4th Pre-wedding (綠攝) - MV

話說係我地出發去台灣前兩日, 攝影師問我有冇興趣加錢拍埋mv, 其實都係d花絮, 價錢超值, 大約港紙$3000, 個陣我都覺得好貴, 不過又好吸引喎, 男友話加, 於是我地又加埋, 哈哈, 我地既錢太易賺喇!!

去到有位叫小安全程拍片, 有d片段係我地影相時佢拍, 有d就真係佢叫我地做, 最多既就係帶戒指同錫錫!

等左幾個月, 終於睇到段片, 原來都成六分幾鐘, 仲要係2首歌合埋做一個mv, 我覺得太長了, 講真連我自己都冇咩心機睇, 同埋佢有d鏡頭拍得幾差, 例如拍得我太肥, 成個雙下巴走左出黎, 笑到烚熟狗頭咁, 仲有就係成段片有2次帶戒指, 駛唔駛咁多呀? 其次係有段男友求婚, 因為係現場收音, 都收得幾差, 仲要我男友講錯左隻字窒左下, 佢地台灣人唔識廣東話當然留意唔到!

好喇, 咁我同返佢地講想點改點改, 佢幫我都改到d, 但因為要夾返2首歌, 始終唔可以大執, 同埋$3000原來真係好平, 香港拍都要, 佢而家仲要成六分幾鐘, 應該叫抵到爛! 可惜係佢改完我都覺得一般, 最大問題佢唔肯cut走求婚個段, 個段真係十分on9 (雖然粗俗, 但真係呢2個字先形容得夠貼切)!

解決方法係, 我決定自己執過, 當然我係唔識, 就周圍問人, 上次幫我拍片個朋友話幫我搞, 仲話好簡單, 其實我係想自己整, 因為我想加插少少pre-wedding相, 不過佢話費事我係咁打去問佢, 所以我都算了, 難得有人幫我整!

我搵左幾首歌, 最後覺得kelly既love paradise同個mv比較夾, 所以搵左呢首, 由六分幾鐘cut到得返三分幾鐘, 都算厲害, 而家呢個mv我就真係幾滿意, 當然未係我心中想要既, 但已經好好, 一路睇我地會回憶返當時個拍攝過程, 真係好開心, 所以話, 其實影婚紗相最重要係enjoy個過程!

講左咁耐, 俾大家睇下段片, 同上次love story段片一樣, 朋友幫我set左要click條link先可以入去睇, 段片我諗住留黎當晚播, 希望大家唔會周圍外傳啦, 記得睇完俾返意見我, 或者如果你地識整, 教下我!

段片因為係copy落黎再執, 所以唔可以做到高清, 朋友話而家已經係最清了!


http://youtu.be/N0R4a2uKe6w

給各bloggers

其實呢個問題一早已發現, 不過真係忍唔住要寫篇blog出黎, 開左呢度年幾, 我既post真係十篇有八篇都係私有化, 都一直有朋友仔會留言叫我加做朋友, 好喇, 我加左你地, 你地點解又唔加返我呢? 係咪應該公平d?

最近執過個blogger list, delete左好多我曾經加做朋友既人, 所以你地突然睇唔到既話, 希望你地明白, 如果要add返, 可以再留言, 或者當中有誤會既, 我既post唔係特別精彩特別好睇, 只係想對大家公平一點!!

我的褂和褂鞋

呢個item又係搞掂好耐, 一直冇寫, 首先講褂, 其實我係唔駛煩, 平時睇你地講試褂揀褂我都搭唔到咀, 因為我冇機會做, 結婚當日我會著返媽媽既褂!

呢套褂係媽媽1971年結婚時訂造, 我唔識分係咩, 當然唔會係貴個d, 唔知係咪擺得太耐, 定本身係咁, 其實都幾淺色, 好似好殘咁, 唔講可能人地以為我係租梗套平野返黎添!

收到套褂之後一直冇試過, 因為我完全冇諗過會唔o岩著, 媽媽都話條裙唔會唔o岩, 因為係綁帶, 驚都係驚上半身, 我都知媽媽當年瘦, 但我諗我唔會肥到整爆件衫卦!

輪到褂鞋, 睇過好多都唔o岩心水, 其實我係想買對鞋之後可以著得返, 上網睇好人都著converse, 所以我都轉左睇converse, 不過紅色cons我真係好難會再著, 因為我本身對紅鞋冇乜興趣, 之後睇到有個女仔著...金色cons, 原來都ok喎, 反正我套褂係紅, 襯對金鞋都好, 咁我就開始睇金色鞋!

