6th Pre-wedding (Grand) - 拍攝日

終於完成最後一輯pre-wedding, 呢一輯係突然加上去既, 因為係朋友影, 呢位朋友其實都幾多要求, 亦好多主意, 所以到最後原定影既地方唔同晒, 亦影耐左!

十點june就黎到幫我化妝了, 第一造型會係冇拖尾婚紗, 所以我都換好先化, 十一點幾就搞掂, 佢仲幫我男友執埋個樣, 攝影c朋友本來話11:45上黎拍下花絮片, 點知遲到, 我地搞掂晒佢都未到!

十二點上到黎拍左陣片, 十二點半就出發了, 第一站係域多利監獄, 攝影c約左其他朋友係個度等, 收到電話話個度好多車, 好難影, 好彩去到時又ok, 我地影左半個鐘左右就轉地方了, 原本話影高街, 臨時又改左立法局!

去到立法局, 竟然冇人, 得我地係度影, 幾部機係度, june幫我影左相, 有張係好似一堆龍友咁, 真係好好笑!

影左陣下一站就到銅鑼灣朋友既拳館, 呢度發生左小小意外, 就係朋友記錯日子, 上到去成堆學生上梗堂, 搞到我地好尷尬, 好彩佢地讓出地方俾我地影, 仲供應埋拳套, 佢地呢度新開架, 賣既泰拳用品牌子都係獨家, 全港得佢地有得賣, 佢拎左個女仔拳套俾我, 好靚呀, 真係勁鍾意, 掌心係桃紅色, 不過我買黎冇用, 影下相開心下就算!

係拳館影都好辛苦, 因為好熱, 拳館唔興開冷氣, 而我係度著既係拖尾婚紗, 佢地未影過拳館, 所以都要d時間諗下點影, 希望出黎效果ok啦!

影完呢度, 換埋灰色晚裝就搭車去觀塘了, 本來話青衣橋底, 無端端又彈出個觀塘碼頭夜景出黎, 呢度我之前影過日景, 去到觀塘未天黑, 我地就去食飯先了, 食飽飯去到, 原來夜晚真係幾靚, 不過靚既地方唔多, 仲要好多人係度影梗, 唔知影出黎又會點?

係呢度影左好耐, 本來預計七點幾影完, 結果影到八點幾, 佢地仲未夠喉, 換埋紅色晚裝, june幫我化埋呢個妝就走了, 佢幫我set左個好型既頭, d陰梳晒上去, 本來我好抗拒, 怕顯得塊面仲肥, 同埋好老, 但出黎效果都唔錯!

最後一站係昂船洲大橋底, 即係青衣對面, 望到d貨櫃, 人影都冇隻, 仲要好凍, 其實我已經好攰, 佢地好似越影越開心咁, 最後影到成十點幾先走, 佢地仲可以去食宵夜+吹水, 而我返到屋企妝未落頭未洗, 鋪條毛巾係枕頭就瞓了, 兩點幾先起返身沖涼落妝, 想像到我有幾攰!!