窩心的結婚禮物

距離婚期仲有一個月多d, 真係越黎越緊張, 唔係待嫁的緊張, 係怕搞唔切d野既緊張!!

係心情好差既時候, 先後收到三份海外朋友送既結婚禮物, 總算開心返d!

第一份係台灣朋友寄黎既, 幾好笑架, 係養生書, 佢真係台灣人黎, 其實只係之前打機識, 上次去台灣有食過飯, 冇諗過佢會送禮俾我, 佢話諗唔到送乜, 覺得身體健康係最重要, 就送左呢本書俾我, 裡面係教人煲乜煲乜等等, 其實係幾好的, 尤其我鍾意飲湯!

第二份係移民左去加拿大既小學同學, 原來佢有問過伴娘意見, 伴娘仲話我一定會鍾意, 所以我都好放心, 一收到真係好開心, 係水晶耳環, 仲要係我帶開既吊吊款, 真係好鍾意!! 

第三份係呢位小學同學既朋友, 係我早幾年去加拿大探小學同學時識架, 之後仲做埋朋友, 仲記得有次失戀好傷心時, 因為係三更半夜, 我唔敢打俾朋友嘈住佢地瞓, 就打左去加拿大俾佢地傾訴, 時間過得好快呢, 佢送左水晶擺設俾我, 知我有養鼠鼠, 所以係鼠鼠黎架!!

朋友係在心中的, 唔駛成日見, 成日聯絡, 再一次覺得自己幸運, 有錫自己的朋友!!

姊妹裙

終於可以講姊妹裙, 其實睇左好耐了, 之前睇過百利貴左好多, 同埋好多黑店, 班姊妹又難約, 所以決定淘寶了!!

睇左好多間, 因為我有太多問題, 例如訂造, 揀色等等, 結果唔係好多間肯睬我, 最後決定左而家呢間!!

我一直都有選擇困難, 又想俾d自由度姊妹, 就開左個group問佢地, 一問就出事了, 首先問長裙定短裙, 個個意見不同, 長裙就唔方便, 但可以著波鞋, 短裙方便d後生d, 但怕凍同一定要著高跟鞋, 最後決定....姊妹短裙, 伴娘長裙!!

顏色方面, 諗住係灰或淺紫或粉紅, 點知姊妹們又有意見, 膚色肥瘦等等, 最後一致話灰色易襯又唔會著肥, 就決定灰色了!!

而呢間淘寶店寄左色卡俾我揀布, 我揀既係雪紡, 佢剩係雪紡都六十幾隻色, 仲要揀埋裡面個層布既色, 不過佢灰色選擇唔多, 唔太難揀!

之後我都唔敢再問佢地意見, 咁我又唔駛佢地一模一樣, 就揀左2款俾佢地自由選擇, 而伴娘就自己入去揀款添!

我先做一條寄黎, 點知...個姊妹話唔得, 兩層布相差5cm, 搞到條裙好短, 款就ok的, 姊妹幾鍾意, 其實佢話佢接受到個長度, 不過我思前想後, 再同間鋪理論一番, 決定寄返上去俾佢改, 順便造埋剩低個d!!

佢地真係好快, 幾日就起到貨, 我mark低晒胸,胸下,腰,臀,裙長同身高俾佢, 仲千叮萬囑兩塊布不能相差多過2cm!!

其實我都算好遲造裙, 因為有個姊妹八月生bb, 佢一直想修身先度身, 最後等到十月中先叫佢地度, 好彩造得快, 未到十一月就收到了!!

由於我太緊張, 聽得太多姊妹裙出事, 於是我每條都拆出黎睇, 每個款拎左一條返去試添!!

試完感想: size真係做到好fit, 好彩我叫左佢地預留1-2cm, 兩層布長度如我要求, 冇超過2cm, 有姊妹話過條裙胸位應該有骨(個形靚d), 我呢條得pad, 不過又有另一位姊妹話唔鍾意有骨, 會頂住個胸, 所以話, 真係每個人意見都不同!!

總括黎講, 條裙比想像中好, 始終淘寶我冇要求太多, 唔駛好似香港咁多不愉快經驗就可以了!!

獻醜了:

我的驚喜首飾

yahoo又有麻煩野, 就係冇得睇有咩人寫新blog, 唔係要我每日入每個blogger咁入去睇有冇update卦? 邊有咁多時間??

寫呢篇blog因為呢期見到太多人寫喇, 臨近大日子, 開始要準備婚紗晚裝既飾物, 其實一直以黎我都冇諗過呢樣野, 一心諗住租衫個度會有, 不過....我個間好似得好少!!