本來想買返個女仔個對, 可惜...冇出了, 咁我就上淘寶睇, 見到有對珠片類似cons既款, 價錢又唔係貴, 咁無無聊聊用張相拼下套褂, 好似都ok吖, 最緊要對鞋可以著得返, 或者唔襯咪用黎出街囉, 咁就買左!

買完後第二日, 見到有對更鍾意, 又係金色珠片, 鞋頭有個大蝴蝶結好得意, 又係唔貴, 諗都唔諗又買埋, 哈哈, 成日諗住唔得咪用黎出街著囉, 反正我剛丟左對銀色鞋, 今年轉著金色! 

收到貨後, 就順便拎埋套擺左成年既褂出黎試, 套褂係o岩身, 不過頸位好緊呀, 係我條頸粗定媽媽條頸幼?? 咁著埋對鞋, 男友話襯, 咁我諗帶金器應該會唔差, 所以就當搞掂了, 褂連鞋一齊收返去床底, 到結婚前先再拎出黎了, 而cons個款就留返出街著啦!

整左張無聊之作俾大家睇下先:

左邊係媽媽當年婚照, 我地套褂係一樣架, 平時有人話我同媽媽似樣架, 但呢張又唔覺!

呢對就係第一對睇中既鞋, 無聊整左張合成照睇下襯唔襯, 諗住白色地方貼閃石, 黑色會貼紅色石, 而家唔駛了!

後來睇中既金鞋, 好鍾意個蝴蝶結, 仲有慳返唔駛加工, 下面2張分別係有閃光燈同冇閃光燈影既!

4th Pre-wedding (綠攝) - 成品

終於收到第一樣既結婚成品喇(唔計majesty本細相簿啦), 成箱野24kgs, 運費$800, 內有簽名布x1, 油畫連架x1, 相簿x2, thank you cardx3, 2本相簿一大一細, 封面同內容都係完全一樣, 睇返package明明寫係1本相簿, 咁問返佢地, 原來佢地2本為一組, 因為預左有一本係娘家, 嘩...我阿媽睬我都傻啦, 實話阻地方!!

之前一直煩油畫唔知選邊張, 最後我地決定選3張, 因為佢有一款油畫係3合1, 叫做新款d, 而框我地係選最簡單既純白邊, 估唔到出黎效果ok, 比原先佢包既20x30寸細左, 但係我鍾意, 因為....慳位易放, 哈哈!!

所謂的thank you card, 原來係細相, 背面仲印左係kodak, 本身冇諗住會派, 未必個個想要, 或者到時放reception, 想要先拎, 希望d人唔係拎黎做鏢靶!!

仲有排先結婚, 所以我地已經將所有野放晒去地台, 呢個地台係專放我地結婚用品, 結完婚真係唔知點算好lu!!

有朋友話呢個油畫d相唔match, 因為我係唔執輸每個景揀一張, 冇諗過match唔match既問題!

3款thank you card, 台灣係興男仔名行先, 相簿封面我提左佢要女仔名先, 點知card唔記得左, 不過算啦!

呢個係細相簿, 仲有個白色箱, 幾靚幾厚!

簽名布

包裝十分好, 一d都冇爛, 佢地用個間速遞都好好, 貨到付款, 但我地返梗工冇人開門, 佢話可以放管理處, 我地收到貨先過返數俾佢地!!

4th Pre-wedding (綠攝) - 排版

其實我都對排版一d認識都冇, 不過聽過好多JM投訴D相排版差, 尤其係台灣個D, 搞到我好驚, 前排綠攝叫我睇下有冇問題, 可能load得太慢, 我都冇乜耐性, 開左幾張, 睇完就close, 叫男友睇, 佢同我一樣, 完全冇耐性等, 最後我話冇問題就算, 好似好敷衍咁添!

今日成品就會寄到屋企, 不過我放工要去街有排都未返, 好緊張唔知成品點, 我連自己揀左邊d做咩都唔記得晒, 太求其了, 哈哈!

俾幾張大家睇下先!

6th Pre-wedding (Grand) - 收相

果然朋友影係快手d, 話咁快佢就執左相, 俾左d我放上網, 係度同大家分享下先!

域多利呢幾張算係最靚~

到拳館喇, 好靚好特別, 不過似賣廣告!

觀塘碼頭夜景

昂船洲大橋, 呢張影到個人鼻屎咁大, 原來佢地專登, 唔怪得揀呢套紅色衫!

金耳環

一早已經諗住自己買對金耳環襯褂, 因為屋企人係買鈪, 咁我又唔想對耳仔冇野, 唯有自己買啦, 其實我都有對minnie mouse既金耳環, 不過係我十幾年前既男友送, 佢送過好多金俾我, 戒指2隻, 手鏈, 耳環, 鏈咀, 當年金價平嘛, 好似三千幾咋, 而家真係貴左好多倍, 原本想拎晒d金去溶, 不過好似好衰咁, 做唔出, 唯有繼續擺!

