婦科檢查@醫薈體檢坊

剛剛去左做婦科檢查喇, 返黎報告下先!

上回講到搵左幾間, 唔知去邊間好, 最後揀左"醫薈體檢坊", 因為有我想要既超聲波, 又唔駛抽血, 哈哈, $650我覺得ok, 都唔算難book!

上到去都幾靚幾大, 仲有無敵大海景, 我等候期間係望住個大海景發呆! 計返我有六年冇做過, 今朝開始就好驚喇, 上到去首先填form, 之後量血壓, 度高磅重, 等左一陣就入去做了, 呢度係女醫生, 佢首先係做抹片先, 我真係好驚呀, 佢不停叫我放鬆, 之後到盆腔超聲波, 呢個真係要講下, 原來可以揀肚面照或陰道照, 如果肚面就要好急好急尿先照得, 護士話既然我都做得抹片, 唔爭在陰道照埋啦, 咁我話...是但啦!

做完個抹片就超聲波, 佢係支棒棒道搽gel, 之後就好笑喇, 我見到佢係用個condom套住支棒棒再放入黎, 超聲波可以一齊睇, 佢係度話呢個係膀胱, 呢個係卵巢等等, 講真我鬼識睇, 剩係覺得好唔舒服, 因為佢拎住棒周圍照, 我係咁縮, 佢又不停叫我放鬆, 最後話超聲波睇到冇事, 我放心晒!!

佢再用1分鐘check下個胸就離開得間房了, 佢話我乳腺好lumpy, 呢個我記得上次個醫生都有講, 不過唔知有咩影響, 剩係叫我自己得閒check下下, 成個過程個醫生都好快手, 出到去又等一陣, 護士就俾個樽我驗小便, 驗完等叫名俾埋錢就走得, 我逗留係呢度既時間只係45分鐘, 真係好快呢, 不枉我係office hour偷走出黎做檢查!!

佢話大約兩星期就有報告, 可以選擇上黎拎或佢寄俾我, 由於佢又收六點, 所以我選擇叫佢寄俾我, 懶得就懶, 哈哈!

總括黎講呢間都唔錯呀, 仲有好多日本人, d護士識講流利日文添, 感覺好high, 哈哈!!

報告完畢~

種車厘茄 - 一星期進度

一直都好想自己種下野, 係要由種子開始種個隻, 之前都試過種薰衣草, 不過去完旅行返黎死左, 之後就冇種了, 最近又有呢鋪癮, 話晒而家屋企有個花槽嘛, 真係唔好o徒!!

走去買種子既鋪頭, 問佢有咩易種, 佢就介紹左車厘茄同甜椒俾我, 咁我就開始種車厘茄先!! 上網睇d人可以種到好大棵, 但個老板娘話唔係好大咋喎, 我驚個花槽擺唔落呀, 開始有d擔心添!!

唔諗咁多, 種左先算, 老板娘教鋪一半滿既泥, 然後放幾粒種子係泥面, 每日淋水就可以了, 到d苗生到有個盆咁高先再加返多d泥! 我放左好似8-10粒種子左右, 估唔到2日就發芽喇, 到今日第六日, 有五棵苗呀, 估唔到呢個車厘茄既發芽率係咁高呢!!

由於生長太快, 琴晚走去問老板娘之後點, 係咪要分盆? 佢話我太勤力淋水, 所以生得咁快, 咁樣唔好架, 得個高而唔會肥美, 叫我等d泥乾先再噴下水, 咁我唯有忍下手啦!!

Day 3 - 發芽喇, 仲有兩粒添!

Day 4 - 其中一粒升高左好多~

Day 4 - 同一日, 估唔到幾個鐘大左咁多!

Day 5 - 四棵苗喇!

Day 7 - 總共有5棵呀, 再高d就要加泥喇!

分享: 秀身文化脫毛-1st

之前團購$388 享受秀身文化 6 節激光永久脫毛療程，任選小腿連膝蓋 / 前臂連手肘 / 腋下 / 上唇 / 髮際任何一個部位 (原價 $9600)終於都上左去第一次, 都唔算難book, 上到去比我想像中細, 填d個人資料就坐係度等, 見到有個女人做完facial出黎, 應該係last一兩次, 咁個女仔就狂sell佢, 又叫佢join乜join乜, 個女人冇理佢話趕時間就走, 點知個女仔追埋出去lift口問佢仲要考慮乜, 睇到呢個情境令我好驚, 真係好怕煩!!