到早幾星期, 三佬突然俾左個驚喜我, 就係可以提供飾物俾我, 不過只係借黎帶, 而唔係送俾我架!!

佢話可以公司既sample room借首飾出黎, 聽完之後好興奮, 點解呢?? 因為佢係係最出名水晶個間S字頭度做, 不過佢send左11個款俾我睇, 我都睇唔上眼, 佢叫我去shop睇, 原來實物同佢俾我個d黑白圖爭好遠囉, 實物係靚好多!!!

佢話除左呢11款, 如果我睇中其他, 可以抄低個model no.俾佢問下有冇, 即係我要去是但一間不停試, 試到鍾意就抄低, 我唔好意思係人地鋪頭混吉喎, 點算好??

婚鞋到手

原來除左上一篇, 呢篇都係漏左既, 就係婚鞋!!

話說月頭已經拎左鞋, 不過個日我公司食飯, 所以男友就自己去拎!!

月頭我係超爆忙, 收到鞋後我都冇理, 到過兩日拎出黎試下, 先發現佢冇幫我換到蝴蝶石, 之前明明講左換, 佢仲話蝴蝶係新既, 貴d不過冇加我錢架!!

其實佢鞋頭個石都ok, 不過有我鍾意既蝴蝶梗係揀蝴蝶, 而我心態亦覺得, 其實都冇咩人會留意對鞋, 不過男友話一定要拎去換(可能佢覺得係佢自己疏忽冇check), 咁好啦, 又叫佢拎返去!!

拎返去兩三日就打黎話搞掂了, 真係好快手, 不過呢排真係好忙, 試一次著到就收返埋佢了, 我諗住一對鞋襯埋婚紗同晚裝就算了, 兩個鞋盒就咁放係廳既地下就算, 屋企真係好混亂呀!!!

呢對未係未換既~

換蝴蝶石後~

99送的龍鳳鈪

寫完上篇嫲嫲送既金鏈, 先發現原來我漏左寫99買既龍鳳鈪, 早係幾個月前金價$16xxx, 即係我買耳環個排, 99就走左去買龍鳳鈪了!!

99係去左六福買, 其實我唔太識, 剩係知而家好多金會整到好薄, 即係得體又唔貴!!

睇到對鈪, 唔太大對, 我仲以為係好輕, 點知99話呢個係舊款, 佢鍾意舊款多d, 成兩萬幾, 嘩.....我真係睇唔出係兩萬幾, 同場伴郎都係度, 佢話: 嘩, 咁貴架?  搞到我真係好尷尬

嫲嫲送的金頸鏈

過大禮當天, 同家人飲完茶後, 媽媽叫我地拎埋餅去嫲嫲家, 咁我地就拎左唐餅, 西餅卡, 帖同水果上去了!!

其實我同嫲嫲關係不是太close, 有半年我係搬左黎同佢住, 不過見面時間不多, 佢晨早就出去晨運, 起身唔見佢, 夜晚佢八點幾就瞓, 返到屋企佢多數都瞓左覺!!

一直諗住只會係媽媽同哥哥們買金俾我, 估唔到嫲嫲拎左條鏈出黎, 我真係好意外呀!!!

一開個盒, 條鏈咁粗既? 係咪男裝黎架? 佢話女裝黎架, 之後二佬俾我睇佢個條, 原來仲粗, 佢又係嫲嫲買架, 媽媽話原來每個孫都會有, 我女仔細條d, 最初以為係手鏈, 點知原來係頸鏈黎架!!

我一直講梗冇頸鏈, 著褂唔緊要, 但夜晚敬酒時條頸冇野又好似好怪, 所以打算叫其中一個阿哥轉買花花鏈俾我, 而家再多條頸鏈, 好開心, 雖然個款係老土, 但係真係好開心呀!!!

簡單的搬嫁妝

搬嫁妝對我黎講其實係幾無謂既一件事, 因為本身已經同男友住梗, 結果係執好個箱叫二佬幫我車返娘家, 過完大禮又由娘家車返黎!!

以我所知我d阿嫂都冇做呢樣野, 但為免傳統既媽媽秋後算帳, 我都係咁意做下好d!

首先龍鳳被之前買完就直接拎左上娘家, 唔駛搬黎搬去!

傳統既嫁妝有好多野, 當然我係唔會跟足, 係咁意應酬下阿媽就算了!!

