博藝會俾大訂+新地顫

琴日除左見律師, 仲有係去博藝會俾大訂, 其實8/10俾都得, 不過我費事平日放工夜晚黎, 反正今日請左假又有時間, 就今日俾了!!

除左俾大訂, 仲要約埋琴師, book車, 酒店, 揀椅套等等, 佢話有齊碟就要再約上黎試, 一般係下晝時間, 不過年尾多人結婚, 真係難book, 要早d約!!

椅套有三個選擇, 紫椅套+深紅枱布, 綠椅套+金枱布, 金椅套+銀枱布, 我當然揀左紫色啦, 另外原來4M鋪左銀灰色毛毛地顫, 俾完錢我就即刻衝左上去睇!!

咁橋冇人係度, 又係用梗紫色椅套, 就係度大影特影, 銀灰色地顫係唔錯, 但我心水係白色啊, 仲叫左hanahama幫我鋪白色毛毛, 男友話既然個場有就唔駛再另外鋪啦, 搞到我好煩惱, 夾硬鋪又真係好似幾無謂!!

問過hanahama, 佢話可以轉其他, 但係有咩選擇就要遲d先覆我, 點解咁多突發事架??

其實我覺得個檯布有d深色, 不過個椅套就好靚!

依然係全白布景, 有兩個燈同一棵樹裝飾, 樓梯改左做一級, 同4樓一樣!

係個台上面影返落黎, 原來個琴係呢度!

見律師+擬結婚通知書

琴日好充實, 同男友下晝放假搞結婚既野, 首先去博藝會俾大訂(下篇再講), 再去見律師!!

戴律師一日見四對新人, 上晝兩對下晝兩對, 我地揀左最晏既16:00!

上到去俾左d文件我地睇, 有擬結婚通知書, 我地既模擬結婚証書, 仲有誓詞, 佢建議我地背左佢, 因為拎住張卡我地就會成日低頭, 影相唔靚喎, 雖然段誓詞唔長, 但我好驚到時一緊張就背錯, 不過佢話到時會提我地!!

之後就提我地準備簽名筆, 戒指枕同証書套, 多得佢問我地晒左相未, 因為我地真係冇左件事!!! 

睇下d文件有冇打錯野, 之後就簽名, 我好驚到時簽結婚証書會手震, 因為琴日簽個陣我地真係有手震, 哈哈!!!

搞掂文件後就傾計了, 佢有個助手take notes, 首先問我地想個儀式係點, 氣氛係點, 輕鬆定嚴肅, 我地當然揀左輕鬆, 太嚴肅我地到時會仲驚的!!

再講到進場, 我選擇左由爸爸/哥哥帶入場, 始終覺得未註冊應該係咁, 到march in先一齊拖住進場啦!!

講完註冊, 佢想了解我地, 就傾下計, 佢問我地點識, 點一齊, 點解會結婚, 覺得對方有咩好等等, 嘩...好似做梗婚前輔導咁呀, 有好多野連我都冇問過冇聽過, 講到有d眼濕濕添呀!!

成個過程一個鐘多d, 我地五點幾就走了, 唔知係咪傾完計, 男友突然對我好好, 竟然提出去中環食豚王, 佢平時係勁抗拒食拉麵架!!

總括黎講, 我覺得戴律師都幾好, 起碼都叫後生仔, o岩傾d, 希望到時註冊儀式順順利利啦!!

帖加工完成+帖封加工

幾經辛苦, 終於壓晒二百幾張帖了, 男友真係一張都冇幫到手!!

我已經開始印梗帖封了, 印左七成左右, 剩低因為係中文, 格式上要問下人先, 同埋順便問埋朋友會唔會到, 如果唔到我唔炸佢地了!!

搞掂張帖, 輪到帖封了, 會用天使punch, 另外我又敗家了, 買左個ms punch返黎, 哈哈, 試整一下, 好鍾意呀, 不過煩好多, 我諗我整唔到二百幾張架喇, 唯有揀人黎整!!

