遲來的揀衫日

尚餘唔夠兩個星期, 派不完的帖, 改不完的座位, 不下二十個朋友問同樣問題: 七七八八喇可?? 下? 仲爭d咩? ........

而最多人驚訝既係我連衫都未揀定, 其實幾個月前上過去, 仲hold左幾件, 但其實都不是太合心水, 只係揀無可揀下就揀了, 因為我下身太肥, 好多衫鍾意但著得唔好睇, 個人亦唔鍾意一層一層既蛋糕裙, 或者閃令令好多石既衫, 所以其實選擇少左好多!!

之前提過其實呢間LEGEND HOUSE係表嫂同人夾份開, 佢對我實在太好, 知我唔太鍾意, 不停幫我搵新款, 佢知我鍾意咩類型同咩色, 就揀個d, 真係好感動呀!!!

本來新衫要12月頭先到, 但佢知我太急, 係咁催人地, 結果早左到, 我終於係婚前11日上去confirm衫順便度埋身了!!

上到去佢已經掛晒係度, 嘩, 真係全部我鍾意既色, 好開心, 之前我仲一直好擔心會揀唔到架, 上到去有d興奮, 不停試試試, 最後用左個半鐘頭搞掂, 選好晒三套晚裝, 連本身hold既婚紗都轉埋, 表嫂仲送多套婚紗俾我六點註冊著, 真係爆開心!!!

希望各blogger可以俾下面, 唔好copy出去呀, 多謝!!!

呢件其實係紫色, 用黎迎賓!

呢件係敬酒, 係絲質地, 好舒服架!

呢件係新架, 其實都幾低胸, 不過我幾鍾意隻色, 所以豁出去了, 用黎送客!!

進場婚紗, 又係新返架, 一著就鍾意, 所以唔要之前個件了!

我想搵多件婚紗黎註冊, 其實一直情繫ballet款既婚紗, 呢件冇大拖尾又輕身方便註冊, 到俾錢時表嫂話送俾我著, 好開心呀!

以下係out既款

本身幾鍾意桃紅色, 但個款同紫色迎賓太似, 所以out!

呢件同我送客個件係同款, 都係新返, 比較鍾意另一隻色, 所以out呢件!

呢件拉唔到拉鏈, 哈哈, 同埋著得有d腫!

又係我鍾意既紫色, 表嫂專登揀俾我, 不過我比較鍾意而家件迎賓!

兄弟姊妹聚會+衣著

琴晚係我地既兄弟姊妹聚會, 個個都好忙, 但都肯抽空出黎, 由其係我班姊妹, 齊晒人呀, 但兄弟團呢? 有一個一早講左去旅行出席唔到, 伴郎兩日前先話黎唔到, 另一個係臨時先話要開工, 結果有3個兄弟缺席, 不過都ok啦, 搵食艱難!!

我地約左去樓上cafe, 一來冇咁貴, 二來氣氛輕鬆d, 酒樓圓枱太難傾到野喇, 琴日個環境都唔錯, 食物都幾好!!

約左七點cafe, 個個都遲到, 不過其實預左, 男友約左成班兄弟去換恤衫, 事緣之前淘既恤衫有3個唔o岩, 咁本來係去旺角配返3件類似既色就算, 點知佢話見到H&M恤衫$99件, 又有灰色, 不如全部換晒佢, 佢真係好有錢囉!!

好啦, 咁我話不如轉淺灰啦, 襯返姊妹裙, 同埋深灰襯黑西裝好黑社會感覺, 仲有個bowtie又唔出, 但班兄弟個個都鍾意深灰, 咁我唯有算!!

買晒返黎, 伴郎一試晒成套, 成個黑社會咁呀, 佢個人本身樣又惡, 著埋呢套野真係嚇死人, 就係咁, d兄弟開始動搖!!

加埋我既煽風點火, 男友終於肯換淺灰色喇, 所以琴晚約埋一齊換完先上cafe, 不過男友真係好鍾意深灰, 竟然買多件自己著!

聚會大約十點完, 主要係見下面同講rundown, 冇諗過佢地真係好認真睇, 仲好多問題, 講到我有d喉沙, 但同時都開心, 因為佢地真係認真對待我既婚禮!!

返到屋企就叫男友試恤衫, yeah, 呢隻色襯好多, 斯文好多呢, 開心晒呀!!

為免伴郎惡樣出街, 打格仔好d

男友交戲, 扮黑社會樣!

淺灰色, 依然交足戲, 扮斯文!

襯唔襯呢?