之前淘寶買了紅色既行李箱, 上次因為係臨急臨忙執俾二佬, 我求其放左d野, 包括: cushion, 茶具, 新鞋(我用了褂鞋), 之後過完大禮諗住放埋金耳環, 但最後都冇, 另外媽媽買左兩包片糖, 連埋過大禮包椰子糖塞埋入去, 由於太趕, 我唔記得放新衫, 尺同較剪, 哈哈!!

本來過大禮當日叫二佬車返俾我, 點知佢拎漏左袋龍鳳被, 同埋佢之後要去街, 結果個行李箱放住係佢家先, 琴晚上去食飯佢先車返俾我, 而龍鳳被佢叫我自己返娘家拎!

唔知係咪每對新人同我一樣, 結婚前間屋真係一片混亂, 我個行李箱就咁放左係廳算, 梳化用左黎放帖, 利是封, 餅卡等等, 枱就放左堆雜物, 婚鞋都係放地算, 自己見到都頂唔順, 快d結完我要執屋呀!!

我們的過大禮清單

相信大家都知道, 過大禮係十分之煩既事, 除左係多野準備, 仲有係屋企人既意見, 特別係假民主!!

係過大禮項目上, 我媽媽係比較傳統, 所以想做足少少, 乜都話意頭, 不過佢個女我真係十分怕煩, 同埋唔想買咁無謂野, 到最後都係丟既, 幸好我堂妹前年結婚一切從簡, 佢半個竹星, 連過大禮都冇, 咁媽媽都冇再堅持要做足, 不過我唔會咁衰女既, 點都會令佢開心!!

男家方面, 本身99都冇乜意見, 佢都唔想我地o徒錢買咁多野, 仲話而家好似興用利是架嘛, 個d咩包羅萬有呢, 咁佢又叫我返去問媽媽, 好喇....到最後, 原來男友嫲嫲係有要求架, 結果我叫男友搵日同佢地認真傾, 佢返到黎總括係金句: 不要太複雜, 又不能太簡單!!

如是者....我就開始上網做功課, 熟讀所有過大禮既野, 再做出一個清單, 佢地ok就實行了!!

我堅持唔買椰子, 因為阻地方, 仲要擺到發芽, 覺得係勁無謂, 屋企又唔係大, 唔好再迫我放呢d野, 結果媽媽話, 唔買椰子, 咁買椰子糖啦, 哈哈!!

其實我地清單都好齊全架, 好多項目都齊晒, 不過...全部用利是之嘛, 即係每個利是封上都寫上呢封代表乜, 好齊下架!!

清單如下:
男家
聘金封
椰子金x4
雞金x4
豬肉金x4
魚金x4
檳榔金x4
茶葉芝麻x4
京果x2
喜糖x2
扁柏x2
海味金x4
包羅萬有x2

以上項目全部都係利是封, 另加以下現盛物品:
酒4支
龍鳳餅2對
果籃2籃
龍鳳燭4對
男女上頭用品
男女家對聯
喜字貼x8
椰子糖x2
唐餅x16
西餅卡
金耳環
帖

女家除左回上面既一半(除左餅卡耳環同帖唔回), 另加一堆利是, 又係上面寫返係乜啦:
蓮藕金x2
石榴金x2
四季桔x2
發財芋頭x2
添丁薑x2
茶禮(大發,鬆糕,煎堆,紅包)x1
女婿衣料金x1
利是(五代同堂, 百子千孫)x2

哈哈, 即係我地買既野真係全部用得或食得, 只係需要準備大量利是封同散紙入利是, 仲有就係罰抄一樣咁寫利是封!

可能大家覺得, 有包羅萬有咪得囉, 不過冇計, 包羅萬有滿足唔到我媽媽, 佢乜都話意頭, 咁我唯有出此下策, 叫佢當我買左, 不過係個利是封裡面!!

有驚無險的過大禮

琴日,終於過左大禮了, 總算順利, 可以正式派帖了!!

之前一晚專登出去搵二佬食飯, 順便俾女家回禮利是封+過大禮清單佢, 返到屋企好攰就訓左陣, 點知男友叫我唔好訓, 要整過大禮既野, 真係嬲嬲地呀, 我搞左咁多, 你仲要我做, 過大禮係你地男家負責架, 女家個邊我搞掂晒, 男家你都要我負責埋, 我當然冇理佢啦!!

訓到十二點幾起身, 點知佢又即刻去訓, 睇下佢準備左d乜啦, 頂....原來佢只係入左錢落利是封, 即係又要我做!!