MM到手

等了兩星期, 同事終於回來了, 呢兩星期要做埋佢個份, 好鬼忙呢!!

當然佢都好好, 帶左我買既M&M返黎, 佢大包俾我個陣嚇左跳, 因為都幾大包, 一拆出黎, 原來只係包裝大, 裡面全部係bubble紙, 個三包朱古力原來得好少咋!!

我訂既係7oz, 大約係手掌心咁大包, 不過都幾full同重手, 問過人三包應該ok, 希望倒出黎唔覺咁少啦, 不過我都仲有好多野食既!!

印刷比我想像中好, d字都清楚, 望住佢地好想即刻拆黎食呀!!

To Do List - Jun~Sep 2012 - 進度

仲有半個月就十月, 仲有一個月就過大禮, 好忙好忙, update住個list先!

1. 訂造姊妹裙 - 未齊size, 預計九月尾訂
2. 買過大禮用品 - 七七八八, 欠果籃
3. 寫rundown, checklist - 交左俾男友, 應該冇郁過
4. 訂兄弟恤衫同bowtie - 恤衫已訂, bowtie未揀好
5. 上表嫂度試裙 - 約左25/9
6. 買利是封, 囍字貼等等 - done
7. 印帖 - done
8. 叫男友帶佢老豆同細佬造西裝 - 未, 唔理佢喇
9. 買龍鳳被 - done
10. 準備賓客名單 - 準備中
11. 訂m&m - done
12. 訂紅酒 - 男友負責


另外, 黎梗下半個月好忙, 25/9試衫, 26/9見律師, 27/9陪三個阿嫂去金鳳凰!

點解要去金鳳凰呢? 事緣之前book左既奶奶+媽咪衫, 一早俾左三件錢: 媽媽, 99, 男友嫲, 點知....未來99之後又話唔鍾意, 走去造過條裙, 再話佢嫲諗住著返以前娶新抱既裙, 所以....佢地兩條裙唔要喇!!!

我將呢件事同二嫂講, 佢話, 反正佢地都要買裙, 一係睇下有冇佢地o岩既, 加錢轉款佢地著囉, 金鳳凰轉款每件$380, 我有三個阿嫂, 打過去問, 如果租多件會用coupon價$500, 咁如果我confirm加多件, 就免我一件轉衫費, 即係我補多$880就可以租三件衫俾佢地, 不過最緊要係佢地睇中款, 所以約左27/9一齊上去了, 如果唔係, 我就唯有蝕左$1000出去啦!!

帖加工-cuttlebug

仲有差唔多一個月就派帖了, 呢個月要快快搞掂過大禮同帖既野!!

拎左部cuttlebug出黎, 其實之前都諗左點整, 不過我硬係覺得個模太花, 結果我又敗家了, 買左另一個模返黎!!

一收到就俾男友睇, 點知佢個樣話我知佢唔鍾意囉, 返到屋企我即刻整一次佢睇, 整完出黎佢又好鍾意喎, 話好似呢個花襯張帖多d, 好野, 咁我可以改用新模喇!!

之前諗住再加punch, 不過諗諗下都係費事了, 一來懶, 二來怕唔夠時間, 張帖都幾硬, 用punch打花好o徒力架, 我怕自己半途而廢!!

呢個係原本有既模, 其實都靚架, 不過我又嫌太花!

新買既模壓出黎, 好似清d, 男友話比較中式, 襯張帖多d!

Fancl Deluxe Tense Up

倒數三個月, 除了忙, 仲要開始保養一下, 除左減肥, 仲要護膚, 減肥呢家野, 個個都話結婚前會自然瘦, 所以我放輕左腳步, 只係盡量唔食太飽, 免得食大個胃!

護膚方面, 剛剛已經買左9盒(90日份量)既fancl tense up, 其實以前都飲過, 可能當時年紀仲細, 覺得冇乜分別, 但而家年紀大, 唔知會唔會見效d呢?

