北歐蜜月之旅-準備篇

仲有兩星期就出發, 剩係準備既野都唔少, 真係未出發先出血!!

要買一堆保暖物品, 但名牌實在太貴, 所以要向平價貨品入手, 上網睇都幾多人介紹花園街威記買雪褲, 於是同老公又走去望下!

雪褲睇落唔錯, 諗住買既時候, 見到斜對面有另一間, 仲有傳單寫住有樓上鋪, 除左雪褲仲有其他野買, 就走左上去睇了!!

樓上鋪真係乜都有, 仲有試身室, 我地係度玩左好耐, 呢度d牌子好多都係外國架, 而雪褲係貴過威記少少, 但質料好好多呢, 起碼唔似國產先, 試左上身仲即時覺得好熱, 應該好保暖卦!!

係度玩左好耐, 最後當然出埋血, 老細好好人呀, 知我地去北歐honeymoon, 送左兩條頸巾俾我地做結婚禮物, 呢度價就冇得講架喇, 佢肯送野真係開心, 我地仲買左goggles, 真係扭都唔會爛, 好明顯係正貨!!

係度放低左$26xx銀両, 有d乜野呢??

雪褲3條 (我1條, 老公2條)
goggles 2副
雪手套 2對
長羽絨一件 (係我睇中既, 只係$300咋, 我又冇長羽絨, 所以買左)
長防水外套 (老公的, 個款好靚, 我好鍾意)
頭笠 2個
頸巾 2條 (送的)

其實我覺得以質素黎講呢間樓上鋪真係幾好, 大家有興趣去望下, 老細話架, 試下之嘛, 又唔駛錢!

除左呢度出血, 另外仲有買左以下物品:
1. 雪靴 (我買了1短1長, 老公買了1對columbia)
2. 背包 (一人一個, 到時出街用背包方便d)
3. 放濕機 (我好易流鼻血, 上次一到日本即乾到血流如注, 呢幾日香港乾少少我都有血絲, 屋企開左放濕機好好多, 所以買埋旅行裝帶去用)
4. 保溫杯 (一人一個, 係情侶款, 有blogger教我地朝早沖定熱飲帶出街, 一黎慳返買水錢, 二黎有熱飲落肚好正呢)


一切準備就緒, 又要繼續忙plan行程喇!!