屋企人送的金器

得返三星期, 屋企人終於捨得去買金了, 二佬話識人係灣仔既周生生做, 所以我地就約左出去睇!!

今日要揀四樣野, 咁爸媽同三個哥都可以到時頒俾我, 是日金價係$17500!

一坐低就揀鈪, 其實我真係唔識揀, 到時離遠睇其實對對都差唔多架啦, 同埋鈪真係太多款, 所以我都係揀頸鏈先!!

三個哥budget係每人$15000, 好感動呀, 我一眼睇到一條花花鏈, 就叫佢俾我試, 帶上後覺得幾鍾意, 點知大佬話另一條靚d喎, 但個條一睇就知重野啦, 錫住佢又唔知!

呢條花花鏈$15xxx, 咁我就再睇返鈪, 主要都係佢介紹俾我, 帶上手覺得ok就算了, 有對都幾得體, $18xxx, 我揀左黎當媽媽送!

之後見左對磨沙花花鈪, 一帶上手好鍾意, 所以即刻揀左, 對鈪$15xxx, 嘩...咁好易overbudget, 之後就叫佢俾d輕鈪我, 佢話我揀d款都磨沙, 就俾左對"令"身d既我, $11xxx, 就咁睇唔鍾意架, 但帶上手又好似唔錯, 好快就揀埋了!!

埋單成六萬蚊呀, 睇返d單全部手工都俾左2-3折, 我都唔知係咪算抵, 不過買左金個感覺好warm, 屋企人好錫我!!

婚前最後的To Do List

忙忙忙, 真係好Q忙, 仲要好黑仔, 婚前兩個月爆瘡, 個半月開始皮膚敏感, 到今日都未退晒呀, 好唔開心!!

得返一個月都冇, 好多野未搞呀, 除左自己結婚, 仲有朋友結婚, 今個星期日係42寸長腿發嫂結婚, 我要做姊妹, 冇左個星期日了, 一月有位姊妹關島結婚, 一早答應左同男友會去觀禮, 我地應該會順道去埋東京, 而家就差唔多BOOK機票酒店了, 幾位朋友不停傾幾時出發住邊間等等, 我真係唔得閒搞埋呢樣啊!!

開始安排埋最後一轉既淘寶, 好驚淘漏野, 順便寫埋剩返要做既野先!!

1. 搵糖果for Candy Corner
2. 訂回門豬
3. 拎成長片, 揀歌燒碟, prewedding碟, 帶埋台灣花絮碟去酒樓試
4. 揀衫, 揀完send俾化妝師
5. rundown, packing list, 分工表等等
6. 編座位, 印人名label
7. 入利是
8. 叫信用卡公司加額
9. DIY item: 襟花, 花車佈置, 枱號, menu

暫時諗到咁多, 希望唔好有野漏!

倒數一個月的心情

話咁快得返一個月, 真係好忙好忙, 心情十分差, 可以用崩潰黎形容, 不過今日好D喇!!

其實都燥左兩個月, 因為男友真係乜都唔做, 叫佢做既就同冇做冇分別, 真係令人好鬼燥, 不過朋友話, 好彩既係佢由我鬧唔還口, 如果唔係會好大件事!

呢幾日仲更加大鑊, 我連琴日倒數日都忙到唔得閒打BLOG, 要今日先打返!!

首先博藝會送既24座要我地一個月前交行程, 否則要俾$200手續費, 我上星期叫左男友搞, 佢竟然完全冇件事!!最後都係我搞返, 不過我打去鬧完佢, 佢就真係驚左, 呢兩日好乖乖, 琴晚仲主動入利是!!

第二件燥事係candy corner公司, 呢間easy decoration, 真係好平, 又好靚, 本來好期待, 點知突然爆出佢人品問題, 原來佢成日係背後講d客壞話, 好似個個都俾佢話過, 你個價錢定得低係你問題, 冇理由話人cheap, 仲要話我地成個group係窮新娘!!

件事越搞越大, 本來我都算, 因為時間無多, 唔想都要繼續忍, 但佢竟然係呢個時候話唔再做2012年既生意, 全部退訂, 頂你, 而家先話退訂, 你不如big day前一日先講??

你一句退訂就易呀, 做少單生意之嘛, 我俾你一鑊橋起!! 之前買左個love plate, 因為你有我就轉讓返出去, 仲要之前一日我最忙時要我定食物, 我用左成個下晝睇佢既相黎揀, 定完第二日你同我講退訂, 簡直浪費我時間, 仲要我而家先由頭再搵過, 好激氣呀!!!

