3rd Pre-wedding (Majesty) - 拍攝日

改左幾次期, 終於都影到喇, 其實之前都好擔心, 因為我地未約實時間, 又冇人打黎喎, 而根據之前幾次改期經驗, 佢地係好難搵架, 結果我之前一朝係咁打電話, 點知都係
唔通, 去到下晝都驚驚地, 影唔到都唔緊要, 最大問題係我地請唔請假好?? 最後打左去團購間公司mycutepons投訴, 估唔到佢地又幾好喎, 唔駛左駁右駁電話, 個女仔仲
要好好人話幫我跟進下, 過冇耐majesty就有人打黎覆時間了, 我地係影下晝中西區, 可以瞓晏d, 嘻嘻!

我地一點去到majesty, 有一pair人係度剛化完妝, 佢地好似係廣州黎架, 仲要琴晚先影完夜景, 今日影第二日, 最好笑係帶埋個媽媽黎一齊影!  其實我本來對呢輯已經
冇期望, 因為都影左3次, 開始麻木左, 仲要係咁平, 不過個化妝師都ok, 比我想像中好, 當然佢乘機搵下客, 我話搵左mua了, 之後佢話姊妹妝都會接, $250個, 我覺得都
ok喎, 就拎左佢資料話遲d搵佢! 化妝期間都聽到好多野, 原來呢間公司之前出左問題, d女仔走晒, 搞到d單好亂, 除左我琴日鬧完佢地, 今日佢地又俾人打黎鬧, 不過個女
仔算幾好, 可能係慣左, 仲好好禮貌回覆人, 包括我琴日在內啦, 哈!!

用左個幾鐘時間搞掂就出去影了, 第一站係石板街, 行過去就得, 第二站係域多利監獄, 又係行過去, 影呢度要排隊, 黎到有2pair影梗, 等左大約20分鐘先到我地! 影完呢
度我地就搭的士去青年會了, 個死人的士佬勁惡死, 又話呢度上車好遠呀, 又話唔識路, 根本唔想做我地生意咁, 你都係跟錶收錢之嘛, 嘈乜鬼, 我男友嬲嬲地話都上左車,
你咪照計囉! 黎到影時咁橋青年會有活動散會, 好多人行過呀, 我地影左幾張就走了, 因為趕住睇戲!!

個package係影2粒鐘, 琴日打過黎問佢話我5點會走得, 所以琴晚同男友就係ISQUARE買5:40既戲飛, 我都知有D過份, 其實買完都笨左, 平日5:40實唔會爆啦, 咁早買
把鬼咩, 結果我地咪趕頭趕命咁走囉, 好彩入到場剛剛開始!!

全程得一個攝影師, 所以冇人幫我地影花絮, 大約兩星期就可以上去揀相喇!!

呢度係石板街附近, 男友第一次著銀色禮服~

呢隻公仔件衫同我條裙好襯, 都係金色, 所以揀左帶佢地黎~

終於睇到成條裙, 金色未著過要試下~

呢度好多流浪貓, 咁橋黎到有個女仔餵梗d貓, 有隻仲走黎搞我個袋添! >.<

兄弟姊妹換人

本身都以為兄弟姊妹團係定好晒, 成日聽見d人話兄弟姊妹人選有改變, 以為唔會發生係我身上, 原來都走唔甩, 本來話有一個男姊妹, 仲有一個女兄弟, 佢地會做埋mc, 結果而家呢兩位都要換喇, 換返全男兄弟同全女姊妹!

呢幾個月發生太多事, 女兄弟係男友係外國既表妹, 本來話會返黎, 而家未知, 所以叫我地唔好預佢, 而另外個男姊妹係我好好朋友, 但係因為佢既不知所謂女朋友, 令到我地鬧左交, 佢呢位女朋友所作所為真係數幾日都數唔完, 簡單黎講, 佢可以令到我生日party上十幾位朋友不約而同地討厭佢, 有d仲要話下次唔想再見到呢個人, 到底係呢個人可怕到咁, 定係我得罪佢, 佢要係我生日party度掃興呢? 而家我地鬧翻左, 佢一定好開心啦!!