個女仔叫左我入房, 問我揀邊個部位, 我話揀小腿, 咁佢問我之前做過未呀, 有冇做過其他呀等等, 我話join左musee腋下, 佢話都聽過好多客話join左musee, 之後佢話間房仲有人, 俾左公司本野我睇, 話佢地有d乜野做等等, 咁佢又乘機sell下, 頭幾版係"羊腸線", 問我聽過未, 我話聽過, 覺得好恐怖 (其實我想佢知我冇興趣), 之後佢又話可以打d唔知咩針, 個鼻會高d, 塊面又可以瘦d, 仲俾左佢自己之前既相我睇, 係好大分別, 佢話一支針keep到半年左右, 我諗好多明星都有打, 曾幾何時我都有諗不如影pre-wedding or big day都打返支, 不過真係驚有副作用, 所以唔會諗!!

sell完呢d野, 佢話睇下我小腿, 之後話我好多倒生毛, 因為我之前係用開連根拔既脫毛機, 咁佢話laser未必打到倒生毛, 會唔吸光, 可能要另外加吸收劑, 我聽到又覺得, 即係又想我加錢, 不過佢又話, 可以試下做一次睇下點先, 咁就走左入去做! 做既係另一個女仔, 好人好多, 冇咁煩, 幫我剃左d毛後就搽gel, 之後開始做了, 其實都幾痛, 佢係每個範圍打, 我覺得都幾求其, 即係一定有d位係打唔到, 佢話個半月後再返去, 咁我就走了!!

其實做laser既過程只係5-10分鐘, 但我留左30分鐘, 我返到屋企睇下對小腿, 唔覺得有咩分別, 我之前都做過laser, 知道大概係點, d毛會慢慢脫落, 我感覺今次真係幾敷衍, 而家仲有d擔心下次上到去佢要我加錢落吸收劑添!!

報告完畢~

Majesty改期

原本17/6影Majesty既pre-wedding, 下晝去男友拳館影埋, 點知因為落雨就要改期了, 唉....原本請左假既我地唯有返工, 留返d假去台灣!

暫時改左20/7影, 真係驚會好熱, 希望到時再落雨, 改下改下改到秋天先影, 哈哈!!

落完大雨呢幾日又打風, 今個星期六仲難得約左屋企人去釣墨魚, 唔該d打風落雨行雷閃電呢幾日搞掂晒佢, 星期六俾返個好天氣我呀!!

另外, book左今個星期四去醫薈體檢坊做婦檢, 死啦, 我唔記得左上次m come係幾時, 近呢幾年已經冇記住邊日黎架喇, 唯有到時估俾佢啦, 做完後我會上黎報告架喇!!

轉自facebook: 林寄韻 - 禮金篇

facebook見到有人post呢段野, 好有共鳴呀!!

自從投身Wedding media行業之後，朋友要結婚，我幾乎一定係朋輩間第一個知嘅，而且，我亦好順理成章咁成為咗身邊嘅朋友，甚至乎朋友嘅朋友嘅wedding planner啦！真係好開心ga，可以生活响wedding嘅世界，感覺好幸福！噚晚，我一位男性朋友就因為決定明年初結婚，所以約我飲嘢，主要想問我關於影婚紗相同場地佈置嘅資料。點知飲飲吓，佢就皺哂眉一臉愁容，細問下，原來佢正為禮金而煩惱！未來岳母大人雖則沒明言，但係，就經常常曲線咁向自己個女施壓，搞到我呢個只係打工仔嘅朋友仔好大壓力。佢問我公價禮金係幾多？佢話知道岳母心目中嘅價位大約係$88,000，再加婚禮當日嘅全數「人情」。

