係有d誇張, 不過如果我地個trip睇唔到真既北極光, 睇呢個模擬都好過冇嘛!

行晒後就完成晒今日既行程, 因為呢度真係冇乜野做, 之後去左supermarket行, 買左盒肉丸薯容同三文魚沙律返酒店食, 休息一陣天黑又出去搵食了!

附近好多餐廳, 但真係唔知食乜好, 一來唔太餓, 二來間間都好鬼貴咁, 行左幾個圈最後係其中一間坐低左, 叫左個湯同意大利飯, 份量剛剛好, 食飽返去了!!

北歐蜜月之旅 - Day 5 (挪威+芬蘭)

第五日一早起身, 先去酒店附近既教堂影相, 再去嘆個海鮮早餐, 琴日問過呢度開8:00, 我地8:10去到佢未準備好呢, 唯有出去坐海邊享受埋最後一日!

睇住佢地拖住d新鮮海鮮黎, 好興奮, 佢地見到我地咁有心幫襯兩日同埋一早黎, 仲話會揀d靚既俾我地!

見係最後一餐, 雖然只係早餐, 我地都好豪呀, 揀左皇帝蟹腳, 三文魚刺身, 煎三文魚, 仲有encore琴日既魚湯

蟹腳好鮮, 不過d肉好難起, 我地食左好耐呀, 老公食得好開心呢!!

三文魚好新鮮呀, 不過刺身豉油竟然係珠江橋牌生抽, 好彩我地醒目帶左日本豉油黎

平時我唔太鍾意食熟既三文魚, 但老公鍾意同埋一場黎到北歐冇理由唔試, 所以就叫左, 一上碟好靚呀, 食落真係幾好味呢, 令我對熟三文魚改觀!!

再黎琴日既魚湯, 今日多料過琴日呀!!

食飽飽差唔多要走, 同老板娘傾左陣計, 佢係來自菲律賓架, 都幾後生, 嫁左過黎做老板娘, 仲話係去馬爾代夫honeymoon添架, 真係幸福, 而另外個員工好鬼似王敏德, 係佢話會揀靚海鮮俾我, 好nice呢, 臨走不忘影張合照!!

返酒店拎行李後就搭巴士去機場, 搭飛機返Oslo再去芬蘭Helsinki了!

由於係Bergen呢兩日好多鋪頭都冇開, 我地乜都買唔到, 唯有係機場用貴價買呢, 買左兩個magnet同幾罐蟹罐頭!!

一出Helsinki, 覺得凍過之前兩個國家, 搵架615巴士出市區, 都幾多人搭呢!!

去到火車站落車, 由於拎住行李唔方便, 我地係火車站是但搵間快餐店醫肚, 真係貴夾唔飽! 之後係呢度遊左幾個鐘, 等夠鐘上火車!

火車站都幾雜架, 咩人都有, 本身對黑人係有d驚, 黎到呢度唔例外, 仲有就係火車站出面好污糟呀, 同大陸冇分別, 地下又煙頭又痰, 好鬼核突!

九點幾上火車, 係雙層火車, 好得意, 我一早book左連廁所既房, 一架車得幾間呢隻房咋, 我好彩地book左最後一間, 隔離三間房都係日本人, 由於有小朋友, 嘈到爆炸, 係走廊不停玩玩嘈嘈好似包左成層咁!!

上車後好興奮, 因為第一次係火車上瞓, 呢度環境好好, 係間房細左d, 估唔到有毛巾同食水供應, 等我仲驚渴死買左北歐之旅既第一支水添, 成港紙廿幾蚊架!

洗手盆個牆拉出黎就會變成沖涼房喇!!

第一次係火車沖涼洗頭, 個水制係似平時公廁咁, 按一下就出水幾秒, 結果沖個涼沖到我手都軟,成個trip唯一今晚冇風筒用, 但呢度乾既程度令我個頭乾得好快! 坐overnight火車都係幾好既經驗, 有機會再黎都想再坐火車!

沖完涼肚餓, 同老公走左落餐廳宵夜, 叫左個肉丸薯蓉, 好好味呀, 肉丸似ikea個d, 呢度既薯蓉真係好掂, 唔似香港既咁粉!

火車要坐十三個鐘, 所以今晚可以瞓多d喇!

北歐蜜月之旅 - Day 4 (挪威)

第四日既早上, 我地三點幾就起身, 四點幾bustravel黎接我地去機場, 除左我地仲有另外四個人, 其中兩母女係local tour見過的!

由於未食早餐, 我地諗住係機場搵食, 但d野實在太貴, 結果我地係便利店買杯麵, 係泰國既mama杯麵, 都係港紙$10, 佢有熱水供應, 但係就冇餐具, 我地要用幾蚊去買膠叉!!

七點幾飛機去挪威oslo, 呢度個機場係木地板, 好有ikea feel, 仲有好多野玩! 我地出左機場睇風景, 周圍都係雪同樹, 其實外國真係好多樹, 怪唔得咁多木造既野!!

逗留兩個鐘, 一點幾就轉機去bergen, 唔駛一個鐘就到, 一出機場就搵機場巴士出市區, basic hotel之前教左我搭巴士, 我仲上網買左飛, 只要show個電話msg俾司機就可以了!!

巴士站原來有兩架車出市區, 我地最初上錯左車, 因為個名實在太似, 同埋呢架多人搭, 之後發現錯左即刻落返車, 我地要搭個架係前少少, 有個女人係度等梗車, 同佢傾左陣計, 佢係黎探親, 佢話之前黎襯都係搭我上錯個架, 因為多人搭, 之後佢親戚教佢搭呢架, 仲話唔明點解個個都搭個架, 因為貴好多架! 佢仲話我地好好彩, 因為佢黎襯都係陰天, 但呢一日就陽光猛烈!!

結果我地三個人包左架巴士出市區, 司機好好人, 落車時仲教埋我地邊度上車去返機場, 原來就係原位, 即係酒店門口, 好方便!!

去到酒店check-in, 原來佢一早email左我教我check-in, 但我冇睇到, 佢放左條key係一個locker裡, 講左個password俾我知, 最後當然係佢幫我搞返, 我地係酒店頂樓(5樓), 但電梯只去到4樓, 所以要行一層!!

間房比我想像中靚好多, 幾滿意!!

放低行李就即刻出去了, 趕去漁市場嘆海鮮, 點知見到一片空地, 問人先知原來d人提早放晒假了, 嗚嗚, 不過仲有選擇, 就係室內既鋪, 去到都幾多海鮮揀, 我地揀左個nok300既海鮮, 同埋一個魚湯, 個魚湯又係港紙百幾, 不過真係好好飲, 仲有好多料添!!

食飽後就去bergen地標七彩木屋bryggen了, 真係好鬼靚, 我地係度行行行, 入左裡面參觀, 越行越遠, 其實都幾攰, 不過d風景好靚, 仲會見到好多人跑步, 呢度d人真係好悠閒呀!!

行到太攰, 我地就返木屋附近, 之前見到有d海邊餐廳, 就走去當晚餐, 望住個海, 真係感覺好寫意, 價錢亦不算太貴, 百幾二百一個海鮮意粉, 有好多青口同蝦, 只係飲品實在太搵笨, 但你又一定要飲野!!

我地係度hea左好耐, 七八點開始天黑, 越黎越凍, 我地就慢慢行返去了!!