定好兄弟姊妹, 我要開始睇下姊妹裙, 兄弟呔同埋手花襟花喇, 不過最頭痛既係要搵mc人選!!

出門酒店 - 帝景酒店

一早已經決定左會book出門酒店, 一黎屋企叫做散晒, 本身既一家六口而家係住梗六間屋, 三個阿哥結婚時都係用嫲嫲青衣既屋企做男家, 因為地方大d, 裝修靚d, 又有海景, 不過做男家就好, 如果做女家我就要之前一晚係度瞓, 又或者個朝天未光去個度, 我又不太想, 其實幾年前我係度住過半年, 都瞓得唔係咁好, 我又唔想打搞嫲嫲, 寧願俾錢book酒店算了!

其實要近屋企都冇咩選擇, 熊貓, 如心, 帝景, 遠東或者黃金, 不過黃金太貴, 熊貓都唔平, 同埋始終覺得呢間酒店個名唔得, 如心又冇套房, 得返帝景可以揀, 而佢地價錢都唔貴, 我地住青龍頭, 每日搭車都會經過呢度, 上星期放假同男友走左去睇, 老實講, 呢度位置真係麻麻, 我諗亦係呢度價錢平既原因, 荃灣搭車入黎都好d, 我地係屋企搭車黎, 落左車差d唔識行, 去到酒店我地話睇房, 個reception叫我地坐陣等, 結果等左10分鐘都冇人理, 男友再去催佢地, 先至有個reception女仔帶我地睇房!

先上頂層19樓, 走廊樓底好高, 我見過呢度有人影相架, 仲有個頂係玻璃, 太陽光透入黎所以好光猛, 第一間睇既2房套, 基本上同上網睇既一樣, 係睡房比較細, 最特別係廁所企缸天花都係玻璃, 咁沖涼咪好似係室外沖咁囉? 哈哈! 呢度個view比我想像中冇咁靚, 可能本身屋企都係向住個海, 所以已經唔覺得有咩特別, 以佢既座向, 朝早應該會係曬到正一正, 希望影相唔會有影響啦!

轉頭就去左9樓睇1房套, 個廳同2房套差唔多大, 其實都ok架, 個view係對正汀九橋, 好似好d, 不過1房套我唔會考慮喇, 驚到時唔夠位俾人塞, 睇完2間房佢話冇得再睇, 因為一日限睇2間喎, 車....我一早講左睇2房套, 佢夾硬俾個1房套我睇, 之後佢話其他2房套都有人住梗冇得睇喎, 咁我問佢其實呢度有幾多間2房套, 佢話基本上每層都有, 10樓都有3間, 不過11-17樓係租俾長住既人唔會for出門!

總括黎講, 真係一分錢一分貨, location係麻麻地, service都麻麻地, 竟然可以冇sales跟呢d出嫁房, 帶房個女仔都冇介紹過間房, 只係開門俾我地睇, 我地問乜佢先答乜, 再問佢呢度冇sales跟呢d架? 佢話你地睇房book房都係要搵返reception, 吹賬! 不過房既內籠都ok, 起碼有個海景, 呢個價錢亦係好抵, 所以都唔會考慮其他!

本來想等睇埋10樓d房先決定, 個女仔都話唔駛咁早book, 不過我地又懶懶地唔想再入黎, 男友話鍾意頂樓, 因為光猛d走廊靚d, 其他樓層走廊會好似一般酒店咁, 而佢話19樓得一間2房套, 所以我地就hold左了, 即時碌左卡先, 佢話到時要cancel都可以, 咁就搞掂了, 其實我地好鬼懶, 咁近都唔願再黎多次, 快快脆脆搞掂左就算, 唔知下次再黎會唔會係我出嫁前呢?