搞到我今日忍唔住要講吓「禮金」呢個topic。老實講，「禮金」本來只係一份心意，點解要明碼實價？如果真係要問，我可以話曾經有網站公佈過一項有關結婚消費嘅報告，調查顯示準新郎平均支付三分之二(66%)的結婚總開支，以結婚開支平均數推算，準新郎需支付港幣$14.9萬元籌備婚禮。而高達18%的準新郎更負責支付九成或以上的結婚總開支。除上述的結婚支出外，調查顯示準新郎需支付女家的禮金平均數為港幣$58,705元。呢啲資料可以當參考，我始終認為，畀禮金或者搞婚禮都必須量力而為，同時，長輩都要識做，要尊重，體諒下一代嘅實際經濟能力。

其實，香港女仔已經好幸福，外國人結婚有好多項目都要女家負責。反觀香港男士好值得大家欣賞，佢地由約會到結婚，一直都好風度咁為女仔埋單。為咗實現另一半嘅dream wedding，有時更會付出好大嘅努力。大家真係唔好太過分，時代根本唔同咗，社會形態已改變，昔日女人出嫁後會隨夫生活，不可能經常回娘家侍候父母，當然亦不會支付家用給娘家。傳統上，男方家人娶媳婦，媳婦以後就要侍候夫家父母，因此，當時嘅禮金就係男方酬謝女方父母養育媳婦之恩。依家男女經濟獨立，彼此各自有經濟嘅負擔同壓力，女嘅出嫁後依然會供養父母，與舊日社會絕對係兩碼子嘅事。

做人阿媽嘅，天下間有個男人願意承諾用一輩子去愛妳個女，去照顧妳個女。
妳，點解咁忍心，去加重呢個男人嘅負擔，令佢透不過氣呢？
佢冇能力畀到妳心目中嘅價，係咪要黑面先？

婦科檢查

做左咁多年人, 其實只係做過一次婦科檢查, 仲要係大約六年前第一份工間公司, 唔知點解無端端有優惠, 好似三百幾就可以做, 咁就走左去做了! 個陣去都好驚, 乜都唔識又冇做research, 好彩係女仔做, 佢會幫我驗下胸, 仲有抹片檢查, 第一次做真係驚到全身震晒!

呢幾年成日都好想去做, 但係又唔知邊度好, 私家醫生又冇人介紹, 唔知幾錢同埋好唔好, 家計會又驚d人會好粗暴, 同埋冇超聲波, 我想做埋盆腔超聲波嘛, 好似安心d, 就係咁拖下一年又一年, 今次我真係要的起心肝做左佢!!

點解會無端端又醒起呢個item呢? 就係見到團購網又有三百幾既婦檢優惠: $398 購買香港專業體檢集團 女士驗身計劃，包括肝功能、腎功能、糖尿、骨骼、子宫頸 (柏氏抹片)、乳癌、腸癌等檢查 (原價：$2180)

仲驗埋糖尿個d, 好似好抵, 但係冇我想要既超聲波, 你地有興趣可以join: http://www.travelfish.hk/tc/deal/hkprofhealth_offer_398?utm_source=TravelFish+Limited+List&utm_campaign=e59bc15737-UA-3380676-4&utm_medium=email

之後上網搵到幾間, 首先係esd life見到美邦, 非常之抵之餘仲有百佳coupon送, 仲諗梗$680定$1020, 因為我本身甲狀腺有d問題, 所以可能會join $1020, 之後上網search下, 原來好多人都係呢間做, 但係bad comment就好多囉, 首先係話超多人, 有排等, 其次就係因為多人, d人好求其, 同埋粗手粗腳, 做既係姑娘唔係醫生, 咁我真係要諗下先!!
http://health.esdlife.com/bodycheck-plan/female-bodycheck.php

再搵下其他, 醫院個D又好貴, 連卓健都好貴, 搵到呢間聖雅各福群會, 聽個名似係D教會機構, 應該ok卦, 價錢都好抵, 可能地點時間都好難就:
http://hs.sjs.org.hk/new_web/body_cList.php?bodyNo=20070724193059

最後搵到呢間醫薈體檢坊, 網上冇咩comment, 睇過一個話佢家庭醫生係呢間, 上過去做都幾好, 地點都近公司, 我可以返返下工出去驗嘛, 唔駛請假, 哈哈!! 頭先打去問係咪女醫生, 佢地話係架, 個女仔好nice, 感覺唔錯, 剩係婦科檢查唔駛驗血, 冇所謂啦, 遲d婚前檢查都會驗血, 到時一次過仲好, 最緊要呢間有超聲波, 希望冇揀錯啦!
http://www.pacificheck.com/

WEDDING LOGO印章印台

上次唔見左個印章, 真係好唔開心, 我99%肯定係間餐廳唔見的, 佢地都話冇見過, 唯有再造啦, 兩個印章加埋RMB116, 仲有運費, 咁我就跌左百幾蚊喇, 唉!!