早幾日金價去到$16600, 又咁橋放工得閒, 就同男友去左旺角睇了, 我心目中既款式都係吊吊下既款, 我平時帶既耳環都係呢d款, 始終覺得一粒個d帶左都唔覺咁!

先睇周生生, 勁少款, 我地連坐都冇坐就走, 第二間去六福, 我以前d金多數都係六福買, 因為d款o岩d, 一坐低個sales拎晒d囍字款俾我睇, 勁好service, 仲俾我任試任影, 已經睇中左一對, 價錢係三千幾, 我覺得幾好, 當然同佢講價, 點知佢真係企到好硬, 只係平廿幾蚊咁大把, 我唯有出絕招起身走人, 話咁我再睇下先, 點知佢都唔留我, 就知道真係冇價講! 

之後去左謝瑞麟, 佢對招牌波波囍字好靚呀, 不過真係近睇先睇到囍字, 同埋要成五千幾, 應該係手工貴, 咁同六福比爭成二千蚊, 又覺得唔值, 之後試埋龍鳳款, 但都係鍾意囍字多d, 唯有走人!

第四間去周大福, 呢間service勁差囉, 個女人好似諗住我冇幫襯咁, 我話想要結婚個d款, 佢答我冇囉, 之後好求其地搵一對勁大既花花俾我, 話呢對啦, 花花都可以結婚帶, 呢個花夠大, 好得體, 都係五千幾, 佢呢d service就算我睇中都唔會幫襯, 唔執輸試完後就走!

最後係六福收鋪前走返去買, 一心諗住自己俾錢買, 點知我男友拎張卡出黎碌, 嘩....真係冧到呢, 哈哈, 慳返幾千!!

請各位專注對耳環, 唔好理我個素顏殘樣!

六福既幾款囍字耳環, 一眼睇最鍾意左一, 其實左二都ok, 但我唔鍾意個囍字分開!

最鍾意呢對~

近睇, 真係唔錯呢, 又有心心又有囍字!

純粹玩野既, 唔係結婚款~

謝瑞麟波波囍字, 個個都鍾意呢對, 可惜...貴!

龍鳳款, 唔差架, 都係貴, 同埋我鍾意囍字多d!

勁差service既周大福, 俾呢個大花花我試, 雖然好大但都係五千幾!

My Candy Corner

之前提過會有candy corner, 仲一路構思咁要訂d乜, 有一日發嫂突然send料黎, 有間Easy Decoration開左冇耐, 只需要訂糖果, 佢會帶埋d candy jar黎幫你佈置, 而且價錢好抵, 佢有幾個package的, 最初我有d抗拒, 因為佢package既野我都唔係全部o岩心水, 後來email同老板娘Elaine傾左一輪, 原來自由度好大的, 我就即刻落訂confirm了!!

Elaine係剛剛結婚冇耐, 同佢都幾o岩傾, 我好直接同佢講其實我已經有好多野, 未必會同佢訂好多, 但佢都好好心機一直回覆, 仲俾我唔跟package, 到時d糖會實報實銷, 真係very good, 最開心係佢帶晒d candy jar同cupcake stand黎, 我唔駛淘返黎之後又賣出去咁煩, 又唔駛煩運輸途中會整爛, 又唔駛煩搵邊個姊妹幫我佈置, 真係正正正!

同Elaine傾開先知原來都係淘寶怪, 佢話睇中左個摩天輪cupcake stand, 不過驚d人唔鍾意, 睇完二話不說叫佢訂啦, 因為我超鍾意, 好o岩我呢d鍾意童話feel既人, 見到佢最近又淘左新野返黎, 全部都好靚, 真係好開心!!

本來我想淘埋爆谷機同棉花糖機, 不過真係太多野了, 咁我慳返幾百蚊唔淘啦, 其實計落我真係有好多席前食物, 唔怕人餓襯, 最怕人食得太飽, 呵呵, 數下先:

博藝會: 席前小食(鳳尾蝦, 特長春卷, 燕窩蛋撻, 鴨胸沙律)100份
自購: 印字m&m 大約磅半至2磅
Ms.B: cupcake 80個 (暫定40個buttercream皇冠+40個icing蝴蝶花花)
Easy Decoration:
婚禮形狀餅 20塊
長條餅 數目未定
彩色軟糖 數目未定
果汁糖 數目未定
wedding cookies 2磅

放幾張相上黎吊下癮先