呢幾日係度諗, 橫掂呢度出門, 不如用返而家屋企做男家, 反正男友屋企幾十年冇裝修, 地方又細, 真係影相都冇咁好睇, 不過掙扎既原因係唔想結完婚第二日我要係度執屋, 到時幾十人著住對鞋入黎, 肯定好dirty, 第二日又要還衫又要做清潔工人, 好可憐架嘛, 好煩呀!!!!

獨一無二的成長片段+LOVE STORY

仲有成年幾先到婚期, 點解咁快會講呢一part? 咪又係朋友囉, 我地又做白老鼠喇, 幫我影第一輯pre-wedding既朋友仔呢期愛上拍片, 咁打算推出埋成長片段+love story, 就搵左我地試拍喇, 由於佢趕住係十二月wedding expo俾客睇, 由籌備到完成只係用左一星期咋, 好彩完成後我地都好滿意, 只係我d戲屎d囉!

我諗住big day放出黎, 所以我唔俾佢咁公開post, 佢剩係可以用黎獨立俾客人睇, 哈哈,等我都係度post俾d bloggers睇啦, 如果大家有興趣可以搵佢地拍返輯!

佢話出面唔係好多公司做呢樣野, 有都收好貴, 而佢地既收費將會係$3500, 我覺得算抵, 上次台灣我地加個花絮mv都要三千幾啦!!

其實純美新娘都會包埋成長片段, 咁我仲搵唔搵佢地整好呢?

段片唔係公開片, 所以只可以由link入去, 唔可以post段片係度, 睇完俾d意見呀!!

http://www.youtube.com/watch?v=WyIY9sJlF0w

To Do List - 2011進度

早幾個月寫左個To Do List, 而家睇下個進度如何先:

八月: 訂婚戒 (去台灣影相用) - done, 去博藝會拎返coupon同睇新裝修 - done九月: 準備台灣行程, 影婚照要用既野, 申請台灣簽証 - done十月: 出發台灣, 休息 (嘻嘻) - done, 除左休息
十一至十二月: 睇婚紗晚裝 - done, 去婚展book mona lisa - not yet, 睇出門酒店 - done, 結婚証書 - not yet, 場地佈置 (如有需要) - not yet

進度好似唔錯, 另外個majesty pre-wedding, 個期改左三四次, 而家定左25/11影, 希望唔會再改, 拳館pre-wedding亦都冇得影了, 因為伴郎同朋友夾份開另一間, 咁上開個間就唔會再上, 咁我地都冇得借人個場黎影相, 唯有睇下伴郎佢地個間d裝修得唔得啦!

本來呢個月去wedding expo, 但係朋友會係十二月第一次擺booth, 佢係幫我影第一輯pre-wedding既朋友, 佢地個名叫The Amor, 最近朋友鍾意拍片, 幫我地拍左輯成長片段+love story既片黎放wedding expo, 其實都好趕, 佢係臨時搵我地幫手, 由佢問我再到拍完用左一星期時間都冇, 我地就俾晒童年照+拍埋片, 希望效果出黎ok啦, 如果ok我會擺一年出年big day先俾人睇, 呵呵~

而家既我仲煩惱梗book唔book mona lisa, 問過最平可以加三千幾就影到青馬橋, 我同男友講過用我既錢去影佢好似冇乜野, 所以實行既機會有八成, 嘻嘻!!

搞掂晒d大item, 開始留意下d小item, 例如媽咪衫, 姊妹裙, 花球, 喜帖等等, 我仲未諗得掂book唔book佈置呀!!

四個倉鼠籠內部裝修

由於屋企冇咩位, 所以將個ALEX草莓籠換埋個細籠喇, 而家四個籠都係兩邊係透明板, 兩邊係鐵枝, 佢地做唔到spiderman架喇, 踢木糠都踢少兩邊, 哈哈!!

一直強調自己冇乜DIY天份, 原來有例外的, 就係佢地既內籠, 用左好多時間搜羅用品/玩具去幫佢地裝修, 改左好多次, 又驚佢地悶, 又驚佢地唔開心, 搞完一輪, 終於整到佢地又開心我又滿意!!