同大家分享下先, 其實係睇到blog友魚魚既分享先, 問佢拎左賣家資料後就急不及待訂貨了, 佢地仲有其他野賣架, 我就順便買埋熱溶槍同膠, 仲有印台! 其實上網睇真係好難睇到咩色, 唯有試下架咋, 揀左個大既紫色, 另外兩個細既桃紅色, 點知原來兩個差唔多的, 算啦, 桃紅色我都好鍾意!! 買咁多色原因係我想整個漸變色效果, 收到後就拎出黎玩了!!

嘻嘻, 我好鍾意呀, 特別係漸變色效果, 桃紅色同紫色都幾match, 咁我可以諗下個wedding除左紫色, 仲可以加埋桃紅色喇!!

黎個合照先, 開閃光燈影先出到個紫色!

試印先

漸變色效果

毛毛處理

由細到大我都好多毛毛, 手腳唇毛, 就算連眉毛都多過人, 讀書時代多數係用剃刀或脫毛膏, 到後來買左部連根拔既脫毛機, 因為連根拔唔會越生越粗, 不過就會有紅點, 同埋有d毛毛會倒生, 真係好煩!

n年前興起laser脫毛, 個陣唯一一間出名既大公司係dermes, 去到而家都一樣, 仲會有一次免費脫毛俾你試添, 我試過一次, 痛到飛起呀, 其實都好想做架, d毛毛真係好煩, 但係太貴喇, 同埋個次真係幾hardsell, 我真係整晒個喊樣話好痛佢先俾我走, 我朋友就有錢, join左做全身, 成四萬幾蚊呀, 全身意思係手腳連唇毛, 不過....佢做左幾年到而家都未清晒!

到早幾個月, 堂妹介紹一間musee, 係用彩光的, 得唔得都未知, 不過價錢真係好抵, 佢地話唔hardsell架, 咁我又試下, 佢地做個時係$888, 到我join既時候又平左, 變左$555添呀, 哈哈!! 公司附近有分店, 咁我想約放工後, 原來係勁多人, 約襯都要預兩個月, 咁我預約左第一次咨詢, 上去都係講下詳情, 個環境幾乾淨舒服, 傾完後就俾錢同約時間上黎做了, 又要等兩個月先開始做得!

五月上去做第一次, 入房換件袍就開始做, 因為剩係做格肋底, 個範圍好少, 所以好快就搞掂, 係一d都唔痛架, 只會有痕既感覺, 哈哈! 過左幾日, d毛毛好似做完laser咁, 會自動脫落, 感覺好好呢!! 下一次去做係七月, 唔知要做幾多次先唔駛再黎呢??

大家有興趣可以join: http://www.musee-hk.asia/lp/

如果冇人做你地介紹人, 可以寫我架, 唔好蝕, 到時問我攞資料啦!

早兩日見到團購網又有脫毛優惠, 係秀身文化, $388做一個部位, 又係好抵呀, 我諗左一日join唔join好, 因為佢係做6次only, 但係話一般6次就可以清晒, 其實都係$388, 唔得咪算囉, 所以又join左, 仲諗梗揀邊個部位做呀, 好似小腿大範圍d, 抵d呢, 呵呵, 做完再上黎分享!!

剛打完呢篇BLOG, 又見到有團購脫毛, 係另一間架, 只係$228, 我又join左喇, 一樣係6次, 不過部位少d, 我會揀上唇, 大家有興趣都join啦!

http://hk.deals.yahoo.com/hong-kong/offer/1090

計一計我搵三間唔同做唔同部位, 真係好抵, 哈哈!

腋下(musee)$555, 小腿連膝頭(秀身文化)$388, 上唇(reveiler)$228

BUDGET

前排既一團火已經慢慢熄滅, 結婚既野已經冇搞, 不過都搞梗另一樣有關既野, 就係去台灣影相既機票酒店, 本來諗住乜都要最平, 務求以最平既價錢去台灣影相, 免得又俾人話我洗咁多錢影咁多輯相唔知做乜!