好啦, 由於個個退訂太大迴響, 又出新招, 琴晚又話如果信任佢可以繼續服務, 唔信任就賠償, 大佬呀, 我仲點信你?? 你到時放飛機我真係吹你唔賬, 所以....我又用左兩日時間執佢既屎, 搵candy corner資料, 忙上加忙, 好多野都未update, 有時間再打!!!

倒數一個月的進度

我們的大日子 : 8 Dec 2012 (Sat)

婚宴地點 : 博藝會 - 宴會廳

出門地點 : 帝景酒店19/F

註冊

註冊地點 : 博藝會 - 宴會廳

註冊時間 : 8 Dec 2012 18:00

証婚律師 : 戴秉信律師

羽毛筆+座 : 未睇

戒指座 : 小小白(龜龜)戒指座

証書套 : "盟" - 已收貨

過大禮

過大禮日子 : 2012年10月14日 (星期日) - 已完成

過大禮用品 : 已買

婚紗相及當日攝錄

婚禮攝錄 : 純美新娘 - 小寶(standard) + Ivan (snap) + Steven (video)

成長片段 : 未決定用邊個
   1. The Grand - love story, 未決定用唔用
   2. 純美新娘 - 已交相, 等收貨

即日剪片 : 純美新娘

婚紗相 :
1. The Amor (已影@果欄+石澳+IFC on 9 Feb 2011)
2. G3 (已影@studio+觀塘碼頭+大潭+煤氣燈街+高街 on 29 Apr 2011)
3. Majesty (已影@石板街+域多利監獄+青年會 on 25 Nov 2011)
4. 台灣綠攝影像 (已影@新竹+苗栗 on Oct 2011)
5. Mona Lisa - (已影@山頂+馬灣公園+沙灘+室內) on 11 Feb 2012
6. Grand Photo - (已影@域多利監獄+立法會+拳館+觀塘碼頭+昂船洲大橋) on 31 Mar 2012

服裝

新娘 :

婚紗晚裝(pre-wedding) : 百利純美新娘 + 淘寶

婚紗晚裝(big day) : Legend House (十一月尾揀款)

婚紗鞋 : 已買@金都 

晚裝鞋 : 用返婚紗鞋

褂 : 已有(from媽媽)

褂鞋 : 已買@淘寶

Girdle : 已買satami & GLC

Nude bra : 已買

頭紗手套 : 未睇

新郎 :

新郎禮服 : Legend House

新郎恤衫 : Legend House會送一件訂造

皮鞋 : 已買@金都

父母 :

奶奶裙 : 一件@金鳳凰, 後來自己造一條, 呢條唔要了!

外母裙 : 一件@金鳳凰

老爺西裝 : 唔駛買

外父西裝 : 唔駛買

兄弟姊妹 :

伴娘裙 : 已買

伴郎衫 : 已買 

姊妹裙 : 已買

兄弟衫 : 已買

兄弟呔 : 已買

化妝飾物

新娘MUA : June Lo

伴娘MUA : Renee Tang

家人MUA : June Lo

姊妹MUA : Renee Tang / Joey Wong

頭飾 : June提供

頸飾 : 哥哥提供水晶飾物

手飾 : 哥哥提供水晶飾物

結婚戒指 : 已買@ADIAMOND

嫁妝 : 當買左

花車佈置

主花車 : 阿達 - 紫色倫敦的士

其他車 : 已交行程 

結婚花球 (鮮花) : 已訂@Hanahama

結婚花球 (絲花) : 已有

新郎襟花 : 已訂@Hanahama + Wedding Doll

姊妹手花 : 已訂@Wedding Doll

兄弟襟花 : 已訂@Wedding Doll

家人襟花 : 制作中(DIY)

婚禮用品

喜帖 : 已印

餅咭 : 已買美心150張

唐餅 : 媽媽話唔駛, 所以過大禮先會買幾件

Wedding Logo : 已有

印章 : 已整

利是封 : 已有

放利是福袋 : 未買

人情箱 : 已買, 待Handmade by Mi裝飾

貼紙、囍字、對聯 : 已買

敬茶茶具、碗筷 : 已有(from三佬) + 博藝會提供

咕o臣 : 已有(from三佬)