我地過大禮都叫好簡單, 只係一堆利是+有用/食得既野, 所以我要準備係寫利是, 清單下篇再講!!

寫好晒執埋上頭野, 對聯等等, 成三點幾呀, 不過仲未有倦意呢!!

男友一早就出去了, 佢食完早餐, 搵99拎埋4支酒, 就去榮華拎餅, 再去街市拎果籃, 荃灣街市對面就係榮華, 好方便!!

吉時係11:00-13:00, 佢約左兩個兄弟11:00係街市等, 點知我10:30就收到老豆電話打黎, 問點解仲未有人上去? 講左11:00架嘛, 要人咁早上做乜??

我屋企係比較複雜, 爸媽冇離婚但分開了, 見到面多數鬧到七彩, 所以我同d阿哥一早預過大禮呢一日會出事, 奈何阿媽都話要返黎娘家過, 咁唯有搵多d人黎!!

我講左唔會出席, 因為過大禮我係唔應該係度嘛, 咁二佬話會到, 但得佢一個真係搞唔到父母, 三佬就話ok會到, 我地真係好驚會開片, 咁二佬專登帶埋兩個女同埋二嫂一齊上去, 諗住老豆會收下火!!

不幸既事接二連三, 首先三佬11:00話遲到, 佢仲係鰂魚涌, 之後11:20二佬就話已鬧交, 我就急call男友唔好上去住了!

唉, 嘈左陣老豆出街了, 三佬到了, 男友等左陣都上去了, 我唔係現場, 唔知氣氛係點, 不過男友話冇乜野, 每個人都好識做戲, 結果都叫做順利完成過大禮!!

之前我叫左佢地要影相, 尤其係幫媽媽影, 因為我知佢都幾重視今次過大禮, 想佢可以留念, 佢地都好乖幫我影左, 仲即刻send黎, 媽媽都笑得出, 佢仲話對耳環好靚, 哈哈!!

男友之後要去拎d禮去嫲嫲屋企拜先, 先再拎返男家, 夜晚再係男家同親戚們食飯, 而我就晏晝搵定位等佢地飲茶, 鴻星飲茶好貴呀, 6大3小飲左我六百幾蚊, 好肉痛!!而我仲開始擔心, 大婚當日父母會唔會都會咁嘈一輪, 好驚呀!!!

我地過大禮算好少野咋, 個紙袋係我之前一晚執架!

呢個禮盒係啤俾我架, 真係好好用, 多謝!

交收過程, 張相係我要求, 好好笑!!

媽媽最初知我買左金耳環仲話我娘, 點知一見到就話靚!

我既博藝會炸彈, 左下係三個唔同色既利是封, 右下係餅卡!

結婚証書套相

多謝好多朋友仔支持, 老實講, 呢排真係訓得好差, 一合埋眼就會諗結婚既野, 越諗越驚, 係驚到會有離心既感覺, 我會不斷叫自己relax架喇!!

呢幾日忙於搞過大禮, 搵相搵歌外, 仲去左曬相, 用黎入結婚証書套!!

之前提過, 其實收到個套真係冇為意要曬相, 係戴律師提我地咋, 佢仲話一定要帶個証書套去, 到時一簽完就要入起佢, 如果唔係好易唔見架!!

不過又有結左婚既朋友同我講, 成日要用張証書, 所以拎左幾次出黎後冇放返入個套了, 只係攝埋係床底!

好喇, 去邊度曬相好呢? 最穩陣係快圖美啦, 曬一張相我都費事格價了, A4 size係叫8F, 快圖美收$20一張, 我覺得好貴呀!! 

揀相方面, 因為個框係楕圓形, 我要揀一張打直, 而且個人仲要係正中間先得, 真係有d難度, 個人感覺証書套用既相係襯室內景, 所以我係mona lisa既相度, 基於所有要求, 其實都唔難揀, 因為冇乜選擇了!!

拎去曬第二日就有得拎, 入左覺得個套靚左好多, 不過原來個人都係唔夠中間, 男友個頭被cut左少少!!!

俾大家睇下成品啦!!

倒數兩個月的心情

時間過得好快呢, 得返兩個月咋, 仲有好多野未做, 開始感受到壓力!!

唔知係咪壓力太大, 平時好少生粒粒既我, 竟然爆瘡, 仲要全部都好大大粒, 而家情況叫好d, 只係有好多印未退, 我好擔心呀, 嗚嗚!!

上星期發生海難, 好傷心, 所以我上星期都停左手搞結婚野, 今個星期先再開始!