諗住機票早d book平d, 所以而家就睇了, 而家機票價錢係大約$1600(未計tax), 但係package連酒店又真係抵好多, 一晚package $2300, 三晚package $2500, 即係俾多$200可以住多兩晚, 都唔知佢條數係點計! 就係不停係度度下諗下點樣最抵, 諗到頭都痛埋, 婚紗相$17800影2日, 包一晚既食宿, 咁本身我預成個台灣TRIP加埋影相係$28000, 希望可以啦!!

再另一個問題又開始出現, 男友同我講, 佢戶口得返x萬(即係好少啦), 我開始又擔心, 會唔會唔夠錢結婚呢? 仲要我仲未同阿媽傾掂禮金問題, 咁我同男友講, 去台灣d錢我俾啦, 而我而家更加要小心計住每一條數!

我唔知道各位JM係點樣預錢結婚, 之前我係問過身邊結左婚既朋友用左幾多錢, 再計下自己有幾多, 覺得夠所以就開始籌備, 點知而家又覺得未必夠, 首先有部份我係預左出年同男友既雙糧同bonus, 萬一唔好彩話冇得出, 真係唔知點算, 另外係人情錢, 酒樓埋單條數我預左係碌卡, 到時收返人情先找數!

honeymoon已經諗住唔去住, 除非真係有錢剩就過一兩個月去北海道! 黎梗仲有租衫, 買過大禮, 上頭, 利是封等等雜項, 仲有花球, 手花, 姊妹裙等等, 真係開始計唔掂條數, 好擔心呀!!

倒數一年半的進度表

之前d朋友話搞結婚預一年半時間, 點知而家已經要預兩年, 而我就係一年十個月左右, 已經好多野冇得揀, 而家倒數一年半, 黎個進度表先, 呢個係我自己打, 真係打左好耐!!

我們的大日子 : 8 Dec 2012 (Sat)

婚宴地點 : 博藝會 - 宴會廳

出門地點 : 帝景酒店 (暫定)

註冊

註冊地點 : 博藝會 - 宴會廳

註冊時間 : 8 Dec 2012 18:00

証婚律師 : 戴秉信律師

羽毛筆+座 : 未睇

戒指座 : 小小白(龜龜)戒指座

証書套 : 搵梗

過大禮

過大禮日子 : 2012年10月14日 (星期日)

過大禮用品 : 未買

婚紗相及當日攝錄

婚禮攝錄 : 純美新娘 - 小寶(standard) + Ivan (snap) +
                 Steven (video)

成長片段 : 純美新娘 - 未準備

即日剪片 : 純美新娘

婚紗相 : 1. The Amor (已影@果欄+石澳+IFC on 9 Feb 2011)
             2. G3 (已影@studio+觀塘碼頭+大潭+煤氣燈街+高街
                 on 29 Apr 2011)
             3. Majesty Wedding (17 Jun 2011影)             4. The Amor (17 Jun 2011補影拳館)             5. 台灣綠攝影像 (Oct 2011影)             6. Mona Lisa - 考慮酒樓coupon再upgrade最平
                 package

服裝

新娘 :

婚紗晚裝(pre-wedding) : 百利純美新娘 + 淘寶

婚紗晚裝(big day) : 未睇

婚紗鞋 : 未睇

晚裝鞋 : 未睇

褂 : 已有(from媽媽)

褂鞋 : 未睇

Girdle : 已買satami for pre-wedding, 考慮買另一個

Nude bra : 有一個cheap cheap的, 諗梗需唔需要

頭紗手套 : 未睇

新郎 :

新郎禮服 : 未睇

新郎恤衫 : 已有兩件, 未必再買

皮鞋 : 未睇

父母 :

奶奶裙 : 未睇

外母裙 : 未睇

老爺西裝 : 未睇

外父西裝 : 可能唔駛買

兄弟姊妹 :

