嬲!!!

擇日+夾完八字, 我同男友都好興奮, 用手機update status上facebook, 原本想剩係寫相士話我地非常之夾就算, 男友話可以寫埋去擇日, 即係佢都唔怕俾人知, 咁就開開心心寫上去同人分享, 點知換黎一個嬲字!!

事關我男友的ex, 我同佢之前都係識, 我唔想因為我同左男朋友一齊而冇朋友做咁, 間唔中會msn, 都係傾下女人野, 呢個年紀都係傾買樓結婚啦, 佢都係出年結婚, 有一日msn, 佢知道我地都會出年, 竟然話唔想同我地同一年, 大佬呀, 點避呀? 你叫我地為左你而延遲呀?? 都未夠, 仲要問我做乜咁快, 有冇同男友講過佢結婚, 我話提過下啦, 佢竟然話: 唔怪得啦, 佢知道我結婚, 所以都咁快, 如果唔係唔會咁快架!  WTF??? 我真係勁想爆粗, 你當自己邊位呀? 仲要你對住我講d咁既野, 咩意思呀?

算數, 呢d係msn既對話, 你知我知, 我當冇事, 我開開心心update個status係自己facebook, 你又做乜要走黎搞事呢? 我要同你揀同一日就唔駛洗錢去黃大仙搵人擇日啦, 成件事上面, 我唔知你到底覺唔覺得自己有問題, 我諗黎諗去, 就算用咩身份去睇呢件事, 都覺得你有好大問題囉, 我唔知你會唔會睇到呢個blog, 不過我都要宣泄我既憤怒...

我想講, 我同佢識左咁多年, fd左咁多年, 絕對信佢唔會對你有任何幻想囉, 當年你有第二個, 佢發現左後對你變晒冷淡, 自己諗下啦, 你想回頭時佢都唔so你, 更何況而家, 之後你都有第二個啦, 散幾個月仲成日msn/sms msg俾佢話掛住佢, 點解人地又一句都冇理過你呀? 咁樣你都覺得人地會因為你結婚而結婚呀? 我同佢上年聯名一齊買樓, 開埋聯名戶口, 同居, settle好間屋就搞結婚, 係咪有咩問題呢?? 點解你會聯想到樣樣野都因為你呢? 好彩我早過你買樓姐, 如果唔係你又話我地因為你買而買啦!! 到底發生咩事, 到底係邊個放唔低, 亦都有人話, 當年你好想買樓, 不過冇買到, 但係我同佢一齊咁短時間就買! 每個人每對情侶都會唔同, 係咪有需要去比較呢??

我都唔明, 本來諗住大家都搞結婚, 可以一齊share下, 而家搞到反晒面, 仲俾全世界知晒, 唔怪得佢一早話唔鍾意我同你msn, 因為佢知道你會搞搞震, 正如佢facebook所講, 你係立心不良同想破壞我地, 你自己都有個, 點解仲要搞我地? ok啦, 我當識少一個朋友姐!

宣泄完畢...

搞結婚已經好多麻煩事, 真係唔想再有其他無聊事發生, 真係好影響心情, 係時候要收拾心情, 搞好自己既婚禮!

黃大仙擇日

開始搞結婚, 第一步就係擇日, 本來諗住叫d老人家睇下通勝就算, 不過未來老公話想搵人擇, 好啦, 搵人擇係會安心d既! 之前都唔知, 原來擇日結婚係咁貴, 仲要有咁多野注意, 我以為係睇下適唔適宜結婚就得, 原來最主要係睇雙方父母同埋自己既生日月+生肖, 咁咪即係要就六個人既生日??

上網睇到好多人去黃大仙既蘇東明師傅擇日子, 我地都決定去呢間啦!一去到好多間都冇人, 點知蘇師傅間鋪有兩個女人係度, 我地係門口排隊, 個師傅問我地咩事, 我地話黎擇日, 估唔到佢叫個兩個女人出返黎俾我地入去, 原來佢地係查三世書, 有排搞, 所以俾我地先, 哈哈!!