市面上有好多類似既骨膠原補充飲品, 揀fancl原因係我本身係vip, 有85折, 另一原因係身邊幾位朋友都話真係掂, 佢地結婚前都有飲, 有d仲keep住, 因為佢地次次都係搵我買, 所以唔會呃我, 不過真係好貴呀!

朋友話最近有折上折, 又搵我幫佢買, 咁我都唔執輸, 乘機入貨了, 計好數係倒數90日開始飲, 希望飲完皮膚真係好似佢講得咁好, 女人錢真係易賺!!!

膠原蛋白如肌膚彈弓
	維持肌膚彈性及緊緻度，擴大儲水空間，令肌膚水潤、柔滑、無紋。但因年齡、紫外光、壓力、疲倦等原因，膠原蛋白會加速流失，導致肌膚乾燥、皺紋、毛孔變粗、鬆弛等老化跡象
專利三肽膠原蛋白
	含有以高科技獨家研發之三肽膠原蛋白，有效合成肌膚所需的膠原蛋白，最易被肌膚吸收。其促進膠原蛋白合成效果獲日本專利 (第 3802721 號)
抗光老化蘋果多酚
	富含大量原花青素，高效抗氧化，保護肌膚強力防禦紫外光引起的光老化，改善肌膚乾燥、粗糙及皺紋等問題
柔滑水嫩元素
	全新配方，速效修護肌膚。配合多種柔滑水嫩元素輔酵素Q10、細胞間脂質、透明質酸、維他命C及E，為細胞提供能量，提升肌膚保濕及抗氧功能，重拾嫩滑、緊緻

倒數三個月的進度

我們的大日子 : 8 Dec 2012 (Sat)

婚宴地點 : 博藝會 - 宴會廳

出門地點 : 帝景酒店19/F

註冊

註冊地點 : 博藝會 - 宴會廳

註冊時間 : 8 Dec 2012 18:00

証婚律師 : 戴秉信律師

羽毛筆+座 : 未睇

戒指座 : 小小白(龜龜)戒指座

証書套 : "盟" - 已收貨

過大禮

過大禮日子 : 2012年10月14日 (星期日)

過大禮用品 : 未買

婚紗相及當日攝錄

婚禮攝錄 : 純美新娘 - 小寶(standard) + Ivan (snap) + Steven (video)

成長片段 : 未決定用邊個
   1. The Amor - 連our love story, 朋友已整, 會再改
   2. 純美新娘 - 未必會整

即日剪片 : 純美新娘

婚紗相 :
1. The Amor (已影@果欄+石澳+IFC on 9 Feb 2011)
2. G3 (已影@studio+觀塘碼頭+大潭+煤氣燈街+高街 on 29 Apr 2011)
3. Majesty (已影@石板街+域多利監獄+青年會 on 25 Nov 2011)
4. 台灣綠攝影像 (已影@新竹+苗栗 on Oct 2011)
5. Mona Lisa - (已影@山頂+馬灣公園+沙灘+室內) on 11 Feb 2012
6. Grand Photo - (已影@域多利監獄+立法會+拳館+觀塘碼頭+昂船洲大橋) on 31 Mar 2012

服裝

新娘 :

婚紗晚裝(pre-wedding) : 百利純美新娘 + 淘寶

婚紗晚裝(big day) : Legend House (九月尾揀款)

婚紗鞋 : 已買@金都 

晚裝鞋 : 用返婚紗鞋

褂 : 已有(from媽媽)

褂鞋 : 已買@淘寶

Girdle : 已買satami & GLC

Nude bra : 已買

頭紗手套 : 未睇

新郎 :

新郎禮服 : Legend House

新郎恤衫 : Legend House會送一件訂造

皮鞋 : 已買@金都

父母 :

奶奶裙 : 一件@金鳳凰, 後來自己造一條, 呢條唔要了!

