上頭睡衣

終於買左上頭睡衣喇, 話說之前都諗住買一般人用既剩色, 不過原來價錢都唔係好平, 仲要唔會再著, 咁我又想買d會著返而且冇乜人撞既款, 又上左淘寶搵, 最後俾我搵到喇, 價錢貴過剩色個d, 但係有花紋架, 而且情侶裝, 我諗我地會再著返!!

俾大家睇下個款啦, 買返黎後我放洗衣機洗左次, 冇縮水, 有冇甩色就唔知喇!

入帖利是封

終於係上星期拎左帖去印, 九月頭就可以拎, 預埋壓花, 入利是封, 餅卡同埋print名, 希望10月中趕得切派啦!!

其實帖呢part我真係好慳, 不過入帖利是封我又想買個靚d特別d, blogger Iris之前俾我既利是封入面都有細size, 不過數量唔夠入帖, 我諗住用黎過大禮同埋俾d長輩到時派利是用, 咁我就有藉口自己買過d, 哈哈!!

行過金都, 好似間間賣既都一樣咁, 而定價都係$20或$25/50個, 不過睇唔o岩, 唯有上淘寶搵下, 俾我搵到好鍾意既款, 係有皇冠架, 不過佢係冇印野, 只係壓花, 我覺得成本應該唔會貴得去邊, 最搞笑係個賣家係寫住, d利是封係香港買, what? 點解我未見過??

我不嬲鍾意冷門野, 即係冇乜人用, 呢個款真係合我心意, 因為真係冇見過人用, 好想好想買!!

諗左成個星期, 覺得香港人係淘寶買一件香港貨, 好似好笨實咁, 好努力咁周圍搵下, 又真係搵唔到呢個款喎, 咁我就問個賣家, 點解我係香港未見過, 佢話佢地同廠訂喎, 同埋香港買係唔平, 如果我係淘寶買, 計返港紙都係$25/50個, 即係同金都個d一樣價, 真係諗到頭爆, 最後當然搵男友求救, 佢一見到個款係皇冠, 就話買啦, 哈哈, 其實我只係要人支持我買, 等我買得安樂d!

就係咁, 我就買左喇, 佢有幾隻色架, 幾隻都好靚, 又有選擇困難, 最後我買左3隻色, 唔同人入唔同色啦, 剩左可以留念呢, 呵呵!!

龍鳳被

上次寫完個龍鳳被選擇困難, 之後好努力再搵, 尤其係淘寶, 因為淘寶真係好平, 奈何大陸多數用床單(一大塊布)唔係床笠, 而我比較鍾意床笠, 感覺冇咁易走位, 不過有d鋪都有訂造, 可以改床笠!

第二個問題係, 原來大陸d床咁大, 閒閒地都五呎或六呎床, 而我屋企係四呎半, 係淘寶基本上係冇乜, 四呎床係香港黎講都叫雙人床, 對佢地講好似係兒童床咁, 款式真係好兒童囉, 所以我搵得好辛苦, 加上又冇得摸個質地, 真係好鬼煩!!

上2星期約左人未夠鐘, 自己一個係千色店行, 見到張ok喎, 冇大大個囍字, 又冇大大個龍鳳, 雖然佢都係龍鳳, 但遠睇係唔覺, 所以符合到男友傳統心理(要龍鳳), 又符合到我之後用得返既要求, 問下個價錢, 床笠枕袋被袋連冷氣被都係$999, 好難得聽到係唔過千, 即刻好心動, 之前我同男友係用開普通雙人被, 但成日搶被, 所以我地想換張加大雙人被, 上個冬天係佢屋企拎左張加大羽絨被返黎, 而家佢送埋加大冷氣被, 真係正, 不過屋企就真係好多被剩喇!!

影左張相返去問男友, 等埋佢ok先買, 佢一聽個價錢就話好, 睇埋個款有佢想要既, 更加好啦, 不過之後我病左, 搞到琴晚先得閒去買, 牌子叫PANG TANG, 我上淘寶搵過搵唔到, 剩係search到香港有個地址, 估計係香港細牌子, 呢款係680針, 不過乜都假, 最緊要係平, 咁就搞掂一樣喇, 買完後冇拎返屋企, 係拎上娘家, 遲d過完大禮順便搵阿哥車返黎!!

龍鳳被係女家買, 當然我媽媽唔會理我, 所以呢$999係我自己俾錢, 同樣道理, 我同左男友講, 過大禮既野我係唔會俾錢架, 哈哈!!