伴娘裙 : 未睇

伴郎衫 : 未睇

姊妹裙 : 未睇

兄弟衫 : 未睇

化妝飾物

新娘MUA : June Lo

伴娘MUA : 自己搵

家人MUA : June Lo

姊妹MUA : 自己搵

頭飾 : 未睇

頸飾 : 未睇

手飾 : 未睇

結婚戒指 : 未睇

嫁妝 : 未買

花車佈置

主花車 : 阿達 - 紫色倫敦的士

其他車 : 未睇

結婚花球 (鮮花) : 未睇

結婚花球 (絲花) : 已有2個for拋

新郎襟花 : 未睇

姊妹手花 : 未睇

兄弟襟花 : 未睇

家人襟花 : 未睇

婚禮用品

喜帖 : 博藝會包 - 未印

餅咭 : 已買美心150張

唐餅 : 未買

Wedding Logo : 已有兩個

印章 : 已整

利是封 : 有少量(from三佬)

放是利福袋 : 未睇

人情箱 : 未睇

貼紙、囍字、對聯 : 未睇

敬茶茶具、碗筷 : 已有(from三佬) + 博藝會提供

咕o臣 : 已有(from三佬)

紅傘 : 可能有人俾

睡衣 : 未睇

上頭用品 : 未睇

子孫筒 : 未睇

回門乳豬 : 未睇

結婚公仔 : 已有兩對

龍鳳被 : 未睇

晚宴用品

晚宴backdrop : 博藝會提供

簽名布 : 純美新娘 + 綠攝影像

簽名筆 : 未睇

晚宴歌曲 : 未諗, 博藝會都有

晚宴司儀 : Glenna + Eddie

賓客名單 : 未整

座位表 : 未整

檯號牌 : 博藝會提供

餐牌 : 博藝會提供

啤牌 : 未睇

席前小食 : 博藝會100份席前小食+美心西餅

紅酒+VSOP : 未睇

兄弟姊妹團

伴郎 : 樑少

兄弟 : Dicky, Glenna, Siu Hang, Tak Fu, Tat, Yeung

伴娘 : Mavis

姊妹 : Amanda, Eddie, Escher, Eva, Pet Pet, Shirley

當日程序

當日rundown : 未整

分工表 : 未整

Package List : 未整

其他各項準備

婚前檢查 : 未睇

試菜 : 未安排

蜜月旅行 : 有錢先去

新居 : 已有 

我們的兩週年紀念

六月七日係我地既紀念日, 今年係第二年, 呵呵, 其實好似一齊左好耐咁!

好多人都覺得, 我地一齊左冇耐就話結婚, 好似太快喎, 其實我地識左好多年架喇, 我地係2000年識架, 個陣仲係同事, 間唔中會傾下電話, 過左幾年開始好friend, 仲有伴郎哥哥添, 個陣伴郎哥哥話我地三個係狂歡三寶, 哈哈!

我每次失戀佢都有出黎陪我, 而佢感情上遇到問題又會搵我傾訴, 真係諗都冇諗過我地會一齊架, 呢d就係天意喇, 我地拍拖後都維持左地下情三個幾月先公開架, 首先係同伴郎哥哥講, 我地本來係狂歡三寶嘛, 而家兩寶拍拖, 唔知佢會有咩反應, 估唔到佢既反應係: 嘻嘻, 唔出奇吖!   實在太好笑喇, 至於其他朋友, 特別係舊同事, 好多都係唔信, 話完全諗唔到我地會一齊!!

我地都發展得好快, 因為我之前係自己住, 佢好快就同我一齊住喇, 其實最初佢係間中返屋企換衫再上黎陪我瞓, 慢慢慣左搞到我唔敢一個人瞓, 咁佢咪變左晚晚係度囉, 所以我地好快就半同居喇, 到上年就買埋樓, 一切都好快好快咁呢, 冇辦法啦, 香港人節奏係快d架嘛, 加上我地兩個年紀又唔細呢, 買完樓當然就係結婚了, 所以就係度寫梗blog, 再識埋你地, 故事發展就係咁喇, 可能過幾年寫生b經架喇, 哈哈!!

呢一晚我地去左Amaroni's食飯!

姊妹裙咩色??

雖然仲有年半, 我都諗住d裙呀禮服呀等等出年先搞, 驚自己會三分鐘熱度呀, 而家鍾意可能出年又會唔鍾意個款, 不過都有睇姊妹裙, 因為聽得太多姊妹裙不快事, 都係早d睇定好d!