紅傘 : 朋友待買未取

睡衣 : 已買@淘寶

上頭用品 : 已買

子孫筒 : 唔買

回門乳豬 : 未睇

結婚公仔 : 已有兩對

龍鳳被 : 已買@千色店

晚宴用品

晚宴backdrop : 博藝會提供

簽名布 : 純美新娘 + 綠攝影像

簽名筆 : Handmade by Mi

晚宴歌曲 : 未諗, 博藝會都有

晚宴司儀 : Alvin 

賓客名單 : 制作中

座位表 : 已訂@Hanahama

檯號牌 : 博藝會提供, 可能DIY

餐牌 : 博藝會提供, 可能DIY

啤牌 : 未買

席前小食 : 博藝會100份席前小食+CANDY CORNER

紅酒+VSOP : 男友負責, 好似話訂左

兄弟姊妹團

伴郎 : 樑少

兄弟 : Dicky, Ka Ki, Kailex, Tak Fu, Tat, Yeung

伴娘 : Mavis

姊妹 : Amanda, Eppie, Escher, Eva, Pet Pet, Shirley

當日程序

當日rundown : 制作中

分工表 : 制作中

Package List : 未整

其他各項準備

婚前檢查 : 未睇

試菜 : 我自己飲過當試左 + 同長老去左飲茶 

蜜月旅行 : 一月去關島參加朋友婚禮, 蜜月會延期至三四月, 多數去歐洲

新居 : 已有 

改姊妹裙+淘披肩

上次寫到收左姊妹裙, 自己試著冇咩問題, 幾經辛苦終於派晒俾姊妹試, 點知....7條得2條係fit, 1條少緊但姊妹話唔駛改, 1條吊帶長短不一, 我叫佢俾我手改, 另外3條都係細, 要改!!!

我唔知係姊妹俾我既size有問題, 定係條裙做得有問題, 不過有紙口位改, 最嚴重個條姊妹話連patpat位都著唔落, 佢會俾屋企工人手改, 另一位自己拎去改衣鋪, $60交易! 剩返一位....我幫佢手改, 實在覺得自己太厲害, 幾十蚊都慳返!!

總算搞掂晒d裙, 剩返係披肩, 一早決定唔用毛毛披肩, 因為好難著得返, 咁我就揀左可以當頸巾既披肩, 俾d姊妹揀色, 而入到最後兩強係米白同紫, 票數都好近, 其實我鍾意米白, 但男友堅持要紫色, 佢話米白普通, 同埋用紫色可以同兄弟煲呔襯返, 同埋有姊妹話膚色黑襯米白唔好睇, 但紫色就易襯d, 最後決定用紫色!!

係淘寶搵, 原來都好多色揀, 最後揀左呢隻葡萄紫, 寄到黎都冇乜色差, 第時佢地出街都用得返!!

兄弟恤衫+煲呔

話說男友成日覺得姊妹有既野兄弟都要有, 咁我包左姊妹裙, 佢又覺得兄弟剩係包呔唔夠, 又想特別D, 就決定包埋恤衫!!

姊妹裙係淺灰色, 兄弟恤衫都會係灰色, 不過佢就揀左深灰, 問兄弟拎size後就淘寶了!!

搵到一間深灰色恤衫係人仔$19件, 但係size只得39-43, 乜都唔理, 成個表俾兄弟問佢地買幾多號叫佢地覆, 覆完就買了, 咁平....唔啱先算啦!!

送到黎之後, 陸續派俾兄弟, 其實仲未派晒, 因為個個都忙, 不過有兩個都話袖短, 但佢地話唔除西裝應該冇問題, 所以由佢, 不過我完唔明點解d size咁亂, 有個好高好瘦買40號, 佢話除左袖短冇其他問題, 有個肥肥矮矮買43, 佢預左會好長, 點知連佢都話個袖少少短, 我拎過件42出黎睇, 個袖又好長喎!!

算....預左一分錢一分貨, 難得兄弟們易話為, 個個都話可以接受唔駛換, 咁我都煩少樣了!!

搞掂恤衫就到煲呔, 男友話用紫色(可能知我鍾意), 咁我又要係淘寶搜羅一堆紫色俾佢地揀, 原來....深灰色恤衫係好難搵到紫色呔襯, 揀左成個星期, 最後揀左四強俾班兄弟揀, 6個有3個揀左同一款, 另外3個冇出聲我當棄權, 伴郎就自己揀一款, 咁我又拿拿聲淘返黎了!!

到手後拎黎襯下, 都ok啦, 反正不是我帶, 哈哈!!

人仔$19一件既恤衫, 質地可以接受, 但size真係少少求其!

兄弟煲呔, 人仔$5個, 個扣好鬆, 成日甩出黎, 到時叫佢地用膠紙貼實佢!

伴郎煲呔, 人仔$6, 我覺得唔錯, 不過影相有色差, 試過iphone影變左藍色!