5th Pre-wedding (Mona Lisa) - 拍攝日

呢輯係最後一輯pre-wedding喇, 有d唔捨得添, 我都算黑仔喇, 首先係減肥失敗, 其次係影個日特別凍, 我記得想當年三佬三嫂11度去石澳影, 返黎話有低溫症, 點知今日輪到我, 不過我唔係去石澳, 係上山頂, 又係11度, 真係凍到發癲!

由頭開始講起, 約左10:15入到馬灣mona lisa, 我既mua叫angela, 廣東話唔正架, 之前都冇聽過佢個名, 有少少擔心, 好彩佢好好呀, 如果我未搵mua真係會考慮用佢!

化左大約一個鐘就換衫, 之後同攝影師傾陣, 佢叫alan, 好後生好斯文, 希望影得好啦, 傾完就出發, 同行有司機, 攝影師, 攝影助手, 仲有個女仔幫我拎褸同補妝, 好似好大陣仗咁添!

第一站係山頂, 我著左黑白晚裝, 個妝同頭我都好滿意, 不過凍到發癲呀, 冇風都還好, 有風真係好難頂, 我男友仲夠膽死同我講好凍, 真係想俾我鬧!呢度好多遊客, 好多人影我添, 希望唔會俾人擺上網啦!

影左2個幾鐘就搭車返馬灣了, 返到去換衫補妝set頭食飯, 第二站係馬灣公園+沙灘, 我換左婚紗, 今次個頭我覺得麻麻, 係頭頂好似雀巢咁, 男友話咩都試下, 所以就由佢, 原來我係唔襯呢類髮型的! 馬灣公園好多人影呀, 搞到有d位要排隊, 有d人真係好意思, 霸住個鐘既位置好耐都唔走, 最後我地放棄左冇影!

去完公園去沙灘, 已經夠凍啦, 仲要係度玩水同瞓沙灘, 真係攞黎賤, 影完就返影樓了, 終於可以舒舒服服影室內!

第三條裙係我最尾揀既紫色, 因為冇試過就confirm左, 佢唔靚我就pk架喇, 好彩原來好靚架, 著完出黎聽到幾個人話好靚, angela話條裙新, 冇乜見人著過, 可能因為佢網上張相太黑唔太起眼, 冇乜人揀!

第三個造型我都好鍾意, 呢個先係我主打, 因為我係為左個青馬橋夜景先俾錢黎影架, 一定要靚呀!!

呢度好多佈景板, 全部都好靚, 除左影室內, 我地又落多次沙灘, 佢話玩effect喎, 唔知出黎效果係點呢?

我地影到成八點幾呀, 好多人都走左, 拿拿聲換衫走, 不過成腳沙好辛苦, 返去一定要由頭洗到落腳呀!!

影左咁多次最辛苦係今次, 返到我對住個暖風機吹左好耐都仲全身發冷, 好彩既係冇冷病, 証明我都幾強壯吖!

一個星期後揀相, 到時再上黎post!

山頂造型, 好鍾意個頭呀!

婚紗造型, 我唔鍾意呢個頭呀, 成個癲婆咁!

呢條裙成條都係紫色珠片, 好閃好靚架, 冇後悔轉到呢條!!

花左$300大元既gel甲, 同隻戒指好襯, 哈哈!