呢度擇日貴左, 而家要$680, 我地夾埋八字, 加$200, 留低左我地同埋父母既生肖同生日, 同埋要2012-13既星期六日, 佢話計完今晚會打俾我地, 到時我地擇好邊日再話佢知! 到夾八字, 都用左5-10分鐘, 出面個兩個女人等到有d唔耐煩添, 蘇師傅話我地兩個唔止係夾, 仲係非常之夾, 哈哈, 佢指住d唔知點出黎既金木水火土, 之後又話咩生咩呀個d, 完全聽唔明, 不過最緊要都係佢講出重點, 除左話我旺夫(呵, 呢個真係好多個相士咁講), 仲有話佢愛妻, 非常之好, 我同佢講, 你要對我好d, 咁我先至旺你, 諗諗下, 佢同左我一齊又真係幾好, 即刻升職加薪, 仲加唔少添, 都好...我呢世人都唔係一無是處吖!!

夜晚蘇師傅打黎, 佢俾左2012年9月至2013年1月既9個日子我地揀, 其實我地真係得返年尾揀, 正月唔會揀, 二月到六月我地幾個生日, 七月又唔揀得, 即係得農曆八月至十二月揀, 仲要係星期六日添, 好彩都有9個選擇, 完成左第一步, 下一步就係要搵地方喇!!

1st Pre-wedding 試裙

呢幾日不停搵地方租衫, 前幾日行過百利, 拎左d price list返黎, 仲有行埋荃灣, 又上網睇下, 由於事出突然, 未有心理準備影相, 一切都係以低成本算, 當係practice下先! 做完一輪功課, 決定去最平既一間, 就係百利純美新娘, 佢offer $2000/三套, 包晒飾物, 都幾抵呀!

約左今日試衫, 由於我朋友都幾有要求, 加上我又唔識, 所以租乜都要問佢, 佢之前話晚裝最好紫色, 咁我就主要睇紫色, 婚紗我真係唔多識睇, 好似件件一樣咁, 不過佢俾我任試, 最緊要係免費試衫, 試返夠本! 其實揀左條都幾鍾意, 點知朋友話呢條唔適合影相, 搞到我又要再揀過, 因為俾左錢, 佢俾我之後再返去試, 第二次試完又揀左條, 點知朋友又話唔得, 佢話要最simple有突花個d款, 第三次去人地已經話唔可以再試, 迫於無奈下我揀左公仔著住個條, 希望ok啦!

就係呢條我同男友都好鍾意, 仲要係全新冇人著過, 不過攝影師話唔好, 算數!

晚裝方面, 鍾意既又話要upgrade, 一係俾人租左, 試左幾條我都好冇乜心機, upload相俾人睇, 有幾個異口同聲話某一條幾好, 其實我就覺得一般, 不過是但啦, 就決定呢條! 我地揀左一婚紗一晚裝一禮服, 男友試衫勁快手, 朋友只要求黑色, 快快手試完度身就走人!

試到唔想試, 影佢d相就算, 呢條我都鍾意, 不過佢地又話唔適合影相!

搞掂完衫, book埋化妝, 又係以平為主, 上次係yahoo拍賣搵左個幫我化姊妹妝超平, 今次搵返佢, $999跟我一日, 我再同佢講價, $800成交, 哈哈, 我都覺得自己有d過份!

1st Pre-wedding 前奏

一位朋友鍾意影相, 幫我同男友影過兩次都幾好, 前排佢搵左個partner同佢一齊搞幫人影相, 我介紹左佢去影我堂妹既婚禮, 出黎既反應估唔到又咁好, 我地都覺得d相好靚, 可能一黎個場又靚, 堂妹又靚啦, 好彩佢地都鍾意!

今日呢位朋友打俾我, 話新年佢放長假, 得閒幫我影相, 但係我同男友初五開工喎, 點算呢? 唯有請假啦, 逗兩日利是再影, 就決定初七啦! 得返一個月都冇時間, 要租衫, 搵化妝, 仲有減肥呀!!