上年有個姊妹結婚, 其實係我地圍內既第一個, 我結婚都主要係搵返呢個做姊妹, 而我fd係包裙唔包化妝, 所以我都會一樣, 佢係香檳金既裙配桃紅腰帶+花, 本來我諗梗, 不如叫所有人用返呢條裙啦, 可以慳返吖嘛, 我個條就俾結左婚個位咪得囉, 係咪超正呢?? 哈哈, 不過都係講笑啦!!

之前行過金都同百利都問過下d價錢, 平均都要三四百蚊條, 我fd之前係百利做, $2000/9條, 係8短1長裙, 其實已經好平, 不過我冇咁多人, 有一個姊妹係男仔嘛, 所以頂多都係6條, 應該唔可以咁平, 咁我呢d淘寶怪唯有係返淘寶睇算喇, 哈哈!!

本身鍾意紫色, 但係成條紫色又太誇張了, 如果幾個走埋一齊仲勁, 所以我會以淺色為主, 配少少紫色, 心目中都係最大路既香檳金/米白配深紫色, 睇左有以下幾款呀, 到時再俾佢地揀, 可能會同布唔同款, 而我心目中又想要雪紡, 因為好怕d裙影相會反光, 你知啦, 好多時會係幾個姊妹企埋一齊, 幾條一齊反光會好誇的!! 上次我地做姊妹時, 都係要求短裙, 因為睇落young d, 同埋行路都方便d, 長裙我驚會pk呀, 仲有心口位, 我地呢d平平無奇都係一致贊成唔要心形胸, 哈哈, 不過都有2-3位係有料之人, 我諗佢地會揀心形胸, 唯有揀幾款到時俾佢地自己決定啦!!

最大路既款!

深紫配淺深紫

呢條幼腰帶, 另外我鍾意佢既不規則裙腳

都係大路款, 不過唔同布!

大路款, 可以任揀色!

同上兩張好似

呢個條帶同裙邊有紫色, 我覺得好似校服!

呢款都鍾意, 不過有舊同學上年結婚用左呢個款, 我唔想撞!

邊度拋花球??

呢排不停係度諗, 我係博藝會註冊, 個度樓底唔高, 咁我去邊度拋花球好呢?? 其實我都幾重視拋花球呢個環節, 因為我身邊既姊妹多數都係未結婚架, 上年有一個結婚, 佢個花球係我接到(應該係話擲中我個頭先真), 我話過會拎返出黎拋架, 另外我又整左個, 如果到時氣氛好, 可以拋兩個添, 哈哈!!

我search過都唔見有人提呢一part, 點算呀? 唔通我六點註冊完要走落街拋??

4th Pre-wedding - 攝影師

琴晚上網睇到, 我十月去台灣影婚紗相個位攝影師, 原來有影到范范同黑人既婚禮架, 後尾先醒起, 佢好似話過自己間中會幫雜誌"新娘物語"去影相, 最初我都冇為意添, 本雜誌搵得佢幫手影明星婚禮, 應該都幾厲害, 我之前仲有少少驚自己會唔會後悔搵左呢個咁冷門既攝影師添!!

最近開始睇台灣機票酒店, 盡量近返佢地鋪頭, 不過佢地鋪係捷運永春站附近, 好似冇咩酒店呀, 真係頭都痛!! 數數下都成六年冇去過台灣, 多左好多選擇喇, 有間叫新驛旅館, d裝修好得意呀, 價錢又平, 又近西門町, 不過好似幾細間, 今次我要搵最平最平既酒店呀, 費事用得多錢又俾人話呀!!

攝影師steven(武少)俾左d提議我, 第一晚酒店是但就得, 因為第二朝一早就會走, 佢俾左幾間選擇我, 但係都係超舊酒店, 好似有鬼個d咁呢, 睇到相我都覺得驚, 價錢係同新驛個d差唔多咋喎, 反而我暫時睇到間近佢地少少有新尚(hotel 73)同晶壐(at boutique), 佢話晶壐近地鐵d, 但都要行15分鐘呀, 仲有冇其他選擇呀?? 好煩呀!!