黎梗既星期日就過大禮, 我地大部份都用利是代替, 當然只有我一個做準備, 男友只係安排兩位兄弟幫手搬, 而媽媽同二佬會專登返娘家收野(娘家現只有老豆一個住), 我應該都唔會出席了, 希望佢地搞得掂啦!!

每一日都好攰, 成日驚做漏野, 呢排搞梗個成長片同晚宴音樂, 公司電腦冇聲, 只可以係屋企做, 最慘呢排真係好忙, 真係只可以三更半夜上網搵歌, 好痛苦!!

之前我地每個星期日都會返男友屋企食飯, 睇返原來我都成個月冇上去了, 黎梗既星期日都有野做, 直到十一月都未知, 男友就會趁我平日唔得閒時自己返去食, 唔知我幾時先得閒呢??

倒數兩個月的進度

我們的大日子 : 8 Dec 2012 (Sat)

婚宴地點 : 博藝會 - 宴會廳

出門地點 : 帝景酒店19/F

註冊

註冊地點 : 博藝會 - 宴會廳

註冊時間 : 8 Dec 2012 18:00

証婚律師 : 戴秉信律師

羽毛筆+座 : 未睇

戒指座 : 小小白(龜龜)戒指座

証書套 : "盟" - 已收貨

過大禮

過大禮日子 : 2012年10月14日 (星期日)

過大禮用品 : 已買 

婚紗相及當日攝錄

婚禮攝錄 : 純美新娘 - 小寶(standard) + Ivan (snap) + Steven (video)

成長片段 : 未決定用邊個
   1. The Grand - love story, 未決定用唔用
   2. 純美新娘 - 準備中

即日剪片 : 純美新娘

婚紗相 :
1. The Amor (已影@果欄+石澳+IFC on 9 Feb 2011)
2. G3 (已影@studio+觀塘碼頭+大潭+煤氣燈街+高街 on 29 Apr 2011)
3. Majesty (已影@石板街+域多利監獄+青年會 on 25 Nov 2011)
4. 台灣綠攝影像 (已影@新竹+苗栗 on Oct 2011)
5. Mona Lisa - (已影@山頂+馬灣公園+沙灘+室內) on 11 Feb 2012
6. Grand Photo - (已影@域多利監獄+立法會+拳館+觀塘碼頭+昂船洲大橋) on 31 Mar 2012

服裝

新娘 :

婚紗晚裝(pre-wedding) : 百利純美新娘 + 淘寶

婚紗晚裝(big day) : Legend House (十月尾揀款)

婚紗鞋 : 已買@金都 

晚裝鞋 : 用返婚紗鞋

褂 : 已有(from媽媽)

褂鞋 : 已買@淘寶

Girdle : 已買satami & GLC

Nude bra : 已買

頭紗手套 : 未睇

新郎 :

新郎禮服 : Legend House

新郎恤衫 : Legend House會送一件訂造

皮鞋 : 已買@金都

父母 :

奶奶裙 : 一件@金鳳凰, 後來自己造一條, 呢條唔要了!

外母裙 : 一件@金鳳凰

老爺西裝 : 唔駛買

外父西裝 : 唔駛買

兄弟姊妹 :

伴娘裙 : 訂造@淘寶, 等收貨

伴郎衫 : 已買 

姊妹裙 : 訂造@淘寶, 等收貨

兄弟衫 : 已買

兄弟呔 : 未睇

化妝飾物

新娘MUA : June Lo

伴娘MUA : Renee Tang

家人MUA : June Lo

姊妹MUA : Renee Tang / Joey Wong

頭飾 : June提供

頸飾 : 哥哥提供水晶飾物

手飾 : 哥哥提供水晶飾物

結婚戒指 : 已買@ADIAMOND

嫁妝 : 當買左

花車佈置

主花車 : 阿達 - 紫色倫敦的士

其他車 : 用博藝會送既benz轉24座, 已book未confirm行程

結婚花球 (鮮花) : 已訂@Hanahama

結婚花球 (絲花) : 已有

新郎襟花 : 已訂@Hanahama + Wedding Doll

姊妹手花 : 已訂@Wedding Doll

兄弟襟花 : 已訂@Wedding Doll

家人襟花 : 已買材料DIY

婚禮用品

喜帖 : 已印, 欠加工

餅咭 : 已買美心150張

唐餅 : 媽媽話唔駛, 所以過大禮先會買幾件

Wedding Logo : 已有三個

印章 : 已整

利是封 : 已有

放利是福袋 : 未買

人情箱 : 已買, 待Handmade by Mi裝飾

貼紙、囍字、對聯 : 已買

敬茶茶具、碗筷 : 已有(from三佬) + 博藝會提供

咕o臣 : 已有(from三佬)