外母裙 : 一件@金鳳凰

老爺西裝 : 未睇

外父西裝 : 可能唔駛買

兄弟姊妹 :

伴娘裙 : 等俾size訂造@淘寶

伴郎衫 : 等俾size訂造恤衫@淘寶

姊妹裙 : 等俾size訂造@淘寶

兄弟衫 : 等俾size訂造恤衫@淘寶

化妝飾物

新娘MUA : June Lo

伴娘MUA : Renee Tang

家人MUA : June Lo

姊妹MUA : Renee Tang / Joey Wong

頭飾 : 未睇

頸飾 : 未睇

手飾 : 未睇

結婚戒指 : 已買@ADIAMOND

嫁妝 : 未買, 其實即係咩?

花車佈置

主花車 : 阿達 - 紫色倫敦的士

其他車 : 未睇, 應該用博藝會送既benz轉24座

結婚花球 (鮮花) : 已訂@Hanahama

結婚花球 (絲花) : 已有

新郎襟花 : 已訂@Hanahama + Wedding Doll

姊妹手花 : 已訂@Wedding Doll

兄弟襟花 : 已訂@Wedding Doll

家人襟花 : 已買材料DIY

婚禮用品

喜帖 : 已印, 欠加工

餅咭 : 已買美心150張

唐餅 : 媽媽話唔駛, 所以過大禮先會買幾件

Wedding Logo : 已有三個

印章 : 已整

利是封 : 已有

放利是福袋 : 未買

人情箱 : 已買, 待Handmade by Mi裝飾

貼紙、囍字、對聯 : 未買

敬茶茶具、碗筷 : 已有(from三佬) + 博藝會提供

咕o臣 : 已有(from三佬)

紅傘 : 未買

睡衣 : 已買@淘寶

上頭用品 : 未買

子孫筒 : 唔買

回門乳豬 : 未睇

結婚公仔 : 已有兩對

龍鳳被 : 已買@千色店

晚宴用品

晚宴backdrop : 博藝會提供

簽名布 : 純美新娘 + 綠攝影像

簽名筆 : Handmade by Mi

晚宴歌曲 : 未諗, 博藝會都有

晚宴司儀 : Alvin 

賓客名單 : 未整

座位表 : 已訂@Hanahama

檯號牌 : 博藝會提供, 可能DIY

餐牌 : 博藝會提供, 可能DIY

啤牌 : 未買

席前小食 : 博藝會100份席前小食+CANDY CORNER

紅酒+VSOP : 男友負責

兄弟姊妹團

伴郎 : 樑少

兄弟 : Dicky, Ka Ki, Kailex, Tak Fu, Tat, Yeung

伴娘 : Mavis

姊妹 : Amanda, Eppie, Escher, Eva, Pet Pet, Shirley

當日程序

當日rundown : 男友負責

分工表 : 未整

Package List : 未整

其他各項準備

婚前檢查 : 未睇

試菜 : 我自己飲過當試左 + 同長老去左飲茶 

蜜月旅行 : 一月去關島參加朋友婚禮, 蜜月會延期至三四月, 多數去歐洲

新居 : 已有 

印帖完成

終於都印好帖了, 我地去左出名既昌記印, 稿費$250, 另每張$0.9(燙金字), 如要其他色字要加$0.3張, 我地咁慳當然冇加錢 (雖然我真係好想用其他色)!

我地印左250張, 其實計過只需要200張咋, 但朋友話要預十幾張印衰, 咁又可能會臨時加人, 預鬆d好d, 所以印夠250張, 除返每張係$1.9, 都算抵呢!!

昌記係深水埗, 出地鐵站行10分鐘左右, 大熱天時都幾辛苦, 同埋佢地收七點, 拎帖去印時, 男友要早走一個鐘出去(佢放六點半), 今次印好帖, 佢話唔可以早走喎, 要我一個女仔走去拎250張帖, 冇陰公!!

拎完帖後, 如我想像, 金色帖用燙金字係有少少撞色, 不過...睇到就算啦, 鬼叫我地要慳! 

