利是封+囍字貼紙

我個blog之前又有問題喇, 寫唔到新post, 仲要有d朋友睇唔到"朋友限定"既野, 以為我冇當佢朋友添, 嗚嗚, 無辜呀, send去yahoo問, 佢竟然話係我電腦問題, 試問某d人睇唔到我blog又關我電腦咩事呀? 來回對答幾次話三日內覆我, 結果都冇囉, 希望呢篇出到啦!!

上次寫完個to do list, blogger iris留言話俾利是封同囍字貼我, 仲要係courier去我公司, 拆開黎睇原來有好多呀, 真係好多謝你呀!!

其實我到而家都未諗要預幾錢封利是, 邊d人派幾錢等等, 呢排睇襯結婚野都頭痛, 希望遲d唔會啦!!

5th Pre-wedding (Mona Lisa) - 收相

等左五個月, 終於收相了, 所有pre-wedding都影晒同收齊相, 日子越黎越近喇!!

呢一輯比我想像中冇咁靚, 不過男友好鍾意張油畫, 一見到就話要即刻掛起佢, 之前仲驚紅色會好恐怖, 但效果又ok喎!

油畫

山頂景

為左呢個青馬橋先影mona lisa, 可惜影得麻麻~

大相簿封面

細相簿封面

我的嫁妝箱

呢排睇梗過大禮既野, 原來真係好複雜架, 最慘係唔知我媽想點, 又講到冇乜所謂但係又會有要求喎, 真係激死, 加上有個傳統的未來老公, 我本人十萬個不願意買椰子, 又食唔到又要擺好耐又貴, 但係佢就話要, 因為有爺有子喎, 識左佢12年, 真係而家先知佢咁鬼傳統囉!!

睇過大禮既同時, 仲有搬嫁妝, 傳統既搬嫁妝係過大禮至出嫁前一日任何一日就得, 不過好多人都貪方便, 同一日就搞掂, 有d甚乎冇搬嫁妝呢樣野添, 我問三嫂時, 佢竟然問返我咩係搬嫁妝!!

本身已經諗住出嫁日會拖行李箱, 方便d嘛, 屋企得一個紫色, 咁諗住買個紅色for搬嫁妝+結婚用, 早係上年已經開始睇定, 因為紅色行李箱真係好難搵到個鍾意, 搵下搵下終於搵到喇, 就係韓國復古款, 淘寶真係乜都有, 仲要有好多色, 桃紅都好靚架, 仲有d配白色, 不過結婚忌白, 都係用返大紅+棕!

原本諗住臨過大禮前大約九月先買, 但上個月忍唔住手就提早淘左返黎, 屋企個紫色係24寸, 所以我今次買左22寸, 連運費計返港紙五百有找, 收到貨時覺得幾靚呀, 仲好輕添, 不過輕到我覺得有d易爛, 應該係用幾塊薄木板造, 外面再包層皮咁, 如果外遊真係要handcarry上機, 否則九成會爛!

大家有興趣上淘寶search 複古行李箱就會見到架喇!!

To Do List - Jun~Sep 2012

之前發生d事, 唔記得寫個to do list, 而家補返先!

1. 訂造姊妹裙
2. 買過大禮用品
3. 寫rundown, checklist
4. 訂兄弟恤衫同bowtie
5. 上表嫂度試裙
6. 買利是封, 囍字貼等等
7. 印帖
8. 叫男友帶佢老豆同細佬造西裝
9. 買龍鳳被
10. 準備賓客名單
11. 訂m&m
12. 訂紅酒

應該仲有野未寫, 得返五個月時間, 開始緊張喇, 唔係為出嫁而緊張, 而係驚d野整唔切而緊張!!