紅傘 : 未買

睡衣 : 已買@淘寶

上頭用品 : 已買

子孫筒 : 唔買

回門乳豬 : 未睇

結婚公仔 : 已有兩對

龍鳳被 : 已買@千色店

晚宴用品

晚宴backdrop : 博藝會提供

簽名布 : 純美新娘 + 綠攝影像

簽名筆 : Handmade by Mi

晚宴歌曲 : 未諗, 博藝會都有

晚宴司儀 : Alvin 

賓客名單 : 未整

座位表 : 已訂@Hanahama

檯號牌 : 博藝會提供, 可能DIY

餐牌 : 博藝會提供, 可能DIY

啤牌 : 未買

席前小食 : 博藝會100份席前小食+CANDY CORNER

紅酒+VSOP : 男友負責

兄弟姊妹團

伴郎 : 樑少

兄弟 : Dicky, Ka Ki, Kailex, Tak Fu, Tat, Yeung

伴娘 : Mavis

姊妹 : Amanda, Eppie, Escher, Eva, Pet Pet, Shirley

當日程序

當日rundown : 男友負責

分工表 : 未整

Package List : 未整

其他各項準備

婚前檢查 : 未睇

試菜 : 我自己飲過當試左 + 同長老去左飲茶 

蜜月旅行 : 一月去關島參加朋友婚禮, 蜜月會延期至三四月, 多數去歐洲

新居 : 已有 

三位阿嫂的衫@金鳳凰

之前講過男友媽同嫲嫲突然話唔要hold左既兩件衫, 最後決定加錢轉俾阿嫂們!!

打過去金鳳凰, 轉款每件加$380, 兩件即係$760, 咁我用coupon租一件都係$493, 就同佢講下價, 我有三個阿嫂, 如果我租多件, 可以唔收我轉款錢嗎? 講完一輪, 佢都係話只可以免收一件, 即係我加多$380+$493, 就可以租三件衫俾佢地, 都ok啦!!

金鳳凰真係好爆, 星期六日全爆, 平日放工時間要預約兩星期, 終於都同三位阿嫂上左去了!!

三個女人一個墟果然冇錯, 一上到去睇相簿, 佢地已經係咁傾梗, 基本上係傾多過揀, 我同男友都好無奈, 見到個staff有d不耐煩, 催左佢地兩次, 其實主要係三嫂上年生完bb未修好身, 好難搵衫, 佢想揀黑色, 但係我屋企人一定唔會鍾意, 就係咁佢地講足半個鐘都未揀到一件!

大嫂二嫂生完兩個, 反而仲fit過我, 真係自愧不如, 佢地話自己好易揀, 只係幫三嫂揀好先, 幾經辛苦真係揀左件黑色裙黎試!

試完都ok, 不過我哥驚黑色真係俾人話, 話最好唔好, 結果又要再揀過!!

三嫂繼續揀唔到, 佢話三佬剪完頭髮上來一齊揀, 咁要等佢, 就大嫂同二嫂試先了, 大嫂係model身型, 超高超瘦, 人地試完企個台照鏡, 個staff都叫佢唔駛企都夠高了, 佢試左幾件都ok, model身型果然係唔同, 不過因為要湊女, 佢最後都係要揀d安全既衫, 即係可以帶返有帶bra既款, 好快就揀好了!!

之後到二嫂, 佢同我差唔多高但係身型超好, 即係應大則大應細則細個隻, 好鬼羨慕, 又係試幾款都鍾意, 佢本身想揀粉紅色或紫, 但紫會同我撞(我九成會揀紫色既衫), 粉紅佢又睇唔中, 最後我揀左件門口公仔著住既俾佢, 佢一試就話好了, 咁又搞掂!!

到三嫂了, 三佬上到黎後, 係咁話我三嫂肥, 好衰呀, 個陣已經九點, 阻住人地收工, 試左幾件, 三嫂鎖定係要淺色, 但有d又冇期, 有d又改唔到佢size, 搞到最後先搵到條叫做滿意, 九點幾先走, 飯都未食呢!!

呢件係大嫂既款!

呢件係二嫂, model都係二嫂, 網上冇呢件衫, 唔知係咪新款呢?

呢件係三嫂~