下一步....就係加工喇, cuttlebug已準備好, 隨時開工了!!

倒數階段

一日內寫三篇blog, 其實想寫好耐, 不過yahoo成日壞, 剩係手花襟花個篇我post左十幾次, 用左幾日先post到囉, 最慘係連save都唔俾, 真係冇乜心機寫!

仲有差唔多三個月就結婚, 開始感到壓力, 開始失眠, 開始擔心, 唯獨未開始瘦, 到底婚前係咪真係會自然瘦? 我覺得我會係例外!

呢幾日特別忙, 一黎同事返左美國, 我要做埋佢個份, 二黎忙於印帖封, 帖加工, 約律師, 約試裙, 準備過大禮, 仲有好多好多要準備, 諗起都想喊!!

前排為過大禮既事又煩左一陣, 不過總算解決了, 如我所願, 一切從簡, 冇用既野會用利是代替, 而禮金方面, 本來同阿媽傾好過大禮俾少少佢先, 剩左既結完婚先俾, 最後都係費事了, 男友決定問屋企人借, 希望我地唔會再為呢樣野煩!

接住落黎仲要開始問下有咩人會到喇, 一到呢個時候我就覺得好尷尬, 唔知點開口問人, 又驚d人覺得我炸佢地, 諗起都頭痛喇!!

提早訂MM

一早諗住會訂印字既M&M, 不過就未搵到人幫我美國帶返黎, 同事屋企係美國, 佢一年會返去一次, 之前問過佢話今年應該唔會返去, 另外我有好多親戚朋友係加拿大, M&M剩係會送美國同加拿大, 但加拿大運費係貴好多的, 所以我一直未諗掂!!

早幾日同事突然話要返美國, 因為佢媽媽病左急住返去, 會留兩星期, 佢係星期四講, 星期六就飛, 所以真係好鬼急, 咁我就即刻上網訂喇!!

之前上網睇話訂個陣好多問題架, 又要美國地址又要美國信用卡, 搞到我好驚失敗, 點知成個過程又好順喎, 係個website非常之慢, 每load一頁都要等幾分鐘, 最後成功訂左了, 仲要無端端有九折添, 一星期送貨, 好彩早訂, 唔係佢返香港都未到!!

至於款式, 顏色係可以揀三個, 我揀左purple, light purple, dark pink(原本想用shimmer pearl, 不過又想sharp d), 另外我揀晒印字, 一黎印相貴少少, 二黎佢實印到走晒樣, 三黎我唔想俾人食! 印字可以揀四款, 可以自己打字(當然只有英文同數字), 另外佢有d圖案你都可以揀, 最後我就揀左名, 日子, just married同i do!

價錢方面, 一包7OZ係$13.99, 訂三包$11.99/包, 美國本地運費$14.99, 折左兌返港紙三百幾!!

就係咁, 我既M&M要提早三個月運返香港, 希望唔會因為天氣轉變而溶啦!!

呢個係我訂造既款~

訂造婚鞋

早兩星期, 終於捉左男友去造鞋, 點解要捉佢造呢? 因為我要知佢對鞋幾高先知自己可以買幾高既鞋!!

男友同我差唔多高, 為左影相好睇d, 我迫佢造有內墊個d鞋, 之前係金都見過, 所以我地又出去睇了!!

上次睇既係金都地庫個間甜蜜蜜, 我地去返個間, 男友好快就揀到了, 原來佢一心想造對尖頭, 真係估佢唔到喎, 原本想造普通皮, 最後變左漆皮, 內墊係3寸, 哈哈, 咁我可以買對2寸既鞋!!

係佢揀鞋途中, 我又係咁拎佢地d鞋試, 又ok喎, 最重要係可以任造, 好似我買婚戒咁, 任造係好開心, 因為唔會同人撞嘛, 試完一輪, 我唔鍾意太誇張既款, 最好係第時著得返添, 所以都係揀返d普通款!