呢個係奀吱吱既新籠, 女仔用返紅色, 佢呢個籠比較細, 個轉轉又細, 所以換左, 不過特別之處係佢有個小屋頂, 佢地好鬼鍾意爬上去~

呢個籠同奀吱吱既一樣, 不過係藍色, 因為佢係男仔嘛, 哈哈, 佢爬梗上屋頂!

呢個籠係家姐既, 冇酒桶不過有千秋~

細佬既屋, 同家姐既差唔多, 不過佢唔多鍾意去屋仔~

人情箱到手+爛筆座

話咁快人情箱就到手喇, 好鬼快手, check過d箱冇爛, 原來個紅色心心係貼紙, 可以唔貼都得, 仲有, 除返開都係$40個, 平過好多人買呢!! 由於mi唔得閒, 暫時約左佢18/11出黎食飯, 順便俾d箱佢扮靚靚, 佢會整左另一個blogger既先輪到我, 哈哈, 其實我仲有成年幾先要用, 整完都唔知放邊好!

同時間我睇中左一個紫色燭台好耐, 諗住用佢黎做筆座, 咁問下個賣家, 原來冇乜貨剩, 要買就趁早, 咁我又淘埋佢啦, 點知送到黎爛左少少呀, 最慘係呢個係最後一個了, 好唔開心, 同個賣家講完, 佢肯退返$13俾我, 原價係$23, 其實只係爛少少, 希望用膠紙貼返會冇咁覺眼啦! 另外買左另一個, 比我想像中好, 其實未知要黎做乜, 不過當裝飾又好, 放屋企當燭台都好啦, 買左先算, 呵呵!

完整無缺呀!

爛筆座, 嗚嗚~

呢個係後備~

第一次收成 - 通菜

種左幾個月野, 終於都第一次收成喇, 唔係最先種既車厘茄, 而係網友送既通菜!

之前提過旅行返黎後d茄枯晒, 我加左肥同泥而家佢地出過d新葉, 有一棵仲係似死又未死咁, 真係唔知好冇幫佢了結生命, 讓返個盆出黎好!

其實我唔食通菜架, 不過網友送左d俾我玩下, 話好易種, 於是我就試下啦, 真係好快發芽, 仲要係100%發芽率添, 風吹雨打都死唔去, 我只係種左5粒玩下, 所以到收成只有5條, 哈哈, 俾男友用黎送公仔麵食啦, 不過可能我太耐先收, 冇計啦, 好難等到佢食公仔麵, 前晚佢遲放工返黎話食公仔麵, 我即刻話收d通菜俾佢食, 結果d通菜有d韌囉, 下次真係要早d收好!!

第一次收成好興奮, 聽講仲可以繼續收多幾次, 所以我剪剩腳, 留待下次再收成, 突然間諗, 人地通常都係煮飯, 織冷衫俾男朋友/老公, 我係種菜俾男朋友, 好搞笑呀!!

呢度就係自家種既有機通菜喇!

我們的鋼印

個logo有左好耐架喇, 之前整左印仔, 呢排無無聊聊又想整個鋼印睇下, 本來諗住淘寶訂, 但見好多blogger話香港有間都係$115, 仲要送埋貨, 咁我都搵佢地喇!

send email問資料, 我驚個logo出黎效果會唔好, 佢地話驚個日期太細, 問我有冇AI file, 我問返魚魚, 佢話如果要AI file要加$40, 我都未覆返個邊, 佢地就好快send左個改大左日期既樣辦俾我睇, confirm左俾埋地址就等收貨, 好快手!!

星期五confirm, 琴日星期一就收貨喇, 係貨到俾錢, 我真係完全唔駛煩, 勁爽!!

原來個鋼印都幾重, 搞左輪先識整, 我用白色紙印唔係好明顯咋, 唔知遲d印喜帖信封會咩效果呢?