家長日+長老睇場+媽咪衫

其實之前煩媽咪衫都煩左好耐, 因為好多間都好貴呀, 我地問過2位媽咪都話每人1套就ok, 問過幾間租2套都要千幾二千, 朋友提到金鳳凰, 上網睇下都幾多款, 見到有擺大舞台既blogger話有coupon好抵, 咁我就即刻返去搵, 原來我都有呀, 免費珠片褂我就唔駛喇, $1480/三套衫就非常好, 就決定呢間!!

我地呢D大懶人, 梗係唔想出黎咁多次, 於是就諗住同一日雙方家長見面, 帶佢地去博藝會, 之後再睇衫,哈哈, 男友媽媽要輪班工作, 終於約到19/2放假出黎!

約左去博藝會飲茶, 男友十二點幾去到霸位, 佢話我地擺既4M滿晒, 但4樓就好多位, 我就帶媽媽由荃灣搭巴士去, 個個問我緊唔緊張, 老實講我又唔緊張喎, 都係循例見下, 唔會無端端大打出手卦!

我地1點去到連4樓都滿晒喇, 原來除左男友父母, 連佢嫲嫲都有黎!

呢度飲茶都唔平, 野食又少款, 想叫個燒味飯都冇, 瑤柱蛋白炒飲要$98, 不過一分錢一分貨, D野食好好味, 幾位長輩都係咁讚, 放心晒!

下一站係去金鳳凰, book左15:30, 上到去係一位叫kelly chan既女仔招呼我地, 叫我地先睇相簿, mark低想試咩款, 試衫費$380, 如果join就可扣除, 其實我都一心諗住join呢間, 所以冇理了!

主婚人衫既相簿有2本, 我媽睇第1本時一路話d衫唔得, 因為好暴露, 原來呢本多西式裙, 到第2本先係d有袖同長衫, 點知睇完晒2位媽咪都話冇心水, 嚇死我地, 於是我就做下sales, 係咁sell媽媽, 其實係佢之前幾次娶新抱都係金都租, 就歧視呢度, 佢話返金都睇, 我即刻講一大輪, 金都多黑店, 又貴, d款差唔多姐, 呢度算好多款啦, 咁佢再睇一次, 一路睇我一路sell, 結果mark左好多件試!

試完2套kelly話媽媽瘦可以著企領, 媽媽自己都有要求: 唔太紅, 最好沉色, 要長袖, 唔暴露, 試多2套就confirm了, 勁開心!

因為有3套衫, 為免蝕一套或者出現其中一位媽媽有2套既情況, 我叫埋佢嫲嫲試, 反正我嫲嫲都大把呢D飲衫架啦, kelly即刻拎左件話o岩佢, 結果一擊即中, 又搞掂!

輪到未來99, 佢mark得仲多衫, 試左2套kelly話佢身型(肥矮)唔適宜著兩件頭個d 同埋唔好著企領, 拎左件桃紅色俾佢試, 結果著得佢瘦左, 個個都讚好睇, 試多2套都係決定呢套, 其實我覺得太sharp架, 不過是但啦, 最緊要揀到, 咁就乖乖俾錢, 到big day前2星期左右黎final fitting就ok了!!

今日總算大成功, 見家長尚算平安渡過, 估計佢地到big day先會再見面, 媽咪衫用左一粒鐘就ko了, 非常之好, 多得呢位kelly小姐, 佢真係好好, 值得一讚!

媽媽揀既衫, 佢嫌上身太透喎, 所以會加披肩!

男友嫲嫲揀既衫~

未來99既衫, 好sharp~