Guam+Tokyo之旅 Day 1 (19/1)

回到18/1, 當日老公請左下晝假, 返屋企執埋d行李再拎去6299度, 而我放工就直接上6299度食飯, 食飽就出發去機場了!

今次旅行要去好凍既東京, 又要去好熱既關島, 所以乜衫都要帶, 第一站係關島, 但香港咁橋個日又凍喎, 結果我短袖衫外著羽絨, 再加對拖鞋, 哈哈!!

去到機場等埋另外既朋友, 佢地只會留關島, 只帶夏天衫, 少好多行李, 但好好笑原來個個都因為要搭飛機著得好騎呢, 有朋友著埋睡衣添呀!!

坐左大約五個鐘機, 就到達關島了, 個邊快香港兩個鐘, 係一大清早呀, 天都未光晒, 係香港訂機票多數會包接送, 叫非凡旅遊, 而因為我走個程係去日本, 所以我剩係包接機咋, 走個陣要自己搭車!!

除左我地兩個會去日本, 仲有就係得我地住Fiesta, 佢地全部住Hilton, 因為近返間church, 我都想同佢地一齊架, 但老公好想住一出去就係沙灘既酒店, 唯有就下佢啦, 鬼叫佢陪我黎!

關島係美國地方, 不過唔駛簽証, 但入境時就填好多野囉!

非凡點晒名後, 就分左兩批人: join local tour同唔join既, 我一早俾左錢early check-in, 加上冇乜興趣, 所以唔會join, 同行朋友有兩位join左, 另外有四位就冇興趣, 直接去Hilton, 而酒店俾佢地加錢early check-in, 不過唔平囉!!

接我地既車~

我同老公去到Fiesta都未有房, 要十點先有, 所以就去食早餐先, 我搭襯飛機都瞓唔到, 所以好眼瞓, 食完早餐未夠鐘, 唔理儀態係酒店大堂恰陣, 9:45就拎房了, 我地間房係頂樓呀!!

Fiesta影既景, 靚過Hilton好多架!

上到房老公就瞓覺了, 可憐既我要換衫化妝, 因為十二點幾就要集合去觀禮, 我地住Fiesta要搭車添呀, 今次有朋友借左曲髮器俾我用, 化好妝就叫老公幫我夾頭, 十二點半就出發了!!

朋友結婚既教堂係St. Probus Holy Chapel, 集合地點係Hilton, 由於怕遲到, 所以我地搭的士, 原來都幾海鮮價, 有d會跟錶計, 有d就上車講, 而我地第一程就遇到好司機, 收我地US$8, 即係同巴士一樣價呀!!

齊人後就有專車送我地去教堂, 一入到去就有人講解個流程, 其實我地只有8個賓客, 個個都好眼瞓, 真係聽唔入耳!

成個婚禮都好似好趕咁, d工作人員仲要唔俾時間我地同新人影相, 真係嬲嬲地, 不過我地都夾硬影左幾張, 之後就轉出去影了!!

同老公影返張合照先, 捱完通宵兩個都好殘!

今日天氣勁好, 曬到我地好辛苦, 真係有刺痛感覺架, 影晒相就搭返專車走, 去左間餐廳, 一對新人款待我地既lunch!!

去到首先係切餅先, 而lunch既環境係對住個海, 好好feel, 呢度近Fiesta, 所以食飽我同老公就返自己酒店小休, 其他人就搭返車返Hilton了!!

lunch既地方

Fiesta既外觀

到六點幾同老公又搭車去Hilton, 本來想搭巴士架, 點知走左架車, 又落雨喎, 咁就去返搭的士, 呢程跟錶計US$10! 今晚既晚餐都係一對新人請我地, 係Guam出名既BBQ buffet!

Hilton既bbq buffet款式不太多, 有琵琶蝦, 牛扒, 青口等等, 味道一般咋, 人地話Fiesta好味d架, 不過唔緊要啦! 呢度仲有show睇, 不過我唔太識欣賞, 哈哈!!

食飽後我地就坐係度傾計飲野, 呢度dinner後就會變身就酒吧架啦, 幾好feel, 不過捱完一晚通宵真係頂唔順, 十一點左右就走了!!

Hilton BBQ dinner, 真係好少野食!