本來我諗住上淘寶造架, 既然呢度可以造, 價錢又差唔多, 最重要係男友俾錢嘛, 咁我就係度造埋了, 男$498, 女$398, 一個月後有得拎喇, 就係咁, 用左幾個字時間, 剩係睇左一間, 就ko兩對婚鞋, 我地都覺得好求其, 唔緊要啦, 反正都冇乜人會睇到對鞋!!

男友揀左呢對, 一模一樣, 由於我掛住自己試鞋, 所以冇理佢著左係咩樣!

我揀左呢款, lace布面, 鞋頭粒石會換第二款, 另外佢話鞋頭個銀邊會幫我加串鏈喎!

因為鍾意蝴蝶, 所以揀呢個蝴蝶石!

博藝會地圖卡加工

一早有blogger提醒博藝會地圖卡只會寫4樓, 所以我地擺4M既人要加工, 曾經諗過自己整過張, 不過都係懶design, 仲要印, 都係簡單化好d!

諗左好耐點加工好, 見到blogger用白色label, 但我又唔想, 如果用透明label佢又冇咁細張, 一定要自己cut, 仲有透明label唔平, 出名既Avery牌子, 我想話其實係我舊公司, 亦係男友現任公司, 咁應該可以係公司拎一張半張返黎啦, 我又唔係用得多, 點知佢話冇喎, 激死我!

最後, 我又係淘寶買左個冇牌子的, 收到後就即刻開工了, 諗下打d乜, 又要度位, 好彩張map card有個吉位, 打好字後就不停copy & paste, 我好慳呀, 務求一張A4 label整滿佢, 哈哈!!

print完後效果唔錯呢, 趁weekend就搞掂佢, 整完黎好滿意呢!!

準備開工, 呢個係加工前既地圖卡~

加工後個位好fit, 哈哈!!

手花襟花到手

話說好耐之前已諗住用公仔做手花襟花, 一來我對花興趣不大, 二來公仔特別d, 之後搵呀搵, 就見到weddingdoll workshop, 問左價後原來同鮮花襟花手花差唔多價, 而且唔駛落訂, 所以HOLD左期先算!

呢間workshop係一個叫kary既女仔開, 所有公仔都係佢手鈎架, 而且佢超忙, 忙到一早爆滿, 好彩我一早HOLD左咋!

早兩星期佢就叫我諗定整咩款, 結果我做左一星期功課, 搵下用咩花咩色點襯等等, 主要搵左兩款花: 雞蛋花同太陽花!

俾兄弟姊妹們投票, 結果雞蛋花勝出, 但我唔捨得唔用太陽花喎, 男友都揀左太陽花, 所以最後決定兄弟姊妹用雞蛋花, 而新郎新娘就用太陽花, 係呀, 我都有手花呀, 冇理由個個有我冇架嘛, 呵呵!

有少少失望, 原來好多野都有限制, 例如花材, 絲帶, 公仔髮型顏色等, 不過冇計, 唯有盡量揀啦! 估唔到KARY咁快手, 幾日就起左貨俾我, 結果我咁早就拎晒手花襟花返黎喇!

姊妹好鍾意手花, 但我諗兄弟會嫌襟花低b, 不過唔理了, 我男友鍾意個襟花咪得囉, 呵呵!!

而我最鍾意係花女個手花, 真係好可愛, 個粉紅色好靚, 可惜佢冇粉藍色, 如果唔係花仔都好靚架!!

好可愛花仔花女~

姊妹手花, 好sharp架!

用左珍珠鏈~

兄弟襟花

遠睇一樣咁低b, 哈哈~

兄弟妹合照

呢個係我既手花, 因為只會襯婚紗, 同埋鍾意羽毛, 所以加左羽毛圍邊~

都係珍珠鏈~

男友襟花, 佢好鍾意呀, 平時都會同我玩公仔, 所以冇話低b!